រាជធានីភ្នំពេញ ៖ តាមការឱ្យដឹងពីលោក វ៉ាត់ ចំរើន អគ្គលេខាធិការគណៈកម្មាធិការ ជាតិអូឡាំពិកកម្ពុជា រាជរដ្ឋាភិបាលកម្ពុជាបានផ្ដល់សិទ្ធិដល់គណៈកម្មាធិការជាតិអូឡាំពិកកម្ពុជា(NOCC)ជាអ្នកគ្រប់គ្រង និងជាអ្នកចេញ ស.ជ.ណដល់ការប្រកួតកីឡាតាមទីសាធារណៈនានាចាប់ពីពេលនេះទៅ។…
រាជធានីភ្នំពេញ ៖ តាមការឱ្យដឹងពីលោក វ៉ាត់ ចំរើន អគ្គលេខាធិការគណៈកម្មាធិការ
ជាតិអូឡាំពិកកម្ពុជា រាជរដ្ឋាភិបាលកម្ពុជាបានផ្ដល់សិទ្ធិដល់គណៈកម្មាធិការជាតិអូឡាំពិកកម្ពុជា(NOCC)ជាអ្នកគ្រប់គ្រង និងជាអ្នកចេញ ស.ជ.ណដល់ការប្រកួតកីឡាតាមទីសាធារណៈនានាចាប់ពីពេលនេះទៅ។
លោកអគ្គលេខាធិការគណៈកម្មាធិការជាតិអូឡាំពិកកម្ពុជា រូបនេះបានបន្តថា ចាប់ពីពេលនេះទៅ គណៈកម្មាធិការជាតិអូឡាំពិកកម្ពុជា មានសិទិ្ធគ្រប់គ្រាន់ក្នុងការត្រួតពិនិត្យទៅលើការប្រកួតកីឡាផ្សេងៗតាមទីសាធារណៈទាំងកីឡាលើគោក លើទឹក និងលើអាកាស អនុញ្ញាតឬមិនអនុញ្ញាតគឺគណៈកម្មាធិការជាតិអូឡាំពិកកម្ពុជាជាអ្នកត្រួតបពិនិត្យលើផលប៉ះពាល់។ លោកបញ្ជាក់ថា សព្វថ្ងៃនេះរាល់កម្មវិធីប្រកួតកីឡាផ្សេងតាមទីសាធារណៈនៅមានភាពអនាធិបតេយ្យច្រើន ។ មិនតែប៉ុណ្ណោះសព្វថ្ងៃនេះមានបណ្ដាក្រុមហ៊ុន និងអង្គការមួយចំនួនបានរៀបចំការប្រកួតកីឡាផ្សេងៗច្រើនណាស់ដែលមិនមានលក្ខណៈបច្ចេកទេសត្រឹមត្រូវ។
លោកសង្កត់ធ្ងន់ថា រាល់ព្រឹត្តិការណ៍នៃការប្រកួតកីឡានីមួយៗបើពុំមានការត្រួតពិនិត្យផលប៉ះពាល់ឱ្យបានត្រឹមត្រូវ មិនអនុវត្តត្រឹមត្រូវតាមលក្ខណៈបច្ចេកទេសកីឡាទេនោះ វានឹងអាចនាំមកនូវផលអាក្រក់ហើយវាក៏ក្លាយទៅជាសោកនាដកម្មកីឡាទៀតផង ។
ដូចយើងដឹងហើយថា ការប្រកួតកីឡាតែងតែមានគ្រោះថ្នាក់ខ្លះៗដែរ ប៉ុន្តែបើសិនជាយើងអនុវត្តឱ្យបានតាមនិយាមបច្ចេកទេសកីឡា វាអាចចៀសផុតនូវគ្រោះថ្នាក់ទាំងឡាយ ។ រហូតមកទល់ពេលនេះមានបណ្ដាក្រុមហ៊ុននិងអង្គការជាច្រើនបានមកដាក់ពាក្យសុំការអនុញ្ញាតពីគណៈកម្មាធិការជាតិអូឡាំពិកកម្ពុជា ប៉ុន្តែយើងត្រូវតែមានការត្រួតពិនិត្យឱ្យបានត្រឹមត្រូវច្បាស់លាស់ បើមើលឃើញថា គាត់ពុំទាន់មានបទពិសោធន៍ បច្ចេកទេសប្រកួតទេនោះក៏យើងមិនអនុញ្ញាតឱ្យដែរ ។
នៅពេលនេះ សាលារាជធានីភ្នំពេញក៏បានចេញ លិខិតគាំទ្រចំណាត់ការរបស់ NOCC ដែរ ដូច្នេះចាប់ពីពេលនេះទៅរាល់ការប្រកួតកីឡាផ្សេងនៅតាមទីសាធារណៈទាល់តែមានលិខិតអនុញ្ញាតពីគណៈកម្មាធិការជាតិអូឡាំពិកកម្ពុជាទើបអាចប្រកួតបាន ។
លោកបានលើកឡើងទៀតថា ការលេងកីឡានាំមកនូវសុខភាព ប៉ុន្តែបើសិនជាយើងមិនអនុវត្តឱ្យបានត្រឹមត្រូវតាមវេជ្ជសាស្ត្រកីឡាទេនោះ អាចនាំឱ្យយើងជួបនូវផលអាក្រក់មិនខានឡើយ ។ តាមធម្មតាដូចជារត់ល្បឿននិងមានចម្ងាយឆ្ងាយហួសពីសមត្ថភាពរបស់យើង ដែលពីមុនយើងមិនធ្លាប់អនុវត្ត ក៏វាអាចធ្វើឱ្យចង្វាក់បេះដូងដើរខុសប្រក្រតីឈានទៅដល់ការគាំងមួយរំពេច នេះហើយជាបញ្ហាចម្បងនៅចំពោះមុខ ៕
ចែករំលែកព័តមាននេះ