សហរដ្ឋអាមេរិក ៖ សេតវិមានថ្លែងកាលពីថ្ងៃទី៦ កុម្ភៈ ថា ប្រធានាធិបតីអាមេរិក លោកដូណាល់ ត្រាំ ចង់បង្កើតព្យុហយាត្រាយោធា ដើម្បីបង្ហាញពីកម្លាំងយោធាអាមេរិកដោយលោកគូសបញ្ជាក់ពីតួនាទីលោកជាអគ្គមេបញ្ជាការ ។
អ្នកនាំពាក្យសេតវិមានលោកស្រី SARAH SANDERS ថ្លែងថា ប្រធានាធិបតីពិតជាសម្តែងសាមគ្គីភាពពេញលេញចំពោះកងយោធាដែលជីវិតពួកគេជួបគ្រោះថ្នាក់រាល់ថ្ងៃដើម្បីធានាសន្តិសុខរបស់ប្រទេសយើង ។ លោកស្នើដល់ក្រសួងការពារប្រទេសឱ្យសិក្សាពីការបង្កើតពិធីមួយដោយនាឱកាសនោះពលរដ្ឋអាេមរិកទាំងអស់អាចសម្តែងការដឹងគុណដល់ពួកគេ ។ ចំណែកមន្ទីរប៉ង់តាហ្គោនអះអាងថា ខ្លួនកំពុងតែដោះស្រាយបណ្តាចំណុចឱ្យបានច្បាស់ ។
លោកត្រាំ ធ្លាប់លើករួចហើយពីគំនិតចង់ឱ្យមានព្យុហយាត្រាយោធាមួយនៅក្រុងវ៉ាស៊ីនតោន កាលមុនពេលលោកជាប់ឆ្នោត ហើយលោកពោលថា លោកចាប់អារម្មណ៍ខ្លាំងបំផុតចំពោះព្យុហយាត្រាយោធាបារាំងកាលពីថ្ងៃទី១៤ កក្កដា ពេលលោកទៅបំពេញទស្សនកិច្ចនៅប្រទេសនេះ ដែលប្រធានាធិបតីបារាំង លោក EMMANUEL MACRON ទទួលលោកយ៉ាងកក់ក្តៅបំផុត ។
ទោះបីយ៉ាងណា គំនិតនេះរបស់លោកត្រាំ នាំឱ្យពួកប្រឆាំងលោករិះគន់យ៉ាងខ្លាំង ដោយពួកនេះប្រៀបប្រដូចឥរិយាបថនេះរបស់លោកទៅនឹងឥរិយារបស់មេដឹកនាំនៃរបបផ្តាច់ការមួយរូប ៕
ចែករំលែកព័តមាននេះ