ខេត្តរតនគិរី ៖ មានករណីគ្រោះថ្នាក់ចរាចរណ៍មួយកើតឡើងដោយសារតែរថយន្ត និងម៉ូតូធ្វើដំណើរបញ្ច្រាសទិសបុកគ្នាពេញទំហឹងបណ្តាលឲ្យស្លាប់ម្នាក់កាលពីវេលាម៉ោង០៦នឹង៥៦នាទីល្ងាច ថ្ងៃទី១០ ខែកុម្ភៈ ឆ្នាំ២០១៨ ស្ថិតក្នុងភូមិកាឡៃ៣ ឃុំកាឡៃ ស្រុកអូរជុំ ។
តាមរបាយការណ៍សមត្ថកិច្ចស្រុក និងខេត្តប្រាប់ឲ្យដឹងថា ជនរងគ្រោះឈ្មោះ ឡាំ ពិកពិន ភេទប្រុស អាយុ២៥ឆ្នាំ ជនជាតិគ្រឹង មុខរបរកសិករ មានប្រពន្ធ និងកូនប្រុសតូចអាយុ៣ឆ្នាំម្នាក់មានទីលំនៅកន្លែងកើតហេតុខាងលើ ។
ជិះម៉ូតូម៉ាកស៊ីរ៉ូស កែច្នៃដឹកឈើ អត់ស្លាកលេខ ទិសដៅពីជើងមកត្បូងមកផ្ទះរបស់ខ្លួនជនរងគ្រោះមានដឹកឈើ៣ដុំផងដែរ រីឯរថយន្តម៉ាកវីហ្គោ ពណ៌ខ្មៅ គ្មានស្លាកលេខ បើកចេញពីទីរួមខេត្តរតនគិរីឆ្ពោះទៅស្រុកវ៉ើនសៃពីត្បូងទៅជើងដល់ចំណុចខាងលើបុកគ្នាពេញទំហឹងតែម្តងពោលគឺបញ្ច្រាសទិសគ្នា ហើយអ្នកបើករថយន្តគេចខ្លួនបាត់ ។
សមត្ថកិច្ចផ្នែកខាងចរាចរណ៍ស្រុកនិងខេត្តបានចុះទៅធ្វើការវាស់វែងលទ្ធផលបញ្ជាក់ថា អ្នកបើកម៉ូតូអត់មានភ្លើង ចំណែករថយន្តបង្កខាងលើបើកមានល្បឿនលឿនទំនងរ៉េចង្កូតមកខាងធ្វេងដៃបណ្តាលឱ្យបុកម៉ូតូចំពីមុខពេញទំហឹងខ្ទេចម៉ូតូតែម្តង ហើយរថយន្តនោះបានអូសម៉ូតូចំនួន២៥ម៉ែត្រ ចំណែកមនុស្សខ្ទាតប្រហែល៥០ម៉ែត្រទៀត ៕
ចែករំលែកព័តមាននេះ