លោក Jack Ma ៖ កីឡាអូឡាំពិកនៅប៉េកាំងនឹងមិនចំណាយប្រាក់ច្រើន
ទីក្រុងប៉េកាំង ៖ លោក Jack Ma មហាសេដ្ឋី និងស្ថាបនិកក្រុមហ៊ុន Alibaba ប្រទេសចិន សង្ឃឹមថា…
ទីក្រុងប៉េកាំង ៖ លោក Jack Ma មហាសេដ្ឋី និងស្ថាបនិកក្រុមហ៊ុន Alibaba ប្រទេសចិន សង្ឃឹមថា ការប្រកួតកីឡាអូឡាំពិកនៅក្រុងប៉េកាំងនាឆ្នាំ២០២២ខាងមុខនេះ នឹងមិនចំណាយអស់ប្រាក់ច្រើនទេ ។
កាលពីខែមករាកន្លងមក ក្រុមហ៊ុនរបស់លោក Ma បានចាប់ផ្តើមកិច្ចសហប្រតិបត្តិការតម្លៃរាប់លានដុល្លារជាមួយគណៈកម្មាធិការអូឡាំពិកអន្តរជាតិរហូតដល់ឆ្នាំ២០២៨ ដើម្បីជំរុញដល់ការប្រកួតកីឡានេះក្នុងជំនាន់ឌីជីថល ។
កិច្ចសហប្រតិបត្តិការនេះពិតជាសំខាន់ណាស់ព្រោះការប្រកួតកីឡាអូឡាំពិករដូវរងាក្នុងឆ្នាំ២០២២ នឹងប្រារព្ធនៅប្រទេសចិន ហើយក្រុមហ៊ុនក្នុងប្រទេសនេះបានឧបត្ថម្ភកម្មវិធីកាន់តែច្រើនផងដែរ ។
Alibaba បានក្លាយជាដៃគូផ្នែកសេវាកម្ម Cloud និង E-commerce របស់ការប្រកួតនេះ ដើម្បីធ្វើទំនើបកម្មគណៈកម្មាធិការខាងលើ, ធ្វើឲ្យកម្មវិធីប្រារព្ធឡើងល្អជាងមុន ព្រមទាំងកាត់បន្ថយការចំណាយច្រើនជាងមុនផងដែរ ។
លោក Ma បាននិយាយកាលពីថ្ងៃសៅរ៍ថា Alibaba នឹងយកបទពិសោធន៍ពីប្រទេសកូរ៉េខាងត្បូង ដើម្បីជួយធ្វើឲ្យការប្រកួតនៅក្រុងតូក្យូ ប្រទេសជប៉ុននៅឆ្នាំ២០២០ ជាពិសេស នៅក្រុងប៉េកាំងនៅឆ្នាំ២០២២ កាន់តែប្រសើរឡើង ។ លោកបន្តថា អ្នកគាំទ្រ និងអ្នកមកប្រកួតអាចទាញយកអត្ថប្រយោជន៍ពីបច្ចេកវិទ្យាជាន់ខ្ពស់ផងដែរ ។
លោកសន្យាថា ៖« យើងចង់ធ្វើឲ្យកីឡាករអាចប្រកួតកាន់តែល្អជាងមុន ដោយជួយដល់ពួកគេក្នុងការប្រកួត និងហ្វឹកហាត់ ។ យើងចង់ឲ្យអ្នកគាំទ្រសិក្សា និងទាក់ទងដោយផ្ទាល់ជាមួយកីឡាករដែលខ្លួនស្រឡាញ់ ហើយមនុស្សកាន់តែច្រើនអាចចូលរួមថែមទៀត ។ ប្រសិនបើនរណាម្នាក់មានគំនិតនេះ បច្ចេកវិទ្យាអាចធ្វើឲ្យវាកើតឡើងបាន » ៕
ចែករំលែកព័តមាននេះ