រាជធានីភ្នំពេញ ៖ សហគមន៍កសិកម្មសាមគ្គីខណ្ឌដង្កោ បានបង្កើតឡើងរយៈពេលជិត៣ឆ្នាំមកហើយក្នុងគោលបំណងកាត់បន្ថយភាពក្រីក្រ និងពង្រីកមុខរបរខ្នាតតូចរបស់ប្រជាពលរដ្ឋក្នុងមូលដ្ឋាន បានប្រារព្ធធ្វើមហាសន្និបាតប្រចាំឆ្នាំលើកទី៣ មានការចូលរួមពីលោកស្រី សឿង សេរី ចៅសង្កាត់ដង្កោ…
រាជធានីភ្នំពេញ ៖ សហគមន៍កសិកម្មសាមគ្គីខណ្ឌដង្កោ បានបង្កើតឡើងរយៈពេលជិត៣ឆ្នាំមកហើយក្នុងគោលបំណងកាត់បន្ថយភាពក្រីក្រ និងពង្រីកមុខរបរខ្នាតតូចរបស់ប្រជាពលរដ្ឋក្នុងមូលដ្ឋាន បានប្រារព្ធធ្វើមហាសន្និបាតប្រចាំឆ្នាំលើកទី៣ មានការចូលរួមពីលោកស្រី សឿង សេរី ចៅសង្កាត់ដង្កោ និងលោក សៀង បូរិនប្រធានមន្ទីកសិកម្មរុក្ខាប្រមាញ់ និងនេសាទរាជធានីភ្នំពេញ អាជ្ញាធរមូលដ្ឋាន ព្រមទាំងប្រជាពលរដ្ឋជាង៤០គ្រួសារបានចូលរួមផងដែរ កាលពីព្រឹកថ្ងៃទី១២ ខែកុម្ភៈ ឆ្នាំ២០១៨ នៅភូមិម័ល សង្កាត់ដង្កោ ខណ្ឌដង្កោ ។
លោក សៀង បូរិន ប្រធានមន្ទីរកសិកម្មរុក្ខាប្រមាញ់ និងនេសាទរាជធានីភ្នំពេញ បានថ្លែងឲ្យដឹងផងដែរថា សហគមន៍កសិកម្មសាមគ្គីខណ្ឌដង្កោបានបង្កើតឡើងរយៈពេល៣ឆ្នាំមកហើយ ដោយមានការបំផុសពីរាជរដ្ឋាភិបាល ដោយមានការចូលរួមអង្គការទស្សនៈពិភពលោក បានសហការណ៍បង្កើតសហគមន៍នេះឡើង ដើម្បីកាត់បន្ថយភាពក្រីក្រីអាចផ្តល់ឥណទានខ្នាតតូចឲ្យប្រជាពលរដ្ឋខ្ចីយកទៅពង្រីកមុខរបរ និងជួយកុមារក្នុងសហគមន៍ឲ្យបានរៀនសូត្រដែរ ។
ការបង្កើតសហគមន៍កសិកម្មសាមគ្គីខណ្ឌដង្កោនេះឡើង ដោយមានការចូលរួមពីសប្បុរសជននានា ដូចជា លោក នុត ពុតដារ៉ា អភិបាលខណ្ឌដង្កោ បានចូលចូលរួមចំនួន១០ហ៊ុន ក្នុងមួយហ៊ុនស្មើនឹងថវិកា១២ម៉ឺនរៀល លោក វើក សាមឿន ចូលរួម១០ហ៊ុន លោក សៀង បូរិន ប្រធានមន្ទីរកសិកម្មរុក្ខាប្រមាញ់ និងនេសាទរាជធានីភ្នំពេញ បានចូលរួម១០ហ៊ុន លោកស្រី សឿង សេរី ចៅសង្កាត់ដង្កោ ចំនួន១១ហ៊ុន លោកស្រី ជា ផាន់រស់ ចំនួន១០ហ៊ុន លោកស្រី ផេន ស្រីម៉ៅ ចំនួន១០ហ៊ុន លោកស្រី នៅ ស៊ីនឿន ចំនួន១០ហ៊ុន ផងដែរ និងមានប្រជាពលរដ្ឋក្នុងភូមិម័លបានចូលរួមទៅតាមលទ្ធភាពផងដែរ ។ ចំពោះហ៊ុនដែលដាក់ចូលរួមនេះ គឺអាចដាក់ទៅតាមលទ្ធភាពមិនបានកំណត់ទេ ក្នុងមួយឆ្នាំអាចទទួលបានការប្រាក់ដែលដាក់ហ៊ុននោះតិចតួច ប៉ុន្តែសប្បុរសជន ដែលចូលហ៊ុនធំៗខាងលើនេះភាគច្រើនមិនបានទទួលយកការប្រាក់ត្រលប់ទៅវិញ ទេគឺតម្កល់ទុកក្នុងសហគមន៍ចាត់ចែង ។
