ខេត្តព្រះសីហនុ ៖ ផ្ទះប្រជាពលរដ្ឋចំនួន២ខ្នងធ្វើអំពីឈើលើថ្មក្រោម មានទីតាំងស្ថិតក្នុងក្រុមទី១៨ ភូមិ០៣ សង្កាត់លេខ៤ ត្រូវបានអគ្គិភ័យឆាបឆេះទាំងស្រុង កាលពីវេលាម៉ោង០៥និង០៥នាទី ថ្ងៃទី០៦ ខែកុម្ភៈ ឆ្នាំ២០១៨ បន្ទាប់ពីប្រជាពលរដ្ឋរស់នៅជុំវិញអះអាងថា មកពីការដុតរបស់ឈ្មោះ ម៉ែន សីហា ហៅផាឡូ ដែលការដុតនេះសង្ស័យថា ឈ្លោះប្រកែកគ្នាជាមួយប្រពន្ធ ។
សមត្ថកិច្ចមូលដ្ឋានបានឲ្យដឹងជំហានដំបូងថា នៅវេលាម៉ោង០៥និង០៥នាទី ថ្ងៃទី០៦ខែកុម្ភៈ ឆ្នាំ២០១៨ ផ្ទះប្រជាពលរដ្ឋចំនួន២ខ្នង ធ្វើអំពីឈើលើថ្មក្រោម មានទីតាំងស្ថិតក្រុមទី១៨ ភូមិ០៣ សង្កាត់លេខ៤ ត្រូវបានអគ្គិភ័យឆាបឆេះទាំងស្រុង ហើយត្រូវបានកម្លាំងសមត្ថកិច្ចជំនាញគ្រប់គ្រងបានទាំងស្រុង នៅវេលាម៉ោង០៦និង១០នាទី ដោយប្រើប្រាស់រថយន្តអស់ចំនួន៤គ្រឿង ក្នុងនោះរថយន្តរបស់ស្នងការដ្ឋាននគរបាលខេត្តចំនួន៣គ្រឿង និងរថយន្តរបស់កងរាជអាវុធហត្ថចំនួន១គ្រឿង ប្រើប្រាស់ទឹកអស់ជាង១០រថយន្ត ក្រោមកិច្ចសហការណ៍ពីសមត្ថកិច្ចគ្រប់មូលដ្ឋានទាំងពីរ និងមន្ត្រីជំនាញថ្នាក់ខេត្ត ។
ចំពោះមូលហេតុ នៃការឆាបឆេះនេះ បើយោងតាមប្រភពជំហានដំបូង សមត្ថកិច្ចអាចសន្និដ្ឋានថា បណ្តាលមកពីទុស្សេខ្សែភ្លើង ចេញពីផ្ទះឈ្មោះ ម៉ែន សីហា ហៅផាឡូ តែចំពោះទំហំនៃការខូចខាតបាត់បង់សម្ភារ គេនៅពុំទាន់អាចវាយតម្លៃបាននៅឡើយទេ គ្រាន់តែដឹងថា ទ្រព្យសម្បត្តិនៅក្នុងផ្ទះទាំងពីរ ត្រូវបានឆេះទាំងស្រុងយកចេញបានតែរថយន្តមួយគ្រឿង និងម៉ូតូមួយគ្រឿងតែប៉ុណ្ណោះ ។ ផ្ទះប្រជាពលរដ្ឋដែលបានអគ្គិភ័យឆាបឆេះជាកម្មសិទ្ធរបស់ឈ្មោះ ម៉ែន សីហា ហៅផាឡូ និងជាកម្មសិទ្ធរបស់ឈ្មោះ ពេទ្យ ស្សាយ ។
ប៉ុន្តែបើទោះបីជាមានការអះអាងពីសមត្ថកិច្ចមូលដ្ឋានយ៉ាងណាក៏ដោយ ប្រភពពីប្រជាពលរដ្ឋរស់នៅជុំវិញ បានអះអាងថា អគ្គិភ័យនេះ គឺបានបណ្តាលមកពីឈ្មោះ ម៉ែន សីហា ហៅផាឡូ ដែលបានឈ្លោះប្រកែកគ្នាជាមួយប្រពន្ធ ហើយបានយកថង់ផ្លាស្ទិចដុតជាមួយស្លឹកទឹកដោះគោ ហើយបានរត់គេចខ្លួន ក្រោយអគ្គិភ័យឆាបឆេះខ្លាំង ។ ប្រភពប្រជាពលរដ្ឋជាច្រើនបានអះអាងដូចៗគ្នាថា ជាញឹកញាប់ឈ្មោះ ម៉ែន សីហា ហៅផាឡូ នេះ នៅពេលឈ្លោះគ្នាជាមួយប្រពន្ធ តែងតែគំរាម និងដុតផ្ទះ តែនៅពេលថ្ងៃបានប្រជាពលរដ្ឋស្រែកម្នាក់មួយមាត់ជួយពន្លត់ ទើបពុំមានអគ្គិភ័យកើតឡើងបាន ។
ដោយឡែកស្ត្រីម្នាក់ទៀតឈ្មោះ ខៀវ សា ហៅរក្សា ដែលមានលំនៅដ្ឋានក្បែរនោះដែរ បានអះអាងថា នៅវេលាម៉ោងកើតហេតុ រូបគាត់មកពីធ្វើការ ហើយបានជិះម៉ូតូឆ្លងកាត់កន្លែងកើតហេតុ បានឃើញឈ្មោះ ម៉ែន សីហា ហៅផាឡូ កំពុងឈ្លោះជាមួយប្រពន្ធ នៅពេលនោះគាត់ក៏បានឈប់មើលពីចម្ងាយ ក៏បានឃើញឈ្មោះ ម៉ែន សីហា ហៅផាឡូ បានយកថង់ផ្លាស្ទិចដុតនៅលើផ្ទះដោយបានប្រមូលស្លឹកទឹកដោះគោងាប់យកទៅគរលើផ្ទះដុត ហើយចុះមកក្រោម ក្រពាត់ដៃមើលនៅពេលភ្លើងឆេះខ្លាំង ក៏ស្ទុះឡើងលើផ្ទះវិញ ក៏ត្រូវបានភ្លើងរលាកផ្នែកខាងខ្នង រួចក៏រត់ចុះពីផ្ទះគេចខ្លួនបាត់ទៅ ៕
ចែករំលែកព័តមាននេះ