ក្រុងប៉ោយប៉ែត ៖ បុរសស្ត្រី២នាក់ត្រូវប៉ូលិសក្រុងប៉ោយប៉ែតឃាត់ខ្លួនកាលពីវេលាម៉ោង៩ព្រឹក ថ្ងៃទី២២ មីនា នៅចំណតរថយន្តតូចមួយដែលទើបបង្កើតថ្មីក្នុងភូមិក្បាលស្ពាន សង្កាត់ប៉ោយប៉ែត ក្រុងប៉ោយប៉ែត ខណៈពួកគេដើរលក់ស៊ឹមទូរស័ព្ទពុំយកអត្តសញ្ញាណប័ណ្ណ ដែលសកម្មភាពនេះអាចឱ្យអ្នកទិញយកទៅប្រើប្រាស់ដោយខុសច្បាប់។
បុរសស្ត្រីដែលសមត្ថកិច្ចឃាត់ខ្លួននោះឈ្មោះអ៊ុំ ណា ភេទប្រុស អាយុ៤៧ឆ្នាំ និងម្នាក់ទៀតឈ្មោះម៉ាត់ រ៉ូអ៊ី អាយុ៤០ឆ្នាំ ប្រកបរបរដើរដូរលុយ និងលក់ស៊ឹមទូរស័ព្ទនៅរង្វង់មូលច្រកទ្វារអន្តរជាតិប៉ោយប៉ែត។ មន្ត្រីប៉ូលិសក្រុងប៉ោយប៉ែតឱ្យដឹងថា ដោយសារមានសេចក្តីរាយការណ៍ថា ជនទាំង២នោះដើរលក់ស៊ឹមទូរស័ព្ទមិនយកអត្តសញ្ញាណប័ណ្ណទើបសមត្ថកិច្ចឃាត់ខ្លួនតែម្តង។ សមត្ថកិច្ចឆែកឆេរក្នុងខ្លួនពួកគេឃើញសុទ្ធតែស៊ឹមទូរស័ព្ទប្រព័ន្ធ ០១២ និង០៩៧ ហើយពេលសួរនាំពួកគេប្រាប់ថា ស៊ឹមមួយចំនួនត្រូវគេយកមកដាក់ឱ្យលក់។
ឈ្មោះម៉ាត់ រ៉ូអ៊ី ប្រាប់ថា រូបគេពុំមានអត្តសញ្ញាណប័ណ្ណដូច្នេះហើយយកអត្តសញ្ញាណប័ណ្ណរបស់ឪពុកទៅទិញស៊ឹមពីក្រុមហ៊ុនម្តង១០ទៅ២០ស៊ឹមសំរាប់លក់បន្តយកចំណេញ តែមិនបានគិតពីផលប៉ះពាល់ដែលអ្នកទិញយកទៅប្រើខុសច្បាប់នោះទេ។ ផ្អែកលើការសួរនាំពួកគេទាំងពីរប្រាប់ថា ក្នុងស៊ឹម១គឺលក់ពីតម្លៃ៨ពាន់រៀលទៅ១ម៉ឺនរៀល។
លោកអនុសេនីយ៍ឯកអ៊ុំ សុផល អធិការនគរបាលក្រុងប៉ោយប៉ែតប្រាប់កោះសនិ្តភាពតាមទូរស័ព្ទថា ការឃាត់ខ្លួនបុរសស្ត្រីទាំង២នោះ គឺគ្រាន់តែនាំទៅអប់រំឱ្យឈប់លក់ស៊ឹមបែបអនាធិបតេយ្យតទៅទៀតប៉ុណ្ណោះ ហើយឱ្យពួកគេវិលទៅផ្ទះវិញ។ ការលក់ស៊ឹមមិនយកអត្តសញ្ញាណប័ណ្ណ គឺជនល្មើសនឹងទិញយកទៅប្រើសំរាប់គំរាមជនស្លូតត្រង់ ឬជំរិតទារប្រាក់ ហើយសមត្ថកិច្ចពិបាកស្រាវជ្រាវរកមុខសញ្ញាណាស់ ៕
ចែករំលែកព័តមាននេះ