ខេត្តសៀមរាប ៖ កម្មកររោងស្រូវម្នាក់ត្រូវខ្សែភ្លើងឆក់បណ្ដាលឱ្យស្លាប់ ខណៈឡើងទៅបោសស្រូវនៅខាងលើក្នុងកញ្ច្រែងញាក់ម៉ាស៊ីនស្រូវ កាលពីវេលាម៉ោង០១និង៣០នាទីរសៀល ថ្ងៃទី០៥ ខែកុម្ភៈ ឆ្នាំ២០១៨ របស់ម្ចាស់រោងម៉ាស៊ីនកិនស្រូវ ឈ្មោះ នួន ឆាង ស្ថិតក្នុងភូមិបុស្ស ឃុំដំដែក ស្រុកសូទ្រនិគម ខេត្តសៀមរាប បង្កឱ្យមានការភ្ញាក់ផ្អើល ។
តាមប្រភពពីសមត្ថកិច្ចមូលដ្ឋានបានបង្ហើបបានថា ជនរងគ្រោះដែលត្រូវខ្សែភ្លើងឆក់ស្លាប់នោះឈ្មោះ សែម ថង ភេទប្រុស អាយុ២៥ឆ្នាំ មុខរបរកម្មករម៉ាស៊ីនស្រូវ រស់នៅភូមិជ្រៃជើង ឃុំកៀនសង្កែ ស្រុកសូទ្រនិគម ខេត្តសៀមរាប ។
ប្រភពបានបន្តថា ក្រោយពេលកើតហេតុ កម្លាំងសមត្ថកិច្ចជំនាញបានចុះទៅធ្វើការត្រួតពិនិត្យ និងស្រាវជ្រាវសមត្ថកិច្ចជំនាញបានឱ្យដឹងថា ជនរងគ្រោះពិតជាត្រូវខ្សែភ្លើងនៅក្នុងម៉ាស៊ីនកិនស្រូវឆក់ បណ្ដាលឱ្យស្លាប់ពិតប្រាកដមែន ពុំមែនជាករណីឃាត់កម្មនោះទេ ដោយសារខ្សែភ្លើងក្នុងកញ្ច្រែងញាក់ម៉ាស៊ីនកិនស្រូវនៅខាងលើនោះ វាត្រូវកណ្តុរកកេរដាច់ ។ មូលហេតុ បណ្ដាលមកពីខ្សែភ្លើងឆក់ដោយជនរងគ្រោះបានឡើងទៅបោសស្រូវនៅក្នុងកញ្ច្រែងញាក់ម៉ាស៊ីនកិនស្រូវ ក៏ត្រូវខ្សែភ្លើងឆក់បណ្តាលឱ្យស្លាប់ ។
បច្ចុប្បន្ន សពជនរងគ្រោះត្រូវបានកម្លាំងផ្នែកបច្ចេកទេសជំនាញ ប្រគល់ឱ្យក្រុមគ្រួសារយកទៅធ្វើបុណ្យតាមប្រពៃណីនៅភូមិឃុំខាងលើ ៕
ចែករំលែកព័តមាននេះ