ខេត្តសៀមរាប ៖ កិច្ចប្រជុំពិភាក្សាមួយនៅសាលសន្និសីទអង្គរ នៃអាជ្ញាធរជាតិអប្សរា ធ្វើឡើងរយៈពេល៤ថ្ងៃ ចាប់ពីថ្ងៃទី០៥ ដល់ទី០៨ ខែកុម្ភៈ ឆ្នាំ២០១៨ ដែលបានរៀបចំសហការណ៍ដោយអាជ្ញាធរជាតិអប្សរា…
ខេត្តសៀមរាប ៖ កិច្ចប្រជុំពិភាក្សាមួយនៅសាលសន្និសីទអង្គរ នៃអាជ្ញាធរជាតិអប្សរា ធ្វើឡើងរយៈពេល៤ថ្ងៃ ចាប់ពីថ្ងៃទី០៥ ដល់ទី០៨ ខែកុម្ភៈ ឆ្នាំ២០១៨ ដែលបានរៀបចំសហការណ៍ដោយអាជ្ញាធរជាតិអប្សរា និងមជ្ឈមណ្ឌល SEAMEO SPAFA តាមរយៈសិក្ខាសាលាអន្តរជាតិស្តីពី និរន្តរភាព និងការគ្រប់គ្រងទេសចរណ៍ ក្នុងតំបន់បេតិកភណ្ឌពិភពលោក ដោយមានអ្នកស្រាវជ្រាវ និងមន្ត្រីជំនាញមកបណ្តាប្រទេសទាំង១៧ប្រទេស ក្នុងតំបន់អាស៊ីអាគ្នេយ៍ ជប៉ុន និងអឺរ៉ុប នេះជាសិក្ខាសាលាដែលប្រមូលផ្តុំដោយវាគ្មិនដែលភាគច្រើនជាអ្នកស្រាវជ្រាវអ្នកទេសចរណ៍ និងមន្ត្រីគ្រប់គ្រងនៅតំបន់ទេសចរណ៍ក្នុងតំបន់បេតិកភណ្ឌផ្សេងៗនៃពិភពលោកផងដែរ ។
លោក Rujaya Abhakhorn នាយកមជ្ឈមណ្ឌល SEAMEO SPAFA បានលើកឡើងថា យើងបានអញ្ជើញវាគ្មិនដែលមានជំនាញលើការគ្រប់គ្រងទេសចរណ៍ ក្នុងតំបន់បេតិកភណ្ឌ មកជួបជុំគ្នានៅអង្គរ ដើម្បីឲ្យពួកគេបានឃើញ នូវការគ្រប់គ្រងទេសចរណ៍នៅទីនេះ ព្រោះអាជ្ញាធរជាតិអប្សរាមិនត្រឹមតែធ្វើការលើការអភិរក្សប៉ុណ្ណោះទេ តែបានធ្វើការយ៉ាងច្រើនលើការរៀបចំទេសចរណ៍យ៉ាងមានប្រសិទ្ធភាពទៀតផង ។
លោក សុខ សង្វារ អគ្គនាយករង ទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរ បញ្ជាក់ថា តាមរយៈប្រធានដែលប្រមូលផ្តុំដោយអ្នកជំនាញ និងអ្នកគ្រប់គ្រងតំបន់ទេសចរណ៍ក្នុងតំបន់បេតិកភណ្ឌជាច្រើននេះនឹងបង្ហាញថា យើងធ្វើការក្នុងគោលដៅមួយដូចគ្នា ។ រមណីយដ្ឋានអង្គរ ជាទីតាំងដ៏សំខាន់សម្រាប់ជាមេរៀននៃការងារអភិរក្ស និងអភិវឌ្ឍន៍ប្រកបដោយចីរភាព ដែលអាជ្ញាធរជាតិអប្សរាកំពុងបន្តអនុវត្តសព្វថ្ងៃ ។
លោកបន្ថែមថា អង្គរកំពុងតែក្លាយជាទិសដៅទេសចណ៍ដ៏សំខាន់ ដែលទាមទារឲ្យយើងត្រូវយកចិត្តទុកដាក់ខ្ពស់លើបញ្ហាប៉ះពាល់ផ្សេងៗដែលតែងកើតមានឡើងពីវិស័យទេសចរណ៍ ។ យើងសង្ឃឹមថា កិច្ចពិភាក្សានេះ នឹងផ្តល់នូវចំណុចល្អៗជាច្រើនទៀត ដើម្បីជំរុញឲ្យការគ្រប់គ្រងទេសចរណ៍នៅអង្គរ ក៏ដូចជាតំបន់បេតិកភណ្ឌផ្សេងៗទទួលនូវប្រសិទ្ធភាពល្អបំផុតនាពេលអនាគត ។
លោក ជុច ភឿន រដ្ឋលេខាធិការ និងជាតំណាងលោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានបញ្ជាក់ថា នេះជាសិក្ខាសាលាដ៏មានតម្លៃដែលនឹងអនុញ្ញាតឲ្យអ្នកគ្រប់គ្រងទេសចរណ៍ក្នុងតំបន់បេតិកភណ្ឌមានគំនិតបន្ថែមលើការរៀបចំផែនការបានល្អ និងអនុវត្តការគ្រប់គ្រងទេសចរណ៍ឲ្យកាន់តែមានប្រសិទ្ធភាព ។
ដោយឡែក យើងជឿជាក់ថា បទពិសោធន៍ជាង២៥ឆ្នាំ នៃការងារគ្រប់គ្រងអង្គរប្រកបដោយភាពជោគជ័យកន្លងមក អាចជាមេរៀនដ៏ល្អដែលអាចរៀនសូត្របានជាសាកល ពោលគឺកិច្ចការពីរដែលអាជ្ញាធរជាតិអប្សរាបានអនុវត្តជាប្រចាំ គឺការអភិរក្ស និងអភិវឌ្ឍន៍ប្រកបដោយចីរភាព ៕
ចែករំលែកព័តមាននេះ