រាជធានីភ្នំពេញ ៖ ឆ្នាំនេះ ក៏មិនខុសប្លែកពីឆ្នាំកន្លងទៅដែរ ប្រជាពលរដ្ឋរស់នៅរាជធានីភ្នំពេញដែលជាប់សែស្រឡាយចិន-វៀតណាម នឹងត្រូវប្រារព្ធពិធីបុណ្យចូលឆ្នាំតាមប្រពៃណីដែលនឹងចូលមកដល់នៅថ្ងៃទី១៥ កុម្ភៈ ខាងមុខនេះ ហើយតង្វាយដែលសំខាន់ជាងគេបំផុតដើម្បីឧទ្ទិសជូនដល់មាតាបិតា ដូនតាជីតា កុងម៉ា ព្រមទាំងសាច់សាលោហិតដែលបានចែកឋានទៅកាន់លោកខាងមុខនោះ គឺជ្រូកខ្វៃ ។
បើតាមប្រធានគណៈកម្មការផ្សារអូរឫស្សី បានមានប្រសាសន៍កាលពីព្រឹកថ្ងៃទី១២ កុម្ភៈថា សម្រាប់ផ្សារអូរឫស្សីឆ្នាំនេះ បានត្រៀមជ្រូកខ្វៃលក់ជូនបងប្អូនដែលជាប់សែស្រឡាយចិន-វៀតណាមយកទៅរៀបចំសែនព្រេនតាមទំនៀមទម្លាប់ប្រពៃណីដូចរាល់ឆ្នាំ ។
លោក ឡេង គឹមស្រុង ប្រធានគណៈកម្មការរូបនេះថ្លែងថា ៖« ផ្សារអូរឫស្សីមានតូបលក់ជ្រូកខ្វៃចំនួន១២តូបដែលគ្រប់គ្រងផ្ទាល់របស់គណៈកម្មការផ្សារ ។ ឆ្នាំនេះ ក៏មិនខុសពីឆ្នាំកន្លងទៅដែរ តម្រូវការជ្រូកខ្វៃរបស់ប្រជាពលរដ្ឋខ្មែរដែលជាប់សែស្រឡាយចិន-វៀតណាម គឺអាចមានចាប់ពី៤ទៅ៥ពាន់ក្បាលឡើងទៅ » ។
លោកបន្តថា អ្នកលក់ជ្រូកខ្វៃទាំង១២តូបនេះ អ្នកខ្លះមានឡសម្រាប់ខ្វៃជ្រូកផ្ទាល់ខ្លួន និងខ្លះទៀតទិញបន្ត ប៉ុន្តែតម្លៃលក់ថ្ងៃធម្មតា ក៏មិនខុសគ្នាដែរ វាអាស្រ័យទៅតាមអតិថិជន (ម៉ូយ) ឬអ្នកទិញម្តងម្កាល ។ លោកថា ៖« ក្នុង១គីឡូក្រាមតម្លៃតែ៤ម៉ឺនរៀលប៉ុណ្ណោះ ប៉ុន្តែនៅពេលមានបុណ្យទានអាចឡើងដល់៥ម៉ឺន ឬជាង៥ម៉ឺនរៀល ។ តម្លៃនេះ គណៈកម្មការផ្សារមិនអាចកំណត់បានទេ ប៉ុន្តែមានថ្ងៃខ្លះអាចធ្លាក់ថ្លៃនៅក្រោមនេះក៏មាន » ។
លោកបន្ថែមថា ថ្ងៃធម្មតា គឺមានលក់តែ១២តូបទេ ប៉ុន្តែនៅពេលបុណ្យចូលឆ្នាំ ឬបុណ្យទានផ្សេងៗ អ្នកលក់បានបំបែកគ្នាច្រើនតូប ហើយក៏មានអ្នកថ្មីធ្វើតូបលក់រាយប៉ាយជាច្រើនទៀតផងដែរ គឺចេញពីផ្សាររហូតដល់មហាវិថីហ្សាដឺហ្គោល ដែលគណៈកម្មការគ្រប់គ្រងមិនបាន ។
ទោះជាយ៉ាងណា គណៈកម្មការផ្សារអូរឫស្សី មិនធ្វើអ្វីឲ្យប៉ះពាល់ដល់មុខរបររកស៊ីទទួលទានរបស់ពួកគាត់ទេ ដោយយល់ឃើញថា វាជារឿងម្តងម្កាល និងជាថ្ងៃបុណ្យប្រពៃណីរបស់ជាតិសាសន៍ ប៉ុន្តែគណៈកម្មការត្រូវរៀបចំឲ្យមានរបៀបរៀបរយ និងមិនបណ្តែតបណ្តោយឲ្យអ្នកលក់ទាំងនោះដាក់តូបលក់ដូរអនាធិបតេយ្យ ដែលធ្វើឲ្យប៉ះពាល់ដល់សណ្តាប់ធ្នាប់សាធារណៈឡើយ ។
