រាជធានីភ្នំពេញ ៖ ឈើប្រណីតលេខ១ ប្រមាណជាង៣០ដុំ ស្មើនឹងជិត២ម៉ែត្រគូប ត្រូវបានខណ្ឌរដ្ឋបាលព្រៃឈើភ្នំពេញ ឆែកឆេររកឃើញ និងដកហូត ខណៈដែលឈ្មួញលួចបង្កប់នៅក្នុងរថយន្តដឹកអ្នកដំណើរមួយគ្រឿងពាក់ស្លាកលេខ ភ្នំពេញ 3D-3377 របស់ក្រុមហ៊ុន ស្ទឹងសែន នីកា ខូអិលធីឌី មកឈប់ចតក្នុងយានដ្ឋាន។ ការបង្ក្រាបរថយន្តដឹកឈើប្រណីត នេះបានធ្វើឡើងកាលពីវេលាម៉ោង១០ព្រឹក ថ្ងៃទី៥ ខែកុម្ភៈ ឆ្នាំ២០១៨ នៅយានដ្ឋាន មួយកន្លែងនៅតាមបណ្តោយផ្លូវលេខ៣៤៧ ភូមិ៣ ក្រុមទី៩ សង្កាត់បឹងកក់ទី១ ខណ្ឌទួលគោក រាជធានីភ្នំពេញ។
ប្រតិបត្តិការនេះដឹកនាំដោយលោក អ៊ុន វណ្ណារិទ្ធ នាយរងខណ្ឌរដ្ឋបាលព្រៃឈើភ្នំពេញ និងមានការសម្របសម្រួលពី លោក ហ៊ឹង ប៊ុនថន ព្រះរាជអាជ្ញារង អមសាលាដំបូង រាជធានីភ្នំពេញ ព្រមទាំងមានការចូលរួមពីអាជ្ញាធរផងដែរ។ តាមមន្ត្រីរដ្ឋបាលព្រៃឈើភ្នំពេញ បានឲ្យដឹងថា ឈើប្រណីតលេខ១ ប្រភេទសុក្រំ ចំនួន៣៥ដុំ ស្មើនឹងប្រមាណជិត ២ម៉ែត្រគូបត្រូវបានដកហូត បន្ទាប់ពីឈើទាំងនោះត្រូវឈ្មួញលួចបង្កប់ក្នុងរថយន្តដឹកអ្នកដំណើរ នាំចូលមកពីខេត្ត ព្រះវិហារមកលាក់ទុកនៅក្នុងយានដ្ឋានខាលើ។ ឈើប្រណីត និងរថយន្ត១គ្រឿង ត្រូវបានបញ្ជូនទៅកាន់ផ្នែករដ្ឋបាល ព្រៃឈើកណ្តាល ដែលមានទីតាំងនៅតាមបណ្តោយផ្លូវលេខ៥ ភូមិឡកំបោរ សង្កាត់ស្វាយប៉ាក ខណ្ឌឫស្សីកែវ ដើម្បីបន្តនីតិវិធី៕
ចែករំលែកព័តមាននេះ