រាជធានីភ្នំពេញ ៖ ផលិតកម្មរ៉ុកបានរៀបចំពិធីសម្ពោធខ្សែភាពយន្តថ្មីក្រោមចំណងជើងថា «កិច្ចសន្យាស្នេហ៍ Tom&Jerry»នៅរោងកុន Major ស្ថិតក្នុងផ្សារទំនើបសូរិយារាជធានីភ្នំពេញដែលជាប្រភេទរឿងស្នេហា ខ្មោច និងកំប្លែង ។
លោកលឹម សុសត្យា ហៅលី ម៉េង តំណាងផលិតកម្មរ៉ុកថ្លែងថារឿង «កិច្ចសន្យាស្នេហ៍Tom&Jerry» បើទោះជារឿងនេះតម្រូវទីផ្សារយុវវ័យមែន ក៏ខាងផលិតកម្មរ៉ុកមិនភ្លេចអ្វីដែលជាសង្គម ។ យើងបានជួយកសាងផ្ទះដល់សហគមន៍ ជួយដល់ជនជាតិភាគតិចដោយថតបញ្ចប់ហើយគឺផ្តល់ជូនពួកគាត់តែម្តង នេះជាទឹកចិត្តមួយ ។ ជាគោលការណ៍ផលិតកម្មរ៉ុកនៅតែប្រឹងប្រែងផលិតរឿងឲ្យល្អហើយនឹងចំណាយទុនឱ្យច្រើន ព្រមទាំងជួយសង្គមផងដែរ» ។
វត្តមានតារាចូលរួមក្នុងពិធីសម្ពោធម កាលពីយប់ថ្ងៃទី៦កុម្ភៈ២០១៨ មានលោកម៉ា ច័ន្ទបញ្ញា និងគូស្នេហ៍កញ្ញាអុីង អុីង លោកលាង ឧត្តម កញ្ញាផាភួង លោកអុឹម ជីវ៉ា កញ្ញាសួង សុីធឿន លោកអុិន សុភិន លោករ៉ូណាន ។ ពិធីនោះរំលេចការសម្តែង ផ្សេងៗ និងរបាំជនជាតិក្រោមការទស្សនាពីមហាជនច្រើនកុះករ ។
លោកប៉ុក បូរក្ស ប្រធាននាយដ្ឋានភាពយន្តបានថ្លែងថា កន្លងមកផលិតកម្មរ៉ុកតែងតែយកចិត្តទុកដាក់ក្នុងការបង្ហាញស្នាដៃថ្មីដើម្បីឲ្យមានគុណភាព ។ ចំពោះរឿងថ្មីនេះពិតជាជួយផ្តល់សំណើចដល់មហាជន ហើយនិងជួយលើកតម្កើងការទាក់ទាញវិស័យទេសចរណ៍ផងដែរនៅតំបន់ភាគឦសាន ។
តារាចម្រៀងកញ្ញាអុីង អុីងលើកឡើងថា នាងជាមនុស្សម្នាក់ដែលខ្លាចខ្មោចខ្លាំង និងមិនហ៊ានសម្ដែងរឿងខ្មោចឡើយ ។ ពេលដែលទទួលសាច់រឿងនេះដំបូង នាងពិតជាមិនដឹងថាមានឈុតឆាកខ្មោចសោះ ហើយរឿងនេះបែរជាតម្រូវឲ្យនាងសម្ដែងជាតួខ្មោចទៅវិញ ។ ក្រោយពិនិត្យសាច់រឿង ឃើញថាមានខ្មោចត្រឹមតែប្រមាណ៣០ភាគរយ ដោយជំនួសវិញដោយភាពកំប្លុកកំប្លែង និងស្នេហា ទើបនាងគិតថាមិនមានបញ្ហា ៕
ចែករំលែកព័តមាននេះ