ខេត្តកោះកុង ៖ ដោយយល់ឃើញថាប្រជាពលរដ្ឋកម្ពុជាទាំងមូល ជាពិសេសប្រជានេសាទនៅតំបន់សមុទ្រ នៅមានការស្រពេចស្រពិល ក្នុងការសំគាល់ប្រភេទត្រីសមុទ្រ ជាពិសេសប្រភេទត្រីក្រពត ដែលមានរហូតដល់ទៅ១០ប្រភេទឯណោះ ហើយមានចំនួន៥ប្រភេទ យើងអាចយកមកចំអិនធ្វើជាម្ហូបបរិភោគបាន និង៥ប្រភេទទៀត មិនអាចបរិភោគបានឡើយ (ពុល) ហើយអាចបង្កគ្រោះថ្នាក់ដល់អាយុជីវិតទៀតផង បើសិនជាយើងបរិភោគវា ។
ដោយសារតែភាពស្រពេចស្រពិលនេះហើយ ទើបកាលពីថ្ងៃទី២២ ខែមករា ឆ្នាំ២០១៨ កន្លងទៅថ្មីៗនេះ ប្រជានេសាទនៅឃុំកោះស្តេច ស្រុកគីរីសាគរ ខេត្តកោះកុង បានពុលត្រីក្រពតមានចំនួន១០នាក់ ហើយត្រូវស្លាប់ម្នាក់ បន្ទាប់ពីបានចម្អិនត្រីក្រពតបរិភោគដោយមិនបានស្គាល់ប្រភេទត្រីក្រពតនេះច្បាស់លាស់ ។
លោក ឡាង គីរី នាយខណ្ឌរដ្ឋបាលជលផលខេត្តកោះកុង បានពន្យល់តាមឯកសារថា ត្រីក្រពតមានចំនួន១០ប្រភេទ ក្នុងនោះមាន៥ប្រភេទអាចចម្អិនបរិភោគបានដូចជា ១.ត្រីក្រពតលឿងកន្ទុយឆែក (Max. 15m) ២.ត្រីក្រពតលឿង (Max.15cm) ៣.ត្រីក្រពតបន្លា (Max. 12cm) ៤.ត្រីក្រពតបៃតង (Max. 13cm) ៥.ត្រីក្រពតខ្មែរ(Max. 7cm) ចំពោះត្រីក្រពតដែលបរិភោគមិនបាន ក៏មាន៥ប្រភេទដែរដូចជា ១.ត្រីក្រពតក្រហម (Max. 6cm) ២.ត្រីក្រពតកូសាំងស៊ីន (Max. 13.5 cm) ៣.ត្រីក្រពតអុចធំ (Max. 8cm) ៤.ត្រីក្រពតអុចបៃតង (Max. 17cm) ៥.ត្រីក្រពត (Max. 17cm) ។
លោក ឡាង គីរី បានបញ្ជាក់បន្ថែមថា ដើម្បីងាយស្រួលក្នុងការចំណាំប្រភេទត្រីក្រពតទាំងនេះ សូមបងប្អូនប្រជាពលរដ្ឋទាំងអស់ មើលរូបភាពឯកសារតាមរយះទំព័រកោះសន្តិភាព សំគាល់ចំពោះប្រភេទត្រីក្រពតដែលមានសារៈធាតុពុល គឺមានបញ្ជាក់អក្សរពណ៍ក្រហមនៅខាងក្រោម ៕
ចែករំលែកព័តមាននេះ