រាជធានីភ្នំពេញ ៖ មន្ត្រីជាន់ខ្ពស់ប្រទេសចិនបានបង្ហាញចេតនាចង់ឲ្យកម្ពុជាប្រើប្រាស់ប្រាក់យន់ក្នុងការទូទាត់សកម្មភាពពាណិជ្ជកម្មជាមួយចិន ប៉ុន្តែសេដ្ឋវិទូនានាលើកឡើងថា វានឹងបង្កការលំបាកច្រើន ប្រសិនជាមានការប្រើប្រាស់រូបិយប័ណ្ណចម្រុះបែបនេះ ។
ក្នុងជំនួបជាមួយរដ្ឋមន្ត្រីពាណិជ្ជកម្មកម្ពុជា លោក ប៉ាន សូរស័ក្តិ កាលពីព្រឹកថ្ងៃទី៥ កុម្ភៈ លោក អ៊ៅយ៉ាង វ៉ីមីង អភិបាលរងខេត្តក្វាងទុង នៃសាធារណរដ្ឋប្រជាមានិតចិន បានថ្លែងថា ខេត្តក្វាងទុងនឹងបង្កើតមជ្ឈមណ្ឌលពាណិជ្ជកម្មមួយដាក់តាំងផលិតផលមកពីអាស៊ីអាគ្នេយ៍ ក្នុងនោះក៏មានផលិតផលមកពីកម្ពុជាដែរសម្រាប់ប្រជាជនចូលទស្សនា និងឈ្វេងយល់ថា ប្រទេសកម្ពុជាមានផលិតផលអ្វីខ្លះ និងមានតម្លៃយ៉ាងណា ។ ធ្វើយ៉ាងនេះ ទំនិញពីកម្ពុជា នឹងត្រូវបានផ្សព្វផ្សាយកាន់តែទូលំទូលាយនៅប្រទេសចិន ។
លោកបន្តថា ៖« ចិនមានគោលនយោបាយធ្វើពាណិជ្ជកម្មជាប្រាក់យន់ចិន ជាជាងប្រាក់ដុល្លារអាមេរិក ។ ដូចនេះ ខ្ញុំស្នើឲ្យកម្ពុជាជួយគាំទ្រ និងធ្វើពាណិជ្ជកម្មជាមួយប្រទេសចិនជាប្រាក់យន់ ដើម្បីរក្សាស្ថិរភាពសេដ្ឋកិច្ចក្នុងតំបន់ » ។ សំណើនេះមិនទាន់មានការឆ្លើយតបបែបណាពីរដ្ឋមន្ត្រីពាណិជ្ជកម្មកម្ពុជានៅឡើយទេ ប៉ុន្តែសេដ្ឋវិទូកម្ពុជាបានលើកឡើងស្រដៀងគ្នាថា ការប្រើប្រាស់លុយយន់ នឹងមានផលវិបាកកាន់តែខ្លាំងក្នុងសេដ្ឋកិច្ចកម្ពុជា ។
លោក ង៉ែត ជូ ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Market Consulting បានថ្លែងថា ប្រសិនជាកម្ពុជាប្រើប្រាស់លុយយន់ក្នុងការទូទាត់ពាណិជ្ជ កម្មបន្ថែមទៀត វានឹងធ្វើឲ្យកាន់តែស្មុគស្មាញ ក្នុងការគ្រប់គ្រងរូបិយប័ណ្ណ បើទោះជាការចរាចរប្រាក់យន់មិនលំបាកក្តី ប៉ុន្តែការរៀបចំគោលនយោបាយដើម្បីគ្រប់គ្រងប្រាក់យន់ក្នុងម៉ាក្រូសេដ្ឋកិច្ច ពិតជាលំបាក ។ លោកបន្តថា បច្ចុប្បន្ន ចិនបានវិនិយោគ និងធ្វើពាណិជ្ជកម្មជាមួយកម្ពុជាច្រើន ដែលជំរុញឲ្យធ្វើការទូទាត់ប្រាក់យន់បានលឿន ប៉ុន្តែប្រទេសមួយប្រើប្រាស់រូបិយប័ណ្ណចម្រុះបែបនេះ វានឹងជារឿងលំបាកស្មុគស្មាញមួយ ។
