ខេត្តឧត្តរមានជ័យ ៖ រូបចម្លាក់យោធា២នាក់ស្ពាយកាំភ្លើងAKរួមជាមួយរូបនារីទូលចម្រូង២នាក់ដែលមហាជនហៅថា«រូបចម្លាក់តាម៉ុក» ស្ថិតនៅចំកណ្តាលផ្លូវជាតិលេខ៦៧B នោះ មហាជនក្នុងខេត្តឧត្តរមានជ័យ ព្រមទាំងអ្នកដំណើរពីទីជិតទីឆ្ងាយតែងតែគោរពបន់ស្រន់សុំសេចក្តីសុខសប្បាយ និងទៅតាមការចង់បានរបស់ខ្លួន ។ អ្នកភូមិជើងភ្នំជាអតីតខ្មែរក្រហមដែលផ្តាច់ខ្លួនចូលជាមួយរាជរដ្ឋាភិបាលក្នុងអំឡុងឆ្នាំ១៩៩៨…
ខេត្តឧត្តរមានជ័យ ៖ រូបចម្លាក់យោធា២នាក់ស្ពាយកាំភ្លើងAKរួមជាមួយរូបនារីទូលចម្រូង២នាក់ដែលមហាជនហៅថា«រូបចម្លាក់តាម៉ុក» ស្ថិតនៅចំកណ្តាលផ្លូវជាតិលេខ៦៧B នោះ មហាជនក្នុងខេត្តឧត្តរមានជ័យ ព្រមទាំងអ្នកដំណើរពីទីជិតទីឆ្ងាយតែងតែគោរពបន់ស្រន់សុំសេចក្តីសុខសប្បាយ និងទៅតាមការចង់បានរបស់ខ្លួន ។
អ្នកភូមិជើងភ្នំជាអតីតខ្មែរក្រហមដែលផ្តាច់ខ្លួនចូលជាមួយរាជរដ្ឋាភិបាលក្នុងអំឡុងឆ្នាំ១៩៩៨ ឱ្យដឹងកាលពីពេល ថ្មីៗកន្លងមកថា រូបចម្លាក់យោធា និងរូបនារីនៅលើផ្ទាំងថ្មដ៏ធំមួយនោះ គឺតាម៉ុកឱ្យយោធាដែលមានជំនាញខាងឆ្លាក់រូបឆ្លាក់នៅក្នុងអំឡុងឆ្នាំ១៩៩៧ ។ ក្រោយពីបានធ្វើសមាហរណកម្មក្នុងឆ្នាំ១៩៩៨មក គ្រួសារមួយមានកូនឈឺក៏ទៅរកគ្រូទស្សន៍ទាយ ហើយគ្រូទាយថា មានបារមីសក្តិសិទ្ធិនៅលើចង្កេះភ្នំដងរែក ដូច្នេះត្រូវតែយកចេក ឬមាន់ស្ងោរទៅថ្វាយទើបជាសះស្បើយ ។ ក្រោយៗមកទៀតមានពលរដ្ឋជាច្រើនបានទៅបែបន់ក៏សក្តិសិទ្ធិមែនទើបប្រជាពលរដ្ឋមានជំនឿតគ្នារហូតដល់សព្វថ្ងៃនេះ ។
ស្ត្រីឈ្មោះគង់ លាត អាយុជាង៥០ឆ្នាំ ជាអ្នកបោសសំអាត និងថែរក្សានៅទីនោះបានរៀបរាប់ថា កាលពីមុនមានរូបចម្លាក់យោធា២នាក់ស្ពាយកាំភ្លើង និងរូបចម្លាក់នារី២នាក់ឈរទូលចម្រូងមានទ្រង់ទ្រាយល្អណាស់ តែឥឡូវ បាក់បែកស្ទើរទាំងស្រុង ។ ដូច្នេះហើយ ថ្មីៗកន្លងមកអ្នកដែលជំនឿបានយករូបលោកយាយម៉ៅ និងរូបលោកតាកែវរស្មី ទៅដាក់នៅទីនោះដើម្បីគោរពបន់ស្រន់ ។ អ្នកភូមិ ព្រមទាំងអ្នកដែលធ្វើដំណើរពីទីជិតឆ្ងាយតែងតែឈប់រថយន្ត ឬម៉ូតូ មាននំចំណី ចេក មាន់ ជ្រូកថ្វាយដល់លោកយាយម៉ៅ និងលោកតាកែវរស្មីសុំសេចក្តីសុខសប្បាយ ។ នៅក្នុងខេត្តឧត្តរមានជ័យមានតែរូបចម្លាក់តាម៉ុកនោះទេដែលមហាជនមានជំនឿលើបារមីហើយបន់ស្រន់ ជាពិសេសគូស្នេហ៍តែងតែទៅស្បថស្បែជាមួយគ្នា ៕
ចែករំលែកព័តមាននេះ