រាជធានីភ្នំពេញ ៖ រាជរដ្ឋាភិបាលកម្ពុជា បានសម្រេចបង្កើនថវិកា ពី២០០លានរៀល ទៅ៥០០លានរៀល សម្រាប់ជួយដោះស្រាយសេវាផ្លូវច្បាប់ដល់ស្ត្រីដែលរងគ្រោះដោយការរំលោភបំពានផ្សេងៗ ។
ការសម្រេចរបស់ប្រមុខរាជរដ្ឋាភិបាលធ្វើឡើងខណៈ សម្តេចតេជោ អញ្ជើញក្នុងកិច្ចប្រជុំបូកសរុបលទ្ធផលការងារឆ្នាំ២០១៧ និងលើកទិសដៅសម្រាប់ឆ្នាំ២០១៨ របស់ក្រុមប្រឹក្សាជាតិកម្ពុជា ដើម្បីស្ត្រីដែលពិធីនេះធ្វើឡើងនៅវិមានសន្តិភាព រាជធានីភ្នំពេញ នាព្រឹកថ្ងៃទី១២ ខែកុម្ភៈ ឆ្នាំ២០១៨ នេះ ។
កិច្ចប្រជុំនេះរៀបចំឡើងដោយក្រសួងកិច្ចការនារី ដោយមានការចូលរួមពីពីបណ្តាថ្នាក់ដឹកនាំដែលជាស្ត្រីទូទាំងប្រទេស និងបណ្តាដៃគូភាគីពាក់ព័ន្ធនានា ដើម្បីតាមដាន និងត្រួតពិនិត្យរាល់សកម្មភាពការងារ និងការអនុវត្តនូវរាល់អនុសាសន៍លើការងារមួយចំនួនរបស់ក្រុមប្រឹក្សាជាតិកម្ពុជា ដើម្បីស្ត្រីក្នុងការចូលរួមចំណែកជាមួយរាជរដ្ឋាភិបាល ដើម្បីលើកកម្ពស់សិទ្ធិសេរីភាពឋានៈតួនាទី ពិសេសការចូលរួមដោះស្រាយរាល់ការងារជាអាទិភាពនានារបស់ស្ត្រី ។
ក្នុងកិច្ចប្រជុំ សម្តេចតេជោ ហ៊ុន សែន បានសម្ដែងនូវក្តីរីករាយចំពោះកិច្ចប្រជុំប្រចាំឆ្នាំរបស់ក្រុមប្រឹក្សាជាតិកម្ពុជា ដើម្បីស្ត្រីនេះ ដើម្បីធ្វើយ៉ាងណាជំរុញការងារស្ត្រីឲ្យកាន់តែវិវឌ្ឍន៍ទៅមុខទៀត ។ នេះបើតាមការលើកឡើងឡើងតាមរយៈបណ្តាញសង្គមហ្វេសប៊ុករបស់ សម្តេចតេជោ ហ៊ុន សែន ៕
ចែករំលែកព័តមាននេះ