ខេត្តស្ទឹងត្រែង ៖ ត្រយងយក្សជាសត្វតំណាងឱ្យប្រទេសកម្ពុជា ដែលស្ថិតក្នុងបញ្ជីក្រហមរបស់អង្គការ IUCN ជាប្រភេទសត្វរងគ្រោះជិតផុតពូជបំផុតនៅលើពិភពលោក ។ ពួកវារស់នៅក្នុងប្រទេសកម្ពុជា និងតិចតួចនៅក្នុងប្រទេសឡាវ ។ សត្វត្រយងយក្សពេញវ័យត្រូវបានគេប៉ាន់ប្រមាណថា មានចំនួនតែជិត២០០ក្បាលប៉ុណ្ណោះនៅលើពិភពលោក ក្នុងនោះដែរប្រមាណ៩៩% នៃចំនួននេះ មានវត្តមានរស់នៅក្នុងប្រទេសកម្ពុជា ដែលឱ្យកម្ពុជាក្លាយជាប្រទេសដ៏សំខាន់បំផុតនៅលើពិភពលោក ដើម្បីអភិរក្សប្រភេទសត្វដ៏កម្រនេះ ។
ដោយឡែក សត្វត្រយងយក្ស១ក្បាល ត្រូវបានអ្នកនាំភ្ញៀវទេសចរប្រគល់ជូនអង្គការអភិរក្សសត្វព្រៃ ACCB បន្ទាប់ពីទិញពីអ្នកភូមិក្បែរព្រំដែនឡាវ តម្លៃ៤ម៉ឺនរៀល ។
លោកហួត វុទ្ធារ៉ា ជាអ្នកនាំភ្ញៀវទេសចរប្រចាំខេត្តស្ទឹងត្រែងឱ្យដឹងថា នៅគ្រាដែលនាំភ្ញៀវទេសចរទៅកាន់ឃុំអូរស្វាយ ស្រុកថាឡាបរិវ៉ាត់ កាលពីថ្ងៃទី៧ ខែកុម្ភៈ ឆ្នាំ២០១៨ បានប្រទះឃើញសត្វត្រយងយក្សមួយក្បាលក្រុងនៅក្រោមផ្ទះអ្នកភូមិបម្រុងធ្វើម្ហូប ខណៈនោះក៏សុំទិញយកទៅលែងក្នុងព្រៃលិចទឹក ។បន្ទាប់ពីយកទៅលែងនៅតំបន់រាមសារ តាមដងទន្លេមេគង្គ សត្វស្លាបដ៏កម្រនោះ ហើរមិនបាន ១៥ម៉ែត្រផង ក៏ធ្លាក់ចូលទឹកទន្លេ ។ ឃើញបែបនោះភ្ញៀវទេសចរ និងរូបលោកបានជួយសង្គ្រោះទាន់ពេល ។
លោកហួត វុទ្ធារ៉ា បានរាយការណ៍ទៅប្រធានឧទ្យានុរក្សតំបន់រាមសារ ឃុំអូរស្វាយ លោកនី មុល និងអនុប្រធានសហគមន៍ទេសចរណ៍បូរីអូរស្វាយផងដែរ ដើម្បីនាំយកសត្វត្រយងយក្សមួយក្បាលនោះទៅកាន់ខេត្តស្ទឹងត្រែង ។ ជាមួយគ្នានេះផងដែរលោក ក៏ជូនដំណឹងទៅអង្គការ WWF ដែលមានទីតាំងនៅខេត្តក្រចះ ហើយអង្គការ WWF បានរាយការណ៍បន្តទៅកាន់អង្គការ ACCB ដែលមានវេជ្ជបណ្ឌិតផ្នែកសត្វមកជាមួយផងដែរ ពីខេត្តសៀមរាប ដើម្បីមកទទួលយកសត្វត្រយងយក្សមួយក្បាលនេះទៅសង្គ្រោះកាលពីវេលាម៉ោង១០យប់ថ្ងៃទី៩ ខែកុម្ភៈ ឆ្នាំ២០១៨ ។
កញ្ញាJULIE វេជ្ជបណ្ឌិតផ្នែកសត្វពីខេត្តសៀមរាបឱ្យដឹងថា ក្រោយពីពិនិត្យសត្វត្រយងយក្សនោះឃើញថា វាបាក់ស្លាបឆ្វេង និងមានសុខភាពមិនសូវល្អ ហើយត្រូវនាំទៅថត X-Ray ពិនិត្យឈាមរកមូលហេតុដើម្បីព្យាបាលនៅខេត្តសៀមរាប ។ កញ្ញា JULIE បានប្រាប់ឱ្យដឹងថា សត្វត្រយងយក្សជាសត្វតំណាងបក្សីជាតិ ហើយជាសត្វដែលស្ទើរផុតពូជនៅលើពិភពលោក ។ សត្វត្រយងយក្សមានសរុបតិចជាង៣០០ក្បាល ក្នុងនោះ១០ក្បាលរស់នៅប្រទេសឡាវ មួយចំនួនបានផុតពូជនៅប្រទេសវៀតណាម និងនៅសល់ ច្រើនជាងគេ គឺស្ថិតនៅតំបន់រាមសារ ដងទន្លេមេគង្គ និងស្រុកសៀមប៉ាង ខេត្តស្ទឹងត្រែង និងខេត្តមណ្ឌលគិរី ៕
ចែករំលែកព័តមាននេះ