រាជធានីភ្នំពេញ ៖ លោកស្រី ម៉ក់ វណ្ណស៊ីថា ប្រធានគណៈកម្មការស្ត្រីនិងកីឡាប្រចាំគណៈកម្មាធិការជាតិអូឡាំពិកកម្ពុជា បានលើកឡើងនៅក្នុងកម្មវិធីស្ត្រីនិងកីឡា រត់ដើម្បីក្ដីស្រឡាញ់លើកទី៥នៅមជ្ឈមណ្ឌលកម្សាន្តកោះពេជ្រកាលពីព្រឹកថ្ងៃទី១១ កុម្ភៈ កន្លងមកនេះថា…
រាជធានីភ្នំពេញ ៖ លោកស្រី ម៉ក់ វណ្ណស៊ីថា ប្រធានគណៈកម្មការស្ត្រីនិងកីឡាប្រចាំគណៈកម្មាធិការជាតិអូឡាំពិកកម្ពុជា បានលើកឡើងនៅក្នុងកម្មវិធីស្ត្រីនិងកីឡា រត់ដើម្បីក្ដីស្រឡាញ់លើកទី៥នៅមជ្ឈមណ្ឌលកម្សាន្តកោះពេជ្រកាលពីព្រឹកថ្ងៃទី១១ កុម្ភៈ កន្លងមកនេះថា ស្ត្រីក៏មានចំណែកក្នុងការចូលរួមលើកកម្ពស់វិស័យកីឡាដូចបុរសដែរ។
លោកស្រីបន្តថា កម្មវិធីស្ត្រីនិងកីឡារត់ដើម្បីក្ដីស្រឡាញ់នាពេលនេះ មិនត្រឹមតែបានឆ្លុះបញ្ចាំងពីភាពស្និទ្ធស្នាល និងស្រឡាញ់គ្នារវាងពីមនុស្សម្នាក់ទៅមនុស្សម្នាក់ រវាងបងប្អូន ឪពុកម្ដាយ ក៏ដូចជាមនុស្សទូទៅលើភពផែនដីនេះប៉ុណ្ណោះទេ គឺបានស្ដែងឱ្យឃើញពីការចូលរួមចំណែកយ៉ាងសំខាន់របស់ស្ត្រីគ្រប់រូបនៅក្នុងវិស័យកីឡាផងដែរ ។ ជាក់ស្ដែងពេលនេះ ក្នុងចំណោមអ្នកចូលរួមរត់ជាង៣ពាន់នាក់មានស្ត្រីប្រហែលជា៧០%មកពីគ្រប់ទិសទីចូលរួមរត់។
ចំនួននេះមានការកើនឡើងជាងបណ្ដាឆ្នាំមុនៗដែលវាជាសញ្ញាមួយបញ្ជាក់ឱ្យឃើញថា ស្ត្រីកាន់តែមានការយល់ច្បាស់អំពីអត្ថន័យនៃការលេងកីឡាដើម្បីសុខភាព ។
លោកស្រីក៏បានបញ្ជាក់ផងដែរថា គោលដៅសំខាន់នៃការរៀបចំឱ្យមានកម្មវិធីស្ត្រីនិងកីឡាដើម្បីសេចក្ដីស្រឡាញ់នេះ ធ្វើឡើងសំដៅទៅលើសេចក្ដីស្រឡាញ់ខណៈពេលដែលប្រទេសកម្ពុជា មានសុខសន្តិភាព មានស្ថេរភាព ហើយអ្វីដែលយើងធ្វើនេះចង់ឱ្យយុវជន យុវនារី កុមារា កុមារី យល់អំពីសេចក្ដីស្រឡាញ់របស់វប្បធម៌ខ្មែរដ៏ជ្រាលជ្រៅ និងល្អផូរផង់មួយ ។ មួយវិញទៀតក៏ចង់ឱ្យពួកគេយល់និងធ្វើការកែប្រែទម្លាប់មិនល្អ និងវប្បធម៌ដទៃទៀតដែលបានជ្រៀតចូលមកក្នុងវប្បធម៌របស់យើង ក៏ប៉ុន្តែយើងនឹងជំរុញឱ្យវប្បធម៌របស់យើងកាន់តែភ្លឺចិញ្ចាចឡើង ។
លោកស្រីប្រធានគណៈកម្មការស្ត្រី និងកីឡាបន្តថា ថ្វីដ្បិតតែរហូតមកទល់ពេលនេះយុវជនយុវនារីភាគច្រើនមិនសូវស្វែងយល់បានច្រើនមែន ក៏ប៉ុន្តែវាក៏ជាមោទនភាពមួយដែលគណៈកម្មការស្ត្រីនិងកីឡាខិតខំប្រឹងប្រែងរៀបចំរហូតទទួលបានជោគជ័យ និងមានការគាំទ្រកាន់តែច្រើនពីមួយឆ្នាំទៅមួយឆ្នាំ ។ រហូតមកទល់ពេលនេះលោកស្រីបានកត់សម្គាល់ឃើញថា មានក្រសួងពាក់ព័ន្ធជាច្រើនដូចជាក្រសួងអប់រំ យុវជន និងកីឡា ក្រសួងវប្បធម៌និងវិចិត្រសិល្បៈជាដើម បានចូលរួមយ៉ាងសកម្មក្នុងការងារនេះ និងមានគោលនយោបាយចូលរួមសកម្មភាពនេះឱ្យក្លាយជាសកម្មភាពវប្បធម៌មួយរបស់យើង ដើម្បីសុខភាព ដើម្បីសន្តិភាព និងដើម្បីសេចក្ដីស្រឡាញ់ដ៏ពិតប្រាកដ ។ លោកស្រីមានជំនឿចិត្តយ៉ាងមុតមាំថា សម្រាប់ឆ្នាំក្រោយៗនឹងមានការចូលរួមពីស្ត្រីយ៉ាងច្រើនកុះករជាងឆ្នាំនេះមិនខាន៕
ចែករំលែកព័តមាននេះ