ខេត្តកណ្តាល ៖ បុរសម្នាក់បានរងរបួសធ្ងន់ដោយសារករណីគ្រោះថ្នាក់ចរាចរណ៍រវាងរថយន្តបុកជាមួយរថយន្តកាលពីវេលាម៉ោង០៨នឹង១០នាទីយប់ ថ្ងៃទី៣ ខែកុម្ភៈ ឆ្នាំ២០១៨ នៅលើកំណាត់ផ្លូវជាតិលេខ១ត្រង់ចំណុចចន្លោះគីឡូម៉ែត្រលេខ៥០-៥១ ស្ថិតភូមិគគីរធំ ឃុំគគីរធំ ស្រុកកៀនស្វាយ ខេត្តកណ្តាល ។
ជនរងគ្រោះឈ្មោះ លុយ ដាលីន ភេទប្រុស អាយុ៣២ឆ្នាំ មានទីលំនៅភូមិស្វាយ ឃុំស្រឡិត ស្រុកពារាំង ខេត្តព្រៃវែង បើកបររថយន្តពណ៌ក្រហមចាស់ ប្រភេទទេសចរណ៍ ពាក់ស្លាកលេខ ភ្នំពេញ ២E-០៨៥៨ បានរងរបួសធ្ងន់ត្រូវសមត្ថកិច្ចទូរស័ព្ទហៅរថយន្តសាមុយរបស់មណ្ឌលសុខភាពឃុំគគីរធំដឹកយកទៅសង្គ្រោះនៅមន្ទីរពេទ្យរាជធានីភ្នំពេញ ។ ចំណែកភាគីរថយន្តមួយគ្រឿងទៀត ពណ៌សលាយខៀវ ប្រភេទសណ្តោងពាក់ស្លាកលេខ ព្រះសីហនុ៣A-៣៦០៤ បើកបរដោយបុរសមិនស្គាល់អត្តសញ្ញាណបានរត់គេចខ្លួនមុនពេលសមត្ថកិច្ចទៅដល់ ។
ប្រភពព័ត៌មានបានឲ្យដឹងថា មុនពេលកើតហេតុគេឃើញភាគីរថយន្តពណ៌ក្រហមបើកក្នុងទិសដៅពីអ្នកលឿងទៅភ្នំពេញ លុះបើកទៅដល់ចំណុចកើតហេតុខាងលើក៏បានជ្រុលចង្កូតទៅបុកជាមួយរថយន្តម៉ាកពណ៌សដែលកំពុងបើកបរមានទិសដៅផ្ទុយគ្នាពេញទំហឹងតែម្តង ។
ក្រោយទទួលបានព័ត៌មានសមត្ថកិច្ចនគរបាលជំនាញសហការជាមួយនគរបាលប៉ុស្តិ៍ចុះអន្តរាគមន៍ធ្វើការវាស់វែងយករថយន្តខូចខាតធ្ងន់ទាំង២គ្រឿងទៅរក្សាទុកជាភស្ថុតាងនៅអធិការដ្ឋាននគរបាលស្រុកកៀនស្វាយ ។ ករណីនេះសមត្ថកិច្ចបានសន្និដ្ឋានមកពីអ្នកបើកបររថយន្តឈ្មោះ លុយ ដាលីន ធ្វេសប្រហែសមិនប្រុងប្រយ័ត្នរំលោភទៅលើយានយន្តមកពីទិសដៅផ្ទុយ ៕
ចែករំលែកព័តមាននេះ