មនុស្សចាស់នឹងកើនដល់ជាង១,៥លាននាក់ នៅឆ្នាំ២០២៥
- ភ្នំពេញ
រាជធានីភ្នំពេញ ៖ អភិបាលរាជធានីភ្នំពេញ លោក ឃួង ស្រេង បានលើកឡើងថា ចំនួនមនុស្សចាស់ ក្នុងប្រទេសកម្ពុជា នឹងកើនឡើងស្ទើរតែទ្វេដងនៅឆ្នាំ២០២៥…
រាជធានីភ្នំពេញ ៖ អភិបាលរាជធានីភ្នំពេញ លោក ឃួង ស្រេង បានលើកឡើងថា ចំនួនមនុស្សចាស់ ក្នុងប្រទេសកម្ពុជា នឹងកើនឡើងស្ទើរតែទ្វេដងនៅឆ្នាំ២០២៥…
រាជធានីភ្នំពេញ ៖ អភិបាលរាជធានីភ្នំពេញ លោក ឃួង ស្រេង បានលើកឡើងថា ចំនួនមនុស្សចាស់ ក្នុងប្រទេសកម្ពុជា នឹងកើនឡើងស្ទើរតែទ្វេដងនៅឆ្នាំ២០២៥ ប្រមាណជា ១,៥លាននាក់ ហើយនេះ គឺជាសារមួយដ៏មានសារៈសំខាន់ ដែលតម្រូវឲ្យថ្នាក់ដឹកនាំ គ្រប់លំដាប់ថ្នាក់ត្រូវគិតគូរ យកចិត្តទុកដាក់ អំពីយន្តការដើម្បីគាំពារផ្តល់នូវភាពកក់ក្តៅទាំងផ្លូវកាយ និងផ្លូវចិត្តជូនដល់ជនចាស់ជរាទាំងអស់នោះ ចៀសវាងទុកពួកគាត់ឲ្យនៅឯកាគ្មានទីស្នាក់អាស្រ័យ។ លោក ឃួង ស្រេង លើកឡើងបែបនេះកាលពី យប់ថ្ងៃទី១០ ខែកុម្ភៈ ឆ្នាំ២០១៨ នៅសាលាខណ្ឌពោធិ៍សែន ក្នុងឱកាសដែលលោកអញ្ជើញជាអធិបតី ក្នុងពិធីសំណេះសំណាល និងពិសាអាហារសាមគ្គីជួបជុំមនុស្សចាស់អតីតមន្ត្រីរាជការ កងកម្លាំង ចូលនិវត្តន៍ ក្នុងខណ្ឌពោធិ៍សែនជ័យ។ លោកបានបន្តទៀតថា រាជរដ្ឋាភិបាលបានដាក់ឲ្យប្រើប្រាស់ ឯកសារ គោលនយោបាយជាតិស្តីពីមនុស្សវ័យចាស់ ២០១៧-២០៣០ ដែលជាឯកសារដ៏មាន សារៈសំខាន់ សំដៅជួយកសាងសំណាញ់សុវត្ថិភាពមួយ និងអភិវឌ្ឍន៍នូវប្រព័ន្ធគាំពារសង្គម ដល់មនុស្សចាស់នៅក្នុងព្រះរាជាណាចក្រកម្ពុជាប្រកបដោយសង្គតិភាពទៅនឹងស្ថានភាពវិវឌ្ឍន៍នៃសង្គមជាតិ និងបំណងប្រាថ្នាប្រជាជនកម្ពុជា។
ជាក់ស្តែងក្របខណ្ឌរដ្ឋបាលរាជធានីភ្នំពេញ បានបង្កើតឲ្យមាន សមាគមមនុស្សចាស់នៅតាមបណ្តាសង្កាត់ទាំងអស់ ក្នុងរាជធានីភ្នំពេញ ក្នុងនោះមន្ទីរសង្គមកិច្ច អតីតយុទ្ធជន និងយុវនីតិសម្បទារាជធានីភ្នំពេញ គឺសេនាធិការដ៏សំខាន់ក្នុងការងារនេះ។ លោកបន្តថា សម្តេចតេជោ មិនដែលបោះបង់ចោលមនុស្សចាស់ ឬអ្នកចូលនិវត្តន៍ឡើយ មិនមានន័យថាឲ្យតែចូល និវត្តន៍ ត្រូវបានបោះបង់ចោលនោះទេ ពោលគឺមានតែការបន្ថែមការថែទាំតាមរយៈការងារសង្គមនានា ជាច្រើនបន្តបន្ទាប់ ក្នុងនោះអ៊ុំ ពូ មីង អាចធ្វើដំណើរតាមរថយន្តក្រុងរបស់រដ្ឋាករស្វយ័តដឹកជញ្ជូន សាធារណៈ រថយន្តក្រុង នៅរាជធានីភ្នំពេញ ដោយមិនគិតកម្រៃសេវា។ លើសពីនេះទៀត ការជួបជុំប្រារព្ធពិធីនេះ គឺដើម្បីជាការរំលឹកដល់គុណូបក្ការៈចំពោះបងៗមន្ត្រីរាជការអ៊ុំពូមីងទាំងអស់ ដែលធ្លាប់បានចូលរួមចំណែកស្តារ កសាង និងអភិវឌ្ឍន៍រាជធានីភ្នំពេញក្នុងរយៈពេលជាច្រើនឆ្នាំ កន្លងមក។ លោកក៏បានស្នើដល់មន្ទីរ អង្គភាពជំនាញជុំវិញរដ្ឋបាលរាជធានីភ្នំពេញ ដៃគូអភិវឌ្ឍ អង្គការសង្គមស៊ីវិល វិស័យឯកជន និងភាគីពាក់ព័ន្ធទាំងអស់ ពិសេសមន្ត្រីវ័យក្មេង ត្រូវយកចិត្តទុកដាក់ គាំពារថែរក្សា ផ្តល់តម្លៃទំនុកបម្រុង និងលើកទឹកចិត្តចំពោះមនុស្សចាស់ តាមគ្រប់មធ្យោបាយ ដើម្បីភាពសុខដុមរមនារវាងមនុស្សចាស់ និងសង្គមមនុស្សក្មេង ក៏ដូចជារក្សាបាននូវប្រពៃណី ដ៏ល្អផូរផង់របស់បុព្វបុរសយើង ដែលមានវប្បធម៌នៃការគោរព ឱនលំទោនពីមនុស្សក្មេង ទៅកាន់មនុស្សចាស់ និងចាត់ទុកមនុស្សចាស់ជាឧបការីជន ពីមួយជំនាន់ទៅមួយជំនាន់។
លោក ឃួង ស្រេង ក៏បានផ្តាំផ្ញើដល់អាជ្ញាធរខណ្ឌពោធិ៍សែនជ័យ ត្រូវប្រកាន់ខ្ជាប់នូវជំហរជាអ្នកការពារ និងបម្រើប្រជាជនដោយស្មោះត្រង់ តាមរយៈការធានាឲ្យបាននូវសន្តិសុខ សុវត្ថិភាពសង្គម និងសណ្តាប់ធ្នាប់របៀបរៀបរយ ផ្តល់ការអភិវឌ្ឍន៍ និងផ្តល់សេវាសាធារណៈជូនប្រជាពលរដ្ឋក្នុងមូលដ្ឋាន ដោយឈរលើគោលការណ៍អភិបាលកិច្ចល្អ និងត្រូវចូលរួមទប់ស្កាត់ឲ្យបានទាន់ពេលវេលា រាល់ទង្វើអសកម្ម ដែលអាចធ្វើឲ្យប៉ះពាល់ដល់សតិអារម្មណ៍ ឬអាចបង្កឲ្យមានការថ្នាំងថ្នាក់ពីសំណាក់ បងប្អូនប្រជាពលរដ្ឋ ពិសេសត្រូវដោះស្រាយរាល់សំណូមពររបស់បងប្អូនប្រជាពលរដ្ឋ តាមរយៈបណ្តាញ ទូរស័ព្ទ និងតាមបណ្តាញសង្គមហ្វេសប៊ុក ឲ្យបានទាន់ពេលវេលា ដោយមិនគិតពីនិន្នាការនយោបាយ ឡើយ។ សូមបញ្ជាក់ថា ក្នុងឱកាសពិសាអាហារសាមគ្គីនោះ លោក ឃួង ស្រេង បាននាំយកអំណោយ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្តល់ជូនក្នុងម្នាក់ៗ ទទួលបាន១០ម៉ឺនរៀលផងដែរ៕
ចែករំលែកព័តមាននេះ