លោកបានបន្តទៀតថា មហាសន្និបាតនេះបានប្រារព្ធធ្វើជារៀងរាល់ឆ្នាំ ដោយមានការចូលរួមពីអាជ្ញាធរមូលដ្ឋាន និងប្រជាពលរដ្ឋ ។ សម្រាប់ឆ្នាំ២០១៨នេះ ជាមហាសន្និបាតលើកទី៣ បានធ្វើការបូកសរុបនៅក្នុងសហគមន៍របស់ប្រជាពលរដ្ឋ ។ កម្មវិធីរបស់សហគមន៍រួមមានឥណទានទីផ្សារកសិកម្ម ផលិតកម្មកសិកម្ម និងកែច្នៃដែលបានចុះបញ្ជីក្រោមលេខ ០០៧/១៥ កសិក/កភ ចុះថ្ងៃទី២១ ខែកក្កដា ឆ្នាំ២០១៥ ត្រូវបានទទួលស្គាល់ថា ជាសហគមន៍កសិកម្មសាមគ្គីដង្កោ ស្របតាមច្បាប់ស្ដីពីសហគមន៍កសិកម្មដែលរដ្ឋសភាបានអនុម័ត កាលពីថ្ងៃទី០៩ ខែឧសភា ឆ្នាំ២០១៣ ។
កាលពីឆ្នាំ២០១៧ សហគមន៍កសិកម្មសាមគ្គីដង្កោ មានសមាជិកមានចំនួន៥៨នាក់ ចំនួនហ៊ុន១២៥ហ៊ុន ក្នុងនោះមានប្រាក់ភាគហ៊ុនសរុបចំនួន១៥,០០០,០០០រៀល ប្រាក់សមាជិកភាពចំនួន២១០,០០០រៀល ប្រាក់មូលនិធិបម្រុងចំនួន១,៦៨៧,៥០០រៀល ប្រាក់មូលនិធិបណ្ដុះបណ្ដាលចំនួន២៥៣,១០០រៀល ។
ជាលទ្ធផលបន្ទាប់ពីការបង្កើតសហគមន៍កសិកម្មសាមគ្គីខណ្ឌដង្កោរយៈពេលជិត៣ឆ្នាំ កន្លងមកនេះសហគមន៍បានផ្តល់ជាឥណទានកម្ចីប្រាក់ដល់សមាជិកក្នុងសហគមន៍បាន មួយចំនួនសម្រាប់យកទៅដោះស្រាយជីវភាពនិងពង្រីកមុខរបរ និងផលិតផលកសិកម្ម សហគមន៍មានលក់អង្ករដែលគ្មានជាតិគីមី មានគុណភាពខ្ពស់សម្រាប់ទារក និងកុមារដែលអាណាព្យាបាលមិនមានលទ្ធភាពទិញទឹកដោះគោឲ្យបៅអាចយកអង្ករនេះទៅដាំបបរឲ្យហូបមានសុខភាពល្អផងដែរ ។
ជាចុងក្រោយ អ្នកសម្របសម្រួលក្នុងសហគមន៍កសិកម្មសាមគ្គីខណ្ឌដង្កោ បានថ្លែងអំណរគុណដល់សប្បុរសជន និងអាជ្ញាធរមូលដ្ឋាន ដែលបានជួយទ្រទ្រង់សហគមន៍ជារៀងរាល់ឆ្នាំ សម្រាប់ឲ្យប្រជាពលរដ្ឋក្រីក្រក្នុងសហគមន៍យកទៅផ្គត់ផ្គង់ជីវភាពនៅពេលខ្វះខាត និងយកទៅពង្រីកមុខរបរខ្នាតតូចបាន ។ ជាមួយគ្នានោះដែរ លោកបានអំពាវនាវដល់សប្បុរសជនមេត្តាជួយឧបត្ថម្ភដល់សហគមន៍បន្ថែមទៀត និងជួយទិញផលិតផលកសិកម្មរបស់សហគមន៍ដូចជា អង្ករគ្មានជាតិគីមីជាដើម ៕
ចែករំលែកព័តមាននេះ