ខេត្តកំពត-កែប ៖ ដើម្បីការពារសុខមាលប្រជាពលរដ្ឋដែលងាយរងគ្រោះ ដោយសារតែមិនបានប្រុងប្រយ័ត្ននូវការប្រើប្រាស់ហូបចុកគ្រឿងអាហារគ្រប់ប្រភេទដែលផលិត និងនាំចូលពីប្រទេសជិតខាងផង និងផលិតក្នុងស្រុកផងមិនបានត្រឹមត្រូវតាមស្តង់ដាបច្ចេកទេស ទើបនៅថ្ងៃទី០៥ ខែកុម្ភះ ឆ្នាំ២០១៨ មន្ត្រីសាខាកាំកុងត្រូល ចុះពិនិត្យនៅខេត្តកែប ក្នុងផ្សារ ក្តាមនិងតាមតំបន់ឆ្នេរ ។
លោក ពា សារី អនុប្រធានសាខាកាំកុងត្រូលកំពត-ខេត្តកែប បានប្រាប់អ្នកយកព័ត៌មានថា ថ្ងៃបុណ្យចូលឆ្នាំប្រពៃណីចិន វៀតណាម ជិតឈានចូលមកដល់ហើយ ដូច្នេះប្រជាពលរដ្ឋយើងមិនថា អ្នកជាប់ខ្សែស្រឡាយចិន វៀតណាម ឬខ្មែរនោះទេបងប្អូនបានត្រៀមរៀបចំជាស្រេច ដើម្បីទិញគ្រឿងចំណីអាហារនំកញ្ចប់ ភេសជ្ជៈ គ្រប់មុខសម្រាប់ធ្វើពិធីសែនព្រេនជីដូនជីតាម៉ាកុង និងទទួលទេវតាឆ្នាំថ្មីតាមប្រពៃណីរបស់បងប្អូន ។
លោកបានបន្តទៀតថា ដើម្បីជួយទប់ ស្កាត់ និងការពារសុខភាពជូនប្រពលរដ្ឋយើងនូវការរងគ្រោះដោយការប្រើប្រាស់ហូបចុកនូវចំណីអាហារ ដែលមានផ្ទុកដោយសារធាតុគីមី(បូរ៉ាក់)ដែលច្បាប់ហាមឃាត់ និងរាល់មុខទំនិញជាគ្រឿងឧបភោគបរិភោគមួយចំនួនហួសកាលបរិច្ឆេទ និងខូចគុណភាពដែលបងប្អូនហូបទៅអាចប៉ះពាល់នូវជំងឺច្រើនមុខដូចជា ខ្សោយគ្រលៀន, កើតមហារីក, ជម្ងឺបេះដូង ជាដើម ។ ក្នុងរយៈពេលពីរថ្ងៃនេះ លោកបានដឹកនាំមន្ត្រីកាំកុង ត្រូលសាខាកំពត-កែបដោយសហការជាមួយមន្ទីរពាណិជ្ជកម្មនៃខេត្តទាំងពីរ ។
លោកបានបន្តឲ្យដឹងទៀតថា នៅថ្ងៃទី០៦ ខែកុម្ភៈនេះ លោកបានដឹកនាំកម្លាំងមន្ត្រី សាខាកាំកុងត្រូលចុះពិនិត្យនៅតាមម៉ាត និងតាមផ្ទះ ដេប៉ូ នៅជុំវិញផ្សារសាមគ្គីទីរួមខេត្តកំពត ។ ការចុះពិនិត្យទាំងពីរខេត្តនេះរយៈពេលពីរថ្ងៃ ជាលទ្ធផលសមត្ថកិច្ចកាំកុងត្រូលយើងបានរកឃើញ គ្រឿងឧបភោគបរិភោគជានំកញ្ចប់ភេសជ្ជៈជាដប និងជាកំប៉ុង ដែលហួសកាលបរិច្ឆេទ និងផ្ទុកសារធាតុគីមី ដែលច្បាប់ហាមឃាត់ ។
មានចំនួន២០មុខ ហើយត្រូវដកហូត ដើម្បីយកទៅធ្វើពិធីដុតកម្ទេចចចោល ដែលហួសកាលបរិច្ឆេទ និងមានបបែលក្រៀម ផ្ទុកសារធាតុគីមីដែលច្បាប់ហាមឃាត់ (Borak) សរុបទាំងអស់ចំនួន២០មុខ ៕
ចែករំលែកព័តមាននេះ