លោកបន្តថា ៖« ភាពស្មុគស្មាញនឹងចៀសមិនផុត តែវាក៏ផ្តល់ភាពវិជ្ជមានច្រើនដែរ ។ រឿងអវិជ្ជមាន គឺធ្វើឲ្យគោលនយោបាយជំរុញការប្រើប្រាស់ប្រាក់រៀល ដែលជារូបិយប័ណ្ណជាតិកាន់តែលំបាក » ។
អ្នកស្រាវជ្រាវសេដ្ឋកិច្ចនៅរាជបណ្ឌិត្យសភាកម្ពុជា លោកបណ្ឌិត ហុង វណ្ណៈ បានថ្លែង ស្រដៀងគ្នាថា ក្នុងការទូទាត់ពាណិជ្ជកម្ម តែងតែមានការទូទាត់លុយចម្រុះ ប៉ុន្តែកម្ពុជាមានលុយរបស់ខ្លួនឯង ។ បើយើងយកលុយរបស់គេចូលវានឹងមានផលប៉ះពាល់ ព្រោះលុយដូចជាទំនិញមួយ ។ ដូច្នេះ បើបើកឲ្យចរាចរណ៍ វានឹងមានស្ថិរភាពជាងលុយរបស់យើង ហើយនៅពេលយើងប្រើលុយរបស់គេយូរៗទៅ វានឹងធ្វើឲ្យលុយរៀលរបស់យើងកាន់តែអស់តម្លៃ ។
លោកបន្តថា ៖« លុយរៀលជាអត្តសញ្ញាណជាតិ អត្តសញ្ញាណជាតិសំខាន់ណាស់ បើយើងបណ្តែតបណ្តោយ វានឹងមានបញ្ហា ហេតុនេះយោបល់ផ្ទាល់ខ្លួនរបស់ខ្ញុំថា «កុំ» ។ លោកបន្តថា ៖« បច្ចុប្បន្ន មានការចរាចរលុយយន់នៅជុំវិញផ្សារអូឡាំពិករួចទៅហើយ ដោយមិនបានឆ្លងកាត់ធនាគារឡើយ ដែលធ្វើឲ្យរដ្ឋាភិបាលខាតបង់ ហេតុនេះ ការរឹតបន្តឹងជាការប្រសើរណាស់ » ។
ជាមួយគ្នានេះ ធនាគារជាតិនៃកម្ពុជាបាននិងកំពុងជំរុញការប្រើប្រាស់លុយរៀលនៅក្នុងការទូទាត់ពាណិជ្ជកម្មរបស់ខ្លួនផងដែរ តាមរយៈការដាក់ចេញនូវគោលនយោបាយជាច្រើន ដើម្បីលើកកម្ពស់រូបិយប័ណ្ណ ដែលជាអត្តសញ្ញាណជាតិរបស់ខ្លួន ។
ទោះជាយ៉ាងណា លោក អុិន ចាន់នី ប្រធាននាយកប្រតិបត្តិធនាគារអេស៊ីលីដា ភីអិលស៊ីមានសុទិដ្ឋិនិយមជាងនេះ ដោយលោកថ្លែងថា នៅក្នុងគោលការណ៍ទីផ្សារសេរី វាអាស្រ័យលើតម្រូវការ និងការផ្គត់ផ្គង់ ។ នៅពេលមានតម្រូវការ ការផ្គត់ផ្គង់នឹងកើតមាន ហើយច្បាប់របស់ធនាគារជាតិនៃកម្ពុជា ក៏មិនបានហាមឃាត់ចំពោះការចរាចរប្រាក់យន់ក្នុងទីផ្សារដែរ ។
លោកបន្តថា វិនិយោគិនចិនបានបោះទុនវិនិយោគជាច្រើននៅកម្ពុជា ជាពិសេស វិស័យរោងចក្រ សហគ្រាសនានា និងវិស័យលំនៅដ្ឋាននាពេលបច្ចុប្បន្ននេះ ហើយពេលពួកគេនាំចេញ គឺនាំចេញទៅអាមេរិក ក៏មានការយកត្រឡប់នូវប្រាក់ដុល្លារ ហេតុនេះ អ្វីៗវាស្ថិតនៅលើតម្រូវការ និងការផ្គត់ផ្គង់ ។
លោកថ្លែងថា ៖« ការទូទាត់ប្រាក់យន់ វានឹងមិនធ្វើឲ្យបាត់លុយរៀលរបស់យើងទេ ព្រោះការទូទាត់ប្រាក់យន់ វាស្ថិតនៅក្នុងក្របខ័ណ្ឌជញ្ជីងពាណិជ្ជកម្មយើងប៉ុណ្ណោះ » ៕
ចែករំលែកព័តមាននេះ