រាជធានីភ្នំពេញ ៖ គម្រោងផ្លូវល្បឿនលឿនភ្នំពេញ-ខេត្តព្រះសីហនុ ដែលមហាជនទន្ទឹងរង់ចាំ និងចង់ដឹងថា ពេលណាទើបបើកការដ្ឋាន និងចាប់ពីចំណុចណានោះ បើតាមព័ត៌មានបឋមពីមន្ត្រីក្រសួងសាធារណការ និងដឹកជញ្ជូន បានប្រាប់កោះសន្ដិភាពថា…
រាជធានីភ្នំពេញ ៖ គម្រោងផ្លូវល្បឿនលឿនភ្នំពេញ-ខេត្តព្រះសីហនុ ដែលមហាជនទន្ទឹងរង់ចាំ និងចង់ដឹងថា ពេលណាទើបបើកការដ្ឋាន និងចាប់ពីចំណុចណានោះ បើតាមព័ត៌មានបឋមពីមន្ត្រីក្រសួងសាធារណការ និងដឹកជញ្ជូន បានប្រាប់កោះសន្ដិភាពថា គម្រោងនេះ នឹងបើកការដ្ឋានឆាប់ៗ ចេញពីចំណុចភូមិសាស្ត្រទំនប់កប់ស្រូវ ដោយប្រើរយៈពេលសាងសង់ប្រហែល៥ឆ្នាំ ។ ទោះបីយ៉ាងណា ពុំទាន់ដឹងច្បាស់ថា នឹងត្រូវឆ្លងកាត់ចំណុចណាខ្លះ ឬប៉ះពាល់លើអ្វីខ្លះនោះទេ តែរាជរដ្ឋាភិបាលត្រៀមថវិកា១៥០លានដុល្លារសម្រាប់ដោះស្រាយ ។
មន្ត្រីអ្នកនាំពាក្យក្រសួងសាធារណការ និងដឹកជញ្ជូន លោក វ៉ា ស៊ឹមសូរិយា មានប្រសាសន៍ថា ៖« គម្រោងផ្លូវល្បឿនលឿននេះ បើតាមព័ត៌មានបឋមដែលខ្ញុំទទួលបាន គឺយើងអាចចាប់ផ្តើមពីចំណុចទំនប់កប់ស្រូវ ។ និយាយរួម គឺចាប់ផ្តើមពីផ្លូវទំនប់កប់ស្រូវទៅផ្លូវបេតុងរបស់សាលារាជធានីភ្នំពេញ ហើយអាចឆ្លងកាត់តំបន់ភូមិសាស្ត្រទាំងសងខាងនៃផ្លូវចាស់ » ។ ទោះបីជាយ៉ាងនេះក្ដី លោកថា បើចង់ដឹងព័ត៌មានលម្អិត សូមទាក់ទងទៅខាងផ្នែកបច្ចេកទេស ទើបច្បាស់លាស់ ។
អគ្គនាយកបច្ចេកទេសនៃក្រសួងសាធារណការ និងដឹកជញ្ជូន លោក នូ វឌ្ឍនៈ មានប្រសាសន៍ថា គម្រោងផ្លូវល្បឿនលឿននេះមានប្រវែង១៩០,៦៣គីឡូម៉ែត្រ មានទំហំទទឹង២៤ម៉ែត្រ សាងសង់ដោយក្រុមហ៊ុនចិនទម្រង់ BOT ជាផ្លូវ៤គន្លង ក្រាលកៅស៊ូ AC មានសួនច្បារខណ្ឌកណ្តាល មានផ្លូវបំបែកប្តូរទិស មានទីតាំងឈប់សម្រាក មានរបងបាំងសងខាងផ្លូវ និងហេដ្ឋារចនាសម្ព័ន្ធសំណង់សេវាគាំទ្រជាច្រើនទៀត ។
លោកថ្លែងថា ៖« ផ្លូវល្បឿនលឿននេះ នឹងចាប់ផ្តើមនាពេលឆាប់ៗ ប្រើរយៈពេលសាងសង់ប្រហែល៥ឆ្នាំ ។ តាមបណ្តោយផ្លូវនេះ មានស្ពានវែងនិងមធ្យម ចំនួន៥៦កន្លែង, ស្ពានខ្លី៣៣កន្លែង, ស្ពានរំលង ឬផ្លោះផ្លូវ៣២១កន្លែង និងមានកន្លែងឈប់សម្រាកចំនួន៣កន្លែង » ។
លោកបន្តថា ៖« ការដោះស្រាយផលប៉ះពាល់ពីគម្រោងនេះ គឺក្រសួងសេដ្ឋកិច្ច និងហិរញ្ញវត្ថុបានថវិកាពីប្រទេសចិន ។ ចិននឹងផ្តល់ឱ្យយើងសម្រាប់ដោះស្រាយផលប៉ះពាល់នេះប្រមាណ១៥០លានដុល្លារ ប៉ុន្តែទំហំនៃផលប៉ះពាល់និងការដោះស្រាយ មិនទាន់កើតមាននោះទេ ដោយសារមិនទាន់ដឹងថា ខ្សែផ្លូវនេះកាត់ត្រង់ចំណុចណានៅឡើយ » ។
ដោយសារតែគម្រោងនេះជាកិច្ចសន្យាអន្តរជាតិ ដូច្នេះ មានព័ត៌មានខ្លះមិនត្រូវបានអនុញ្ញាតឲ្យផ្សព្វផ្សាយជាសាធារណៈនៅឡើយ និងត្រូវអនុវត្តទៅតាមផែនការច្បាស់លាស់ ។