ខណៈរដូវបុណ្យចូលឆ្នាំថ្មីប្រពៃណីចិន និងវៀតណាមចូលមកដល់ តម្រូវការជ្រូកសម្រាប់ខ្វៃបានកើនឡើងយ៉ាងគំហុក ជាពិសេសនៅប្រទេសវៀតណាមដែលបានជះឥទ្ធិពលដល់ជ្រូកក្នុងស្រុកផងដែរ ទើបធ្វើឲ្យថ្លៃជ្រូកខ្មែរហក់ឡើងស្រឺត ក្រោយពីធ្លាក់ចុះងើបមិនរួចអស់ជាច្រើនខែមក ។
បើតាមលោក ជេត ភីរម្យ អនុប្រធានសមាគមអ្នកចិញ្ចឹមសត្វកម្ពុជា បានឲ្យដឹងកាលពីថ្ងៃទី១១ កុម្ភៈ ថា បច្ចុប្បន្ននេះ ជ្រូកវៀតណាមបានងើបឡើងវិញ ស្របពេលតម្រូវការជ្រូកក្នុងឱកាសបុណ្យចូលឆ្នាំប្រពៃណីចិន និងវៀតណាម ដូចនេះ ក៏បានជះឥទ្ធិពលដល់ទីផ្សារជ្រូករស់ខ្មែរដែរ ថែមទាំងបានធ្វើឲ្យតម្លៃជ្រូកខ្មែរ ទាំងជ្រូករបស់កសិករ និងក្រុមហ៊ុន បានឡើងថ្លៃវិញ ។
ទោះបីយ៉ាងណា លោកថា ៖« បើធៀបនឹងថ្លៃដើមសម្រាប់ចិញ្ចឹម នៅមិនទាន់ឲ្យកសិករ ឬក្រុមហ៊ុន អាចរកប្រាក់ចំណេញបាននៅឡើយ តែយ៉ាងណា ក៏ប្រសើរជាងមុនបន្តិចដែរ » ។
លោក ស៊ុន ឡាយ ម្ចាស់កសិដ្ឋានចិញ្ចឹមជ្រូកមួយកន្លែងក្នុងខេត្តកណ្ដាល បានឲ្យដឹងដែរថា ជាការពិត តម្លៃជ្រូកពេលនេះបានកើនឡើងបន្តិចមែន ព្រោះជារដូវកំពុងមានតម្រូវការ ក៏ប៉ុន្តែតម្លៃនេះនៅមិនទាន់អាចចំណេញបាននៅឡើយទេ បើធៀបនឹងការចំណាយថ្លៃដើម ។
លោកបន្តថា កូនជ្រូកជំទើរៗដែលគេទុកសម្រាប់ខ្វៃក្នុងរដូវចូលឆ្នាំចិន និងវៀតណាមនេះ ក៏មិនមានហាងឆេងច្រើនដូចក្នុងឱកាសឆេងម៉េង ឬសែនផ្នូរដែរ ។ លោកថា ៖ «ចូលឆ្នាំចិនឆ្នាំនេះ មិនមានអ្នករកជ្រូកខ្វៃច្រើនដូចឆេងម៉េង ឬសែនផ្នូរនោះទេ គឺមានតិចតួចប៉ុណ្ណោះ អីចឹងហើយទើបខ្ញុំមិនបានត្រៀមជ្រូកជំទើរសម្រាប់ផ្គត់ផ្គង់ទៅអ្នកខ្វៃ»។
បើតាមរបាយការណ៍ពីសមាគមអ្នកចិញ្ចឹមសត្វ បច្ចុប្បន្ន តម្លៃជ្រូករស់ក្នុងទីផ្សារប្រទេសកម្ពុជា ជ្រូកកសិករអាចលក់បានក្នុងតម្លៃប្រមាណ៦.៥០០រៀល និងជ្រូកចិញ្ចឹមតាមក្រុមហ៊ុន អាចលក់បានក្នុងតម្លៃ៧.០០០រៀលក្នុង១គីឡូក្រាម ៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