ការស្រាវជ្រាវមួយរបស់សាកលវិទ្យាល័យវេជ្ជសាស្ត្ររដ្ឋណេវ៉ាដា សហរដ្ឋអាមេរិកបានរកឃើញថា ការប្រើប្រាស់សារធាតុកាហ្វេអុីនកម្រិតខ្ពស់ជាប់ទាក់ទងទៅនឹងការមិនអាចមានកូនចំពោះមនុស្សស្រី ។ លោកសាស្ត្រាចារ្យ Sean Ward ដែលជាអ្នកស្រាវជ្រាវនិយាយថា សារធាតុកាហ្វេអុីនបានកាត់បន្ថយសកម្មភាពសាច់ដុំនៅក្នុងដៃស្បូនដែលមានតួនាទីជញ្ជូនពងពីអូវែរទៅស្បូន ។
លោកបន្តថា ៖«ការពិសោធរបស់យើងបានធ្វើទៅលើសត្វកណ្តុរ ប៉ុន្តែយ៉ាងណាក្តីការរកឃើញនេះនឹងធ្វើដំណើរវែងឆ្ងាយសំដៅទៅរកការពន្យល់បកស្រាយ ថាតើហេតុអ្វីបានជាទទួលទានភេសជ្ជៈដែលមានជាតិកាហ្វេអុីនច្រើនអាចកាត់បន្ថយឱកាសមានគភ៌របស់ស្ត្រី »។
ដោយការសិក្សាលើដៃស្បូនរបស់សត្វកណ្តុរញី លោកសាស្ត្រាចារ្យ Wardនិងក្រុមរបស់គាត់បានស្រាវជ្រាវឃើញថា សារធាតុកាហ្វេអុីនបានបញ្ឈប់រាល់សកម្មភាពរបស់បណ្តាកោសិកាកន្ត្រាក់សាច់ដុំក្នុងដៃស្បូន ។ កោសិកាទាំងនេះបានជំរុញឱ្យមានការកន្ត្រាក់ដៃស្បូន ។
នៅពេលដែលវាត្រូវបានរារាំងពងទាំងឡាយមិនអាចធ្វើចលនាទៅកាន់ដៃស្បូនបានទេ ។ លោក Ward បានបន្ថែមថា ៖«នេះបានផ្តល់ជូននូវការពន្យល់ដ៏គួរឱ្យចាប់អារម្មណ៍ចំពោះមូលហេតុដែលស្ត្រីផឹកកាហ្វេច្រើនជារឿយៗប្រើពេលយូរក្នុងការមានកូនធៀបទៅនឹងស្ត្រីដែលមិនផឹកកាហ្វេ ។ លទ្ធផលនៃការសិក្សានេះត្រូវបានចុះផ្សាយនៅក្នុងព្រឹត្តប័ត្រអង់គ្លេស Pharmacology ៕
ចែករំលែកព័តមាននេះ