លោក វ៉ា ស៊ឹមសូរិយា អ្នកនាំពាក្យក្រសួងសាធារណការ និងដឹកជញ្ជូន បានថ្លែងថា ៖ «បើនិយាយពីគម្រោង គឺចាប់ផ្ដើមនៅថ្ងៃណាក៏បានដែរ ប៉ុន្តែយើងនៅដោះស្រាយដីធ្លី ផ្ទះសម្បែងសិន បើឲ្យចាប់ផ្ដើមសាងសង់ដោយមានបុកគ្រឹះផ្សេងៗនៅក្នុងកិច្ចសន្យាអាចថា នៅឆ្នាំក្រោយៗទៀត លឿនឬយឺត គឺអាស្រ័យលើយើងសម្រួលផ្ទះ និងដីធ្លីបានសិន ។ បើយើងធ្វើលឿន គឺឆ្នាំក្រោយចាប់ផ្ដើមសាងសង់ តែបើយឺត គឺ២ឆ្នាំក្រោយៗទៀត ។ អីចឹង ទាល់តែយើងដោះស្រាយបញ្ហានេះរួចរាល់ឲ្យអស់ ទើបខាងក្រុមហ៊ុនគេចាប់ផ្ដើមសាងសង់ » ។
« គម្រោងសាងសង់នេះ ក្រោមការវិនិយោគរបស់ក្រុមហ៊ុនចិន ក្នុងទំហំទឹកប្រាក់ចំណាយរហូតដល់១.៩០០លានដុល្លារ ហើយខ្ញុំមិនអាចបញ្ជាក់បានទេថា ការសាងសង់នោះត្រូវចំណាយពេលអស់ប៉ុន្មានឆ្នាំទើបរួចរាល់ទេ ព្រោះការងារនេះស្ថិតនៅលើក្រុមហ៊ុនទទួលការសាងសង់ ប៉ុន្តែបើតាមបច្ចេកទេសប្រើរយៈពេល៤ឆ្នាំ តែត្រូវទុកពេល២ឆ្នាំសម្រាប់ដោះស្រាយរឿងដីធ្លី និងផ្ទះសម្បែង » ។ នេះបើតាមលោក វ៉ា ស៊ឹមសូរិយា ។
លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងថា ក្រោយសាងសង់រួច ផ្លូវល្បឿនលឿននេះនឹងជួយសម្រួលដល់ការធ្វើដំណើរទៅមកពីរាជធានីភ្នំពេញ-ខេត្តព្រះសីហនុក្នុងរយៈពេលខ្លី និងកាត់បន្ថយហានិភ័យគ្រោះថ្នាក់ចរាចរណ៍ ការកកស្ទះ សម្រួលដល់ការដឹកជញ្ជូនទំនិញ និងធ្វើឱ្យសេដ្ឋកិច្ចជាតិរីកចម្រើនកាន់តែប្រសើរ ។ លើសពីនេះទៀត ព្រះរាជាណាចក្រកម្ពុជា នឹងទទួលបានផលចំណេញមិនអាចកាត់ថ្លៃបានពីការអភិវឌ្ឍច្រករបៀងភ្នំពេញ-ខេត្តព្រះសីហនុ ។
លោក Liu Qi Tao ប្រធានក្រុមប្រឹក្សាភិបាលក្រុមហ៊ុន China Communication Construction Company ដែលជាក្រុមហ៊ុនមេ នៃក្រុមហ៊ុនសាជីវកម្មស្ពានថ្នល់ចិន មានប្រសាសន៍ថា ៖« គម្រោងនេះគឺជាគម្រោងផ្លូវល្បឿនលឿនទី១ ដែលនឹងត្រូវកសាងនៅកម្ពុជាក្នុងពេលឆាប់ៗខាងមុខ ។ ក្នុងនាមជាភាគីប្រតិបត្តិ ក្រុមហ៊ុនលោកនឹងខិតខំប្រឹងប្រែងធ្វើយ៉ាងណា ស្ថាបនាផ្លូវល្បឿនលឿននេះឲ្យបានល្អនិងមានគុណភាព ដើម្បីឲ្យក្លាយជាផ្លូវគំរូសម្រាប់ជាឧត្តមប្រយោជន៍របស់ប្រទេស និងប្រជាជនកម្ពុជា » ។
សម្ដេចតេជោ ហ៊ុន សែន នាយករដ្ឋមន្ត្រី បានថ្លែងបញ្ជាក់កន្លងមកថា ៖« ផ្លូវល្បឿនលឿននេះ គឺមានសារសំខាន់ខ្លាំងណាស់សម្រាប់កម្ពុជា ក្នុងការជំរុញកំណើនសេដ្ឋកិច្ច ពិសេសគឺភ្ជាប់រវាងប៉ូលសេដ្ឋកិច្ចភ្នំពេញ និងខេត្តព្រះសីហនុ »។
ជាមួយគ្នានេះ សម្ដេចតេជោបានជំរុញឲ្យក្រុមហ៊ុនរៀបចំបើកការដ្ឋានស្ថាបនាផ្លូវនេះឲ្យចេញជារូបរាងពិតប្រាកដនាពេលឆាប់ៗខាងមុខ ៕
ចែករំលែកព័តមាននេះ