រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃព្រះរាជាណាចក្រកម្ពុជានាព្រឹកថ្ងៃទី១២ ខែកុម្ភៈនេះ បានអញ្ជើញចូលរួមកិច្ចប្រជុំបូកសរុបលទ្ធផលការងាររបស់ក្រុមប្រឹក្សាជាតិកម្ពុជាដើម្បីស្ត្រីប្រចាំឆ្នាំ២០១៧ និងលើកទិសដៅផែនការសកម្មភាពឆ្នាំ២០១៨ នៅវិមានសន្តិភាព។
សម្តេចតេជោបានផ្តល់អនុសាសន៍មួយចំនួនក្នុងឱកាសនោះ ដល់ក្រុមប្រឹក្សាជាតិកម្ពុជាសម្រាប់ស្ត្រី ត្រូវបន្តចុះសិក្សាស្វែងយល់អំពីឧបសគ្គរារាំងក្នុងការបំពេញតួនាទី និងភារកិច្ចរបស់ស្ត្រីដែលមានតួនាទីក្នុងការធ្វើសេចក្តីសម្រេចទាំងថ្នាក់ជាតិ និងថ្នាក់ក្រោមជាតិព្រមទាំងបន្តធ្វើការសិក្សាស្វែងយល់អំពីគោលការណ៍សំខាន់ៗដែលចាំបាច់ក្នុងការពង្រឹងសមត្ថភាពរបស់ស្ត្រី។
គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ ក្រសួងមហាផ្ទៃទីស្តីការគណៈរដ្ឋមន្ត្រី ក្រសួងកិច្ចការនារី និងក្រសួងមុខងារសាធារណៈត្រូវបង្កើនកិច្ចសហការក្នុងការបន្តអភិវឌ្ឍសមត្ថភាពដល់ស្ត្រីជាថ្នាក់ដឹកនាំនៅថ្នាក់ក្រោមជាតិទាក់ទងនឹងផ្នែកមគ្គទេសភាព ច្បាប់ និងបទបញ្ញត្តិនានានិងរៀបចំវគ្គបណ្តុះបណ្តាលបច្ចេកទេសសម្រាប់ថ្នាក់ដឹកនាំនារី ដើម្បីជួយឲ្យពួកគេអាចបំពេញតួនាទី និងភារកិច្ចដែលរាជរដ្ឋាភិបាលប្រគល់ជូនឲ្យកាន់ទៅមានភាពប្រសើរឡើង ព្រមទាំងវគ្គពិសេសសម្រាប់ស្ត្រី និងស្ត្រីវ័យក្មេង ហើយវាយតម្លៃឲ្យបានជាក់លាក់ ។
ក្រុមប្រឹក្សាជាតិកម្ពុជា ដើម្បីស្ត្រីត្រូវបន្តស្វែងយល់អំពីស្ថានភាព សេដ្ឋកិច្ច និងផលិតកម្មរបស់ស្ត្រីនៅជនបទក្នុងការរក្សាស្ថិរភាពសេដ្ឋកិច្ចគ្រួសារដោយត្រូវយកមាត្រាទី១៤ នៃអនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំង និងនារីភេទមកធ្វើជាគោល ដើម្បីពិនិត្យតាមដាន ។
ក្រសួងការងារ និងបណ្តុះបណ្តាលវិជ្ជាជីវៈត្រូវបន្តគ្រប់គ្រងឲ្យបានហ្មត់ចត់ ចំពោះក្រុមហ៊ុនដែលបញ្ជូនពលករ ពលការិនីទៅធ្វើការនៅក្រៅប្រទេសដោយត្រូវសហការជាមួយក្រសួងពាក់ព័ន្ធក្នុងគណៈកម្មាធិការប្រឆាំងអំពើជួញដូរមនុស្ស ពិសេសក្រសួងមហាផ្ទៃ ក្រសួងការទេស និងសហប្រតិបត្តិការអន្តរជាតិអ្នកតំណាងពីក្រៅប្រទេសក្រសួងស្ថាប័នពាក់ព័ន្ធ និងអជ្ញារធរដែនដីក្នុងការការពារសិទ្ធិ និងផលប្រយោជន៍របស់ពលករព្រមទាំងការអនុវត្តច្បាប់ និងវិធានការនានាក្នុងគោលដៅបង្កើនសុវត្ថិភាពសម្រាប់ប្រជាពលរដ្ឋដែលធ្វើចំណាកស្រុកធ្វើការនៅក្រៅប្រទេស ។
ក្នុងការអនុវត្តគោលនយោបាយវិមជ្ឈការ ក្រសួងស្ថាប័នទាំងអស់គប្បីយកចិត្តទុកដាក់ជំរុញ និងលើកកម្ពស់ការចូលរួមរបស់ស្ត្រីនៅគ្រប់កម្រិតទាំងថ្នាក់ជាតិ និងថ្នាក់ក្រោមជាតិ ដើម្បីធានាថា ស្ត្រីត្រូវទទួលបាននូវផលប្រយោជន៍ពីការផ្តល់សេវាសង្គម សេវាសេដ្ឋកិច្ចសេវារដ្ឋបាល និងសេវាសាធារណៈប្រកបដោយសមធម៌ ព្រមទាំងជំរុញលើកកម្ពស់តួនាទីក្នុងការចូលរួម និងការទទួលបានសុវត្ថិភាពពីការអនុវត្តគោលនយោបាយភូមិ-ឃុំមានសុវត្ថិភាពដែលមានក្រសួងមហាផ្ទៃជាស្នូលក្នុងការដឹកនាំ និងសម្របសម្រួល ៕
ចែករំលែកព័តមាននេះ