ខេត្តសៀមរាប ៖ ប្រជាពលរដ្ឋប្រមាណជាង៥០០គ្រួសារ ដែលនាំគ្នាចិញ្ចឹមក្រពើនៅខេត្តសៀមរាប កំពុងមានការព្រួយបារម្ភ ខណៈទីផ្សារក្រពើធ្លាក់ចុះ ដោយសារមានឈ្មួញកណ្តាលដេញថ្លៃយកទៅលក់នៅប្រទេសជិតខាង ដូច្នេះពួកគាត់សូមសំណូមពរឱ្យសមាគមន៍ និងអាជ្ញាធរពាក់ព័ន្ធជួយរកទីផ្សារឱ្យពួកគាត់ផង គ្រាន់បានលុយយកមកសងរំលោះ អង្គការ និងជួយផ្គត់ផ្គង់ដល់ក្រុមគ្រួសាររបស់គាត់ផងដែរ ។
តំណាងពលរដ្ឋជាង៥០០គ្រួសារ ដែលចិញ្ចឹមក្នុងខេត្តសៀមរាប បានរៀបរាប់ប្រាប់ថា មូលហេតុក្រពើចុះថ្លៃ ដោយសារមានឈ្មួញកណ្តាលដេញថ្លៃទិញឱ្យពួកគាត់ក្នុងតម្លៃថោក ទើបពួកគាត់មានការព្រួយបារម្ភ ព្រោះកាលពីឆ្នាំទៅមួយ កូនក្រពើ១ក្បាលតម្លៃ២០ទៅ២៦ដុល្លារ មកដល់បច្ចុប្បន្នកូនក្រពើ១ក្បាលបានត្រឹមតែតម្លៃ១០ទៅ១៥ដុល្លារប៉ុណ្ណោះ ។ ចំណែកក្រពើធំ១គីឡូ ពីមុនតម្លៃ៧ទៅ១០ដុល្លារ មកដល់បច្ចុប្បន្នធ្លាក់ចុះក្នុង១គីឡូសល់តែតម្លៃ៤ដុល្លារ ។
ប្រភពបានរៀបរាប់បន្តថា ពួកគាត់សូមសំណូមពរឱ្យសមាគមន៍ និងអាជ្ញាធរពាក់ព័ន្ធទាំងអស់ មេត្តាជួយកុំឱ្យឈ្មួញកណ្តាលមកដេញថ្លៃទិញបន្តទៅលក់នៅក្រៅប្រទេសទៀត ព្រោះពួកគេអាងមានលុយ និងមានខ្នង ទើបពួកគេហ៊ានទំលាក់តម្លៃឱ្យពួកខ្ញុំយ៉ាងដូច្នេះ ។ ប្រសិនមកទិញក៏ទិញចុះ សូមឱ្យតម្លៃដូចមុន ឬក៏ប្រហាក់ប្រហែលពីមុនផង កុំទម្លាក់ដល់ជិតបាតភក់ ធ្វើឱ្យពួកគាត់គ្មានលុយឯណា សម្រាប់ទិញចំណីឱ្យវាស៊ី និងគ្មានលុយឯណាសម្រាប់ថែមបង់ថ្លៃអង្គការនោះទេ ។
ជុំវិញករណីខាងលើនោះដែរ លោក លន់ ណាំ ប្រធានសមាគមន៍ក្រពើក្នុងខេត្តសៀមរាប បានប្រាប់កោះសន្តិភាពតាមទូរស័ព្ទ នៅព្រឹកថ្ងៃទី០៥ ខែមករា ឆ្នាំ២០១៨ យ៉ាងខ្លីថាខ្ញុំកំពុងជាប់ប្រជុំ ។ ចំណែក លោក ទា គឹមសុទ្ធ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប ក៏មិនអាចទំនាក់ទំនងបានដែរ នៅរសៀលថ្ងៃទី០៥ ខែមករា ឆ្នាំ២០១៨ ជុំវិញករណីខាងលើនោះដោយសារទូរស័ព្ទនៅក្រៅតំបន់សេវា ៕
ចែករំលែកព័តមាននេះ