រាជធានីភ្នំពេញ ៖ នាង សូដា នីតា ត្រូវបុរសម្នាក់ដឹកទៅសង្គ្រោះបន្ទាន់នៅមន្ទីរពេទ្យព្រះកុសុមៈ ដោយសារនាងលេបថ្នាំប៉ងធ្វើអត្តឃាត ។ តើមានមូលហេតុអ្វីទៅនីតាធ្វើបែបនោះ ? គ្រូពេទ្យបញ្ជាក់ថា កាលពីថ្ងៃទី១០ កុម្ភៈ សូដា នីតា បានចូលមន្ទីរពេទ្យពិតមែនហើយគ្រូពេទ្យបានលាងសម្អាតក្រពះជួយសង្គ្រោះរួចផុតពីសេចក្តីស្លាប់ ។ក្រុមសាច់ញាតិទម្លាយឱ្យដឹងនៅមន្ទីរពេទ្យថា មូលហេតុដល់ថ្នាក់លេបថ្នាំសម្លាប់ខ្លួនដោយ សារតែសូដានីតាខឹងស្វាមីរបស់នាង ។
ដោយឡែកមិត្តជិតដិតគឺលោក ញ៉ែម សំអូន ប្រាប់ទៅកាន់អ្នកសារព័ត៌មានឱ្យដឹងថា ចំពោះករណីអ្នកនាង សូដា នីតា លេបថ្នាំសម្លាប់ខ្លួននោះមិនមែនជាការណ៍ពិតឡើយ ។ លោក យ៉ែម សំអូន និយាយថា «កញ្ញាសូដា នីតា គ្មានការសម្លាប់ខ្លួននោះទេ ហើយនាងក៏ទើបតែខលមកលោកក៏ភ្ញាក់ផ្អើលពីការលើកឡើងមិនពិតនោះដែរ ដោយនាងកំពុងត្រៀមខ្លួនឡើងច្រៀងនៅក្នុងកម្មវិធីរបស់លោកនោះផង ។ ព័ត៌មានហ្នឹងអត់ពិតទាំងអស់ សូដា នីតា អត់មានអីទេ ហើយគាត់កំពុងស្រឡាំងកាំងថា ហេតុអ្វីបានជាមានព័ត៌មាននោះកើត ឡើងចំពោះគាត់» ។
លោកសំអូនថា«មិនដឹងថាត្រូវធ្វើយ៉ាងណាចំពោះព័ត៌មានបំភ្លើសនោះទេដោយសូដា នីតា អត់មានរឿងអ្វីដូចការភ្ញាក់ផ្អើលនោះទេ» ។ហេតុផលដែលនាំឱ្យមានការភ្ញាក់ផ្អើលឡើងគឺបន្ទាប់ពីមានការបង្ហោះព័ត៌មានថា«កញ្ញាសូដានីដា តូចចិត្តស្អិតទ្រូង គិតខ្លីប្រល័យជីវិតខ្លួនឯងដោយការលេបថ្នាំសម្លាប់ខ្លួន ។ ស្របពេលនោះទូរស័ព្ទរបស់នាងមានគេខលចូលអត់លើក» ។
តាមហ្វេសប៊ុកផ្ទាល់ខ្លួនរបស់សូដានីតាបង្ហោះមុនពេលភ្ញាក់ផ្អើលថា«មនុស្សរស់នៅរាល់ថ្ងៃ ប្រាថ្នាក្តីសុខ ក្តីស្រលាញ់ ក្តីនឹក ពីមនុស្សដែលស្គាល់ មនុស្សខ្ញុំ ខ្ញុំតែងតែឱ្យពេលវេលា ក្តីស្រលាញ់របស់ខ្ញុំទៅអ្នកដទៃគ្រប់ៗគ្នាដែលខ្ញុំស្គាល់,តែគេវិញ គេមិនដែលខ្វល់ខ្វាយពីយើងឡើយ ទោះយើងធ្វើល្អក៏គេមើលរំលងមនុស្សគ្រប់គ្នា គឺគង់នឹងស្លាប់ ចុះពេលនៅរស់មេចក៏មិនធ្វើល្អនឹងគ្នា ? មិនឱ្យសេចក្តីសុខឱ្យគ្នាទៅចាំបាច់អីមានអ្នកស្លាប់ ហើយម្នាក់និយាយថាស្តាយក្រោយ ហើយមកនិយាយថាសុំទោសធ្វើអី ? តើសុំទោសមនុស្សស្លាប់វាបានផលប្រយោជន៍អីទៅ ? តើអ្នកស្លាប់អាចងើបមកលើកលែងទោសឱ្យយើងបានទេ ? មនុស្សយើងរស់នៅកើតទុក្ខច្រើនជាងសុខ ពេលស្លាប់ទៅគឺមានតែបុណ្យនឹងបាប ដែលទៅតាមជាមួយកម្មពៀសូមឱ្យបងប្អូនដែលបានអានហើយ រស់នៅគួរចេះលើកលែងឱ្យគ្នាផង ! ស្រលាញ់បងប្អូនទាំងអស់គ្នា» ។
បន្ថែមពីលើការបញ្ជាក់របស់លោក យ៉ែម សំអូន នោះកញ្ញា សូដា នីតា ក៏បញ្ជាក់ដែរថា នាងមិនមានរឿងដូចអ្វីដែលគេភ្ញាក់ផ្អើលនោះទេគឺនាងមិនបានលេបថ្នាំប៉ងសម្លាប់ខ្លួន ។ កញ្ញា សូដា នីតា បញ្ជាក់ថា«អត់មានរឿងបែបហ្នឹងកើតឡើងចំពោះនាងខ្ញុំនោះទេ» ។ចម្ងល់របស់មហាជនត្រូវបានបកស្រាយដោយសូដា នីតា បញ្ជាក់ប្រាប់ក្នុង Group Chat របស់«សមាគមមិត្តសិល្បៈស្ម័គ្រចិត្តជួយសង្គម»ថានាងមិនបានលេបថ្នាំប៉ងសម្លាប់ខ្លួនទេ ។វាជារឿងយល់ច្រឡំធ្វើឱ្យគ្រួសារនាងផ្ទាល់ក៏ឆោឡោ តក់ស្លុតមិនស្ទើរដែរក្រោយពេលគោះទ្វារបន្ទប់នាងតែនាងមិនបើក ។ តាមពិតមូលហេតុដែលនាងមិនបើកទ្វារនោះ គឺដោយ សារនាងកំពុងសម្ងំខាត់ស្បែក ។
កន្លងមក តាមរយៈរូបថតស្និទ្ធស្នាលគ្នារវាង សូដា នីតា និងលោក យ៉ែម សំអូន ពេលទៅបរទេស ធ្វើឱ្យមានការសង្ស័យថាពួកគេបង្កាត់ភ្លើងស្នេហ៍ជាមួយគ្នា ។ ទោះជាយ៉ាងណាក្តីអ្នកទាំងពីរបានបដិសេធ ដោយថាពួកគេស្និទ្ធស្នាលជាមួយគ្នាក្នុងនាមជាមិត្តរួមអាជីពប៉ុណ្ណោះ ។ គេមិនដែលដឹងទេថា សូដា នីតា មានស្វាមី តែឥឡូវស្រាប់តែសាច់ញាតិថានាងខឹងប្តីទើបលេបថ្នាំសម្លាប់ខ្លួន ។ វាបង្ហាញថាសូដា នីតា មានប្តីហើយ គ្រាន់តែមិនបានបង្ហាញជាសាធារណៈប៉ុណ្ណោះនាពេលកន្លងមក ៕
ចែករំលែកព័តមាននេះ