ខេត្តកណ្តាល ៖ ខណៈពិធីបុណ្យចូលឆ្នាំចិនខិតជិតមកដល់ ចេកពងមាន់មានតម្លៃថ្លៃគួរឲ្យកត់សម្គាល់ ស្របពេលដែលក្រុមឈ្មួញកំពុងសម្រុកប្រមូលទិញនៅតាមចម្ការនានាដើម្បីត្រៀមទុកលក់ក្នុងពិធីបុណ្យនេះ ។ បើតាមក្រុមឈ្មួញដើរប្រមូលទិញចេកពងមាន់ នៅតាមចម្ការនានាក្នុងស្រុកស្អាង ស្រុកកៀនស្វាយ និងស្រុកកោះធំ…
ខេត្តកណ្តាល ៖ ខណៈពិធីបុណ្យចូលឆ្នាំចិនខិតជិតមកដល់ ចេកពងមាន់មានតម្លៃថ្លៃគួរឲ្យកត់សម្គាល់ ស្របពេលដែលក្រុមឈ្មួញកំពុងសម្រុកប្រមូលទិញនៅតាមចម្ការនានាដើម្បីត្រៀមទុកលក់ក្នុងពិធីបុណ្យនេះ ។
បើតាមក្រុមឈ្មួញដើរប្រមូលទិញចេកពងមាន់ នៅតាមចម្ការនានាក្នុងស្រុកស្អាង ស្រុកកៀនស្វាយ និងស្រុកកោះធំ ខេត្តកណ្ដាល បាននិយាយកាលពីព្រឹកថ្ងៃទី១០ កុម្ភៈ ថា មានឈ្មួញជាច្រើននាក់កំពុងប្រមូលទិញចេកពងមាន់នៅតាមភូមិនានា ដើម្បីត្រៀមយកទៅលក់ពេលបុណ្យចូលឆ្នាំចិន ដែលធ្វើឲ្យម្ចាស់ចម្ការដំឡើងថ្លៃខ្ពស់ខ្លាំង ។
លោក ថាច ជាឈ្មួញដើរប្រមូលទិញចេកពងមាន់ពីតាមភូមិ មកស្តុកទុកសម្រាប់លក់បន្តទៅទីផ្សារនានានៅរាជធានីភ្នំពេញ នាថ្ងៃបុណ្យចូលឆ្នាំចិនខាងមុខនេះ បាននិយាយថា ៖« នៅឆ្នាំនេះ ចេកពងមាន់ឡើងថ្លៃខ្ពស់ ហើយពិបាករកទិញទៀតនៅតាមចម្ការនីមួយៗ ដោយម្ចាស់ចម្ការលក់ក្នុងតម្លៃខ្ពស់ទៅតាមស្ទងចេកតូច-ធំ គឺស្ទងតូចតម្លៃជិត៣ម៉ឺនរៀល ហើយស្ទងធំតម្លៃពី៤ទៅ៥ម៉ឺនរៀលឯណោះ ។ នេះនៅមិនទាន់គិតពីតម្លៃយកមកលក់នៅតាមបណ្ដាផ្សារនានាក្នុងថ្ងៃបុណ្យចូលឆ្នាំចិនផង » ។
ឈ្មួញរូបនេះបន្តថា នៅពេលចេកពងមាន់ឡើងថ្លៃខ្ពស់បែបនេះហើយ ក៏នៅតែពិបាកដើររកទិញទៀត នៅតាមចម្ការនីមួយៗមិនសូវសម្បូរចេកដូចបណ្ដាឆ្នាំមុនៗទេ ហើយបើមានក៏ថ្លៃដែរ ។
ចំណែកឈ្មួញម្នាក់ទៀតឈ្មោះ រឿន បានឲ្យដឹងដែរថា ៖« នៅឆ្នាំនេះ ការរកស៊ីទិញ-លក់ចេកពងមាន់ គឺពិបាកចំណេញណាស់ ព្រោះអីយើងទិញនៅចម្ការ វាមានតម្លៃខ្ពស់ទៅហើយ ហើយពេលយកទៅលក់នៅទីផ្សារក្រុងភ្នំពេញក្នុងបុណ្យចូលឆ្នាំចិននៅឆ្នាំនេះ មិនដឹងជាចំណេញ ឬខាតទេ » ។
លោកបន្តថា ៖« ម្យ៉ាងទៀត ទោះបីជាចេកថ្លៃយ៉ាងនេះក្ដី ក៏ក្រុមឈ្មួញនៅតែដណ្ដើមគ្នាទិញ បើយើងមិនទិញ ក៏មានគេទិញដែរ ព្រោះ១ឆ្នាំមានតែម្ដងទេ ។ ខ្ញុំសង្ឃឹមថា នៅថ្ងៃសែនចូលឆ្នាំចិន ចេកពងមាន់នឹងអាចលក់ចេញវិញបានថ្លៃខ្ពស់ ព្រោះចេកនេះមិននាំចូលពីប្រទេសជិតខាង ដូចផ្លែឈើផ្សេងទៀតទេ » ។
ស្របពេលដែលក្រុមឈ្មួញត្អូញត្អែរពីចេកពងមាន់មានតម្លៃខ្ពស់នេះ ម្ចាស់ចម្ការនីមួយៗសប្បាយរីករាយ ដោយសារនៅឆ្នាំនេះ ពួកគាត់អាចលក់ចេកពងមាន់បានក្នុងតម្លៃខ្ពស់ ប៉ុន្តែពួកគាត់ថា អាចលក់បានតម្លៃខ្ពស់តែពេលរដូវបុណ្យទានធំៗប៉ុណ្ណោះ ហើយនៅពេលផុតរដូវបុណ្យទាន គឺតម្លៃចុះថោកវិញហើយ ៕
ចែករំលែកព័តមាននេះ