ខេត្តកំពង់ឆ្នាំង ៖ លោកយាយ អាយុ៩០ឆ្នាំម្នាក់ បានរត់ផុតជីវិតទាំងព្រលឹងចុងសក់ ខណៈដែលកំពុងសម្រាន្តលង់លក់ ស្រាប់តែអគ្គីភ័យ បានឆាបឆេះផ្ទះលោកយាយយ៉ាងសន្ធោសន្ធៅ។ ហេតុការណ៍ដ៏ភ្ញាក់ផ្អើលនេះបានកើតឡើង នៅវេលាម៉ោង១០ និង៣០នាទីព្រឹក ថ្ងៃទី០៦ ខែកុម្ភៈ ឆ្នាំ២០១៨ នៅភូមិទ្រាជើង ឃុំស្រែថ្មី ស្រុករលាប្អៀរ។ សមត្ថកិច្ចនគរបាលបានទៅពិនិត្យកន្លែងកើតហេតុ បានឲ្យដឹងថា លោកយាយរងគ្រោះមានឈ្មោះ ជា សាត អាយុ៩០ឆ្នាំ មានទីលំនៅភូមិឃុំកើតហេតុខាងលើ។
លោកយាយរស់នៅតែម្នាក់ឯង លើផ្ទះដែលមានទំហំ៤គុណនឹង៦ម៉ែត្រ ធ្វើពីឈើប្រក់ស្លឹក និងបាំងជញ្ជាំងស្លឹក ក្រាលរនាឫស្សី។ លោកយាយមានកូនក្មួយរស់នៅជិតខាង ជាអ្នកបីបាច់ថែររក្សា ដោយផ្តល់បាយម្ហូបគ្រប់ពេលវេលា។ នៅថ្ងៃកើតហេតុ លោកយាយកំពុងសម្រាន្តលង់លក់ក្រោមផ្ទះ ដោយពុំដឹងថា មានភ្លើងឆេះផ្ទះទេ។ អ្នកជិតខាងបានប្រាប់សមត្ថកិច្ចថា អណ្តាតភ្លើងបានឆេះយ៉ាងសន្ធោសន្ធៅ តែលោកយាយសម្រាន្ត លក់មិនដឹងខ្លួន ពេលនោះបានអ្នកជិតខាងស្ទុះទៅចាប់លើកលោកយាយចេញពីក្រោមផ្ទះ ហើយបាននាំគ្នាជួយពន្លត់ អគ្គីភ័យ។
ជាមួយគ្នានោះដែរ រថយន្តពន្លត់អគ្គីភ័យ២គ្រឿងបានទៅជួយអន្តរាគមន៍បាញ់ពន្លត់ តែអគ្គីភ័យបានឆាប់ឆេះ ផ្ទះលោកយាយអស់ទៅហើយ សល់តែគ្រោងផ្ទះតែប៉ុណ្ណោះ។ សមត្ថកិច្ចបានបញ្ជាក់ពីមូលហេតុថា បណ្តាលមកពីចៅៗ លោកយាយលេងភ្លើងទើបបណ្តាលឲ្យមានការឆាបឆេះបែបនេះ។ ចំពោះការខូចខាត មានផ្ទះមួយខ្នងទំហំ៤គុណ៦ម៉ែត្រ ប្រាក់លោកយាយ២៥ម៉ឺនរៀល និងទ្រពសម្បត្តិមួយចំនួនទៀត។ សំណាងណាស់ក្នុងហេតុការណ៍នោះមិនបណ្តាលឲ្យ មានមនុស្សរងគ្រោះទេ ចំណែកលោកយាយបានអ្នកជិតខាងជួយទាន់ពេលវេលា៕
ចែករំលែកព័តមាននេះ