ខេត្តសៀមរាប ៖ កម្លាំងការិយាល័យនគរបាលអន្តោប្រវេសន៍ខេត្តសហការជាមួយផ្នែកគ្រប់គ្រងជនបរទេសក្រុង និងប៉ុស្តិ៍នគរបាលរដ្ឋបាលសង្កាត់ស្វាយដង្គំ និងធ្វើការឃាត់ខ្លួនបានជនសង្ស័យ(ជនជាតិកូរ៉េ)ចំនួន៥នាក់ រួចនាំយកមកសួរនៅស្នងការនគរបាលខេត្ត ។ ក្នុងប្រតិបត្តិការបង្ក្រាបករណីល្បែងស៊ីសងតាមប្រព័ន្ធអ៊ិនធឺណេត នោះបានធ្វើឡើងនៅវេលាម៉ោង១៤និង៣០នាទីរសៀលថ្ងៃទី០៦ ខែកុម្ភៈ ឆ្នាំ២០១៨ ស្ថិតនៅក្នុងផ្ទះវីឡា ចំនួន ០២ទីតាំង ក្នុងភូមិសាលាកន្សែង សង្កាត់ ស្វាយដង្គំ ក្រុង-ខេត្ត សៀមរាប ។
តាមប្រភពពីមន្ត្រីនគរបាលអន្តោប្រវេសន៍ខេត្តបានប្រាប់នាព្រឹកថ្ងៃទី០៨ ខែកុម្ភៈ ឆ្នាំ២០១៨ នេះថា ដោយមានការសហការជាមួយផ្នែកគ្រប់គ្រងជនបរទេសក្រុង និងប៉ុស្តិ៍នគរបាលរដ្ឋបាលសង្កាត់ស្វាយដង្គំ ដឹកនាំសម្របសម្រួលនីតិវិធី ដោយលោក រៀម ចន្ទម្នី និងលោក ជួន សុ បញ្ញា ព្រះរាជអាជ្ញារង អមសាលាដំបូងខេត្តសៀមរាប ចុះបង្ក្រាបទីតាំង លួចបើកភ្នាល់ល្បែងស៊ីសងខុសច្បាប់តាមប្រព័ន្ធអ៊ិនធឺណិត រួចឈានដល់ធ្វើការឃាត់ខ្លួនបានជនសង្ស័យ(ជនជាតិកូរ៉េ)ចំនួន៥នាក់ និងវត្ថុតាង រួចនាំយកមកសួរ នៅស្នងការនគរបាលខេត្ត ដើម្បីរៀបចំកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ ។
ប្រភពបានបញ្ជាក់ថា ជនបរទេសទាំង០៥នាក់ មានឈ្មោះទី១- ឈ្មោះ LEE KIHO ជនជាតិកូរ៉េ កាន់លិខិតឆ្លងដែនលេខM៦៩៩០១០៥៤ ទី២-ឈ្មោះ JUNG HWAYOUNG ជនជាតិកូរ៉េ កាន់លិខិតឆ្លងដែនលេខM៤៦៧៧១៤៥៥ ទី៣-ឈ្មោះ CHA SUNGHWAN ជនជាតិកូរ៉េ កាន់លិខិតឆ្លងដែនលេខM៧៤០១៤៦១៥ ទី៤-ឈ្មោះ LEE SUYONG ជនជាតិកូរ៉េ កាន់លិខិតឆ្លងដែនលេខM ៨៥៣២៧០៤៨ និងទី៥-ឈ្មោះ JEONG WONTAE ជនជាតិកូរ៉េ កាន់លិខិតឆ្លងដែនលេខM៧៩៦៧៧៩០៣ ដែលអ្នកទាំង០៥នាក់ជាប្រុសទាំងអស់ ។
បច្ចុប្បន្នជនសង្ស័យទាំង៥នាក់ (ជនជាតិកូរ៉េ) និងវត្ថុតាង ត្រូវបានលោក កើត វណ្ណារ៉េត ព្រះរាជអាជ្ញា សម្រេចឱ្យឃាត់ខ្លួន បណ្តោះអាសន្ន នៅស្នងការដ្ឋាននគរបាលខេត្តសៀមរាប ដើម្បីរៀបចំកសាងសំណុំរឿងបញ្ជូនទៅសាលាដំបូងខេត្ត នៅរសៀលថ្ងៃទី០៨ ខែកុម្ភៈ ឆ្នាំ២០១៨ ចាត់ការបន្តទៅតាមនីតិវិធីច្បាប់ ៕
ចែករំលែកព័តមាននេះ