ខេត្តព្រៃវែង ៖ នារីវ័យក្មេងដ៏ស្រស់សោភា២នាក់ បានស្លាប់យ៉ាងអាណោចអាធ័ម នៅក្នុងហេតុការណ៍គ្រោះថ្នាក់ចរាចរដ៏គួរឲ្យរន្ធត់មួយ ដែលបង្កឡើងដោយជនរងគ្រោះខ្លួនឯង បើកវ៉ាជែងខាងស្តាំដៃរថយន្តយីឌុបដឹកស្រូវ ហើយវ៉ាមិនផុតត្រូវរថយន្តបុក និងកិនពីលើតែម្តង ។…
ខេត្តព្រៃវែង ៖ នារីវ័យក្មេងដ៏ស្រស់សោភា២នាក់ បានស្លាប់យ៉ាងអាណោចអាធ័ម នៅក្នុងហេតុការណ៍គ្រោះថ្នាក់ចរាចរដ៏គួរឲ្យរន្ធត់មួយ ដែលបង្កឡើងដោយជនរងគ្រោះខ្លួនឯង បើកវ៉ាជែងខាងស្តាំដៃរថយន្តយីឌុបដឹកស្រូវ ហើយវ៉ាមិនផុតត្រូវរថយន្តបុក និងកិនពីលើតែម្តង ។
ហេតុការណ៍នេះបានកើតឡើងកាលពីវេលាម៉ោង១០និង២០នាទីព្រឹក ថ្ងៃទី០៤ ខែកុម្ភៈ ឆ្នាំ២០១៨ នៅលើកំណាត់ផ្លូវជាតិលេខ៣១១ ត្រង់ចំណុចផ្លូវកែងបែកជា៣ ខាងមុខបន្ទាយអាវុធហត្ថស្រុក ស្ថិតក្នុងភូមិឈើកាច់ ឃុំឈើកាច់ ស្រុកបាភ្នំ ខេត្តព្រៃវែង ។ គ្រោះថ្នាក់នេះ បានបណ្តាលឲ្យនារីវ័យក្មេងចំនួន២នាក់បានស្លាប់ភ្លាមៗនៅនឹងកន្លែង ហើយត្រូវបានគេស្គាល់ថាម្នាក់ឈ្មោះ វឿន ស្រីល័ក្ខ អាយុ២១ឆ្នាំ មានទីលំនៅក្នុងភូមិស្វាយទង ឃុំស្វាយជ្រំ ស្រុកមេសាង និងម្នាក់ទៀតឈ្មោះ ធន់ សារ៉េន អាយុ១៩ឆ្នាំ មានទីលំនៅក្នុងភូមិអង្គាសដី ឃុំស្រុកជាមួយគ្នា ។
ប្រភពព័ត៌មានពីសាក្សីនៅកន្លែងកើតហេតុ បានបញ្ជាក់ប្រាប់ថា មុនពេលកើតហេតុ គេឃើញនារីរងគ្រោះទាំង២នាក់ ជិះម៉ូតូមួយគ្រឿងម៉ាកស្កុបពី ពណ៌ស ពាក់ស្លាកលេខភ្នំពេញ ១CT-៧៤៥៨ ធ្វើដំណើរក្នុងទិសដៅពីត្បូងទៅជើង និងមានរថយន្តយីឌុបដឹកស្រូវ១គ្រឿងទៀតម៉ាកហ៊ីយ៉ាន់ដាយ ភ្លៅ៥ ពណ៌ស ពាក់ស្លាកលេខ កំពង់ចាម ៣A-២៨៤៤ បើកនៅពីមុខក្នុងទិសដៅស្របគ្នា លុះមកដល់ចំណុចកើតហេតុដែលជាចំណុចផ្លូវបត់កែង ម៉ូតូជនរងគ្រោះបានព្យាយាមបើកវ៉ារថយន្តយីឌុបខាងមុខ ដោយបើកវ៉ាខាងស្តាំដៃរថយន្ត តែវ៉ាមិនផុតក៏ត្រូវរថយន្តបុកដួល ហើយកិនពីលើថែមទៀត បណ្តាលឲ្យនារីរងគ្រោះទាំង២ ស្លាប់ភ្លាមៗនៅនឹងកន្លែងតែម្តង ។
ក្រោយកើតហេតុភ្លាម សមត្ថកិច្ចបានទៅដល់ ហើយបានចាប់ឃាត់អ្នកបើកបរថយន្តយីឌុបឈ្មោះ រុន រឿង ភេទប្រុស អាយុ៣៦ឆ្នាំ រស់នៅភូមិព្រៃខ្លា ឃុំព្រៃកណ្តៀង ស្រុកពាមរក៌ ព្រមទាំងរថយន្តទុក ចំណែកសាកសពនារីរងគ្រោះ ត្រូវបាននាំយកទៅរក្សាទុកនៅអធិការដ្ឋាននគរបាលស្រុកបាភ្នំ លុះល្ងាចថ្ងៃដដែល សមត្ថកិច្ចក៏បានប្រគល់សាកសព ទៅឲ្យក្រុមគ្រួសារយកទៅផ្ទះរៀបចំធ្វើបុណ្យតាមប្រពៃណី ៕
ចែករំលែកព័តមាននេះ