រាជធានីភ្នំពេញ ៖ អាជ្ញាធររាជធានីភ្នំពេញបានអះអាងថា បន្ទាប់ពីសំណង់ស្ពានអាកាសផ្លូវថ្មើរជើងរង្វង់មូលនាងគង្ហីងដែលមានផ្លូវបំបែងជា៥បានស្ថាបនារួចចរាចរណ៏នៅតំបន់នេះ កាន់តែប្រសើរឡើងឬក៏អាចនិយាយបានថា មិនមានការកកស្ទះចរាចរណ៏តែម្តង ។
លោក សាំ ពិសិដ្ឋ នាយកមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា មកដល់ពេលនេះសំណង់ការរដ្ឋានស្ថាបនាស្ពានអាកាសផ្លូវថ្មើរជើងរង្វង់មូលនាងគង្ហីងអនុវត្តន៏បាន៥០ភាគរយ ដែលក្រុមការងារបាននឹងកំពុងជុំរុញឲ្យរួចរាល់ក្នុងពេលឆាប់ៗនេះ ។
លោក បន្តថា ការស្ថាបនាស្ពានអាកាសថ្មើរជើងនៅជុំវិញស្តុបរង្វង់មូលនាងគង្ហីងនេះក្រោមកិច្ចសហការរវាងរដ្ឋបាលរាជធានីភ្នំពេញជាមួយក្រុមហ៊ុន OCIC ក្នុងគោលបំណងដើម្បីសម្រួលដល់ការធ្វើដំណើរថ្មើរជើងឆ្លងកាត់ទីតាំងភ្លើងស្តុបមិនប៉ះពាល់ចរាចរ និងជួយកាត់បន្ថយការកកស្ទះ និងគ្រោះថ្នាក់ចរាចរណ៏នៅតំបន់នោះផងដែរ ។
លោក សាំ ពិសិដ្ឋ បានបញ្ជាក់ថា គិតមកដល់ពេលនេះការដ្ឋានសាងសង់ស្ពានអាកាសថ្មើរជើងនាងគង្ហីងសម្រេចលទ្ធផលបាន៥០ភាគរយហើយ ដោយសរសរស្ពានចំនួន៦កន្លែងនៅជុំវិញរង្វង់មូលត្រូវបានចាក់បេតុងរួចរាល់ ។ ចំណែកការងារចំពោះមុខកំពុងស្ថាបនាគ្រឿងបង្គុំសំណង់ផ្នែកខាងលើ និងគ្រឿងបង្គុំសំណង់ជណ្តើរយន្តដោយក្រុមការងារបាននឹងកំពុងសំរុកឲ្យរួចរាល់ក្នុងពេលឆាប់ៗនេះ ។
គួរបញ្ជាក់ថា នៅរាជធានីភ្នំពេញមានស្ពានអាកាសថ្មើរជើងមានចំនួន៣គឺនៅមុខវិទ្យាល័យជម្ពូវ័ន្ត ខណ្ឌពោធិសែនជ័យ២កន្លែង និងជុំវិញស្តុបរង្វង់មូលនាងគង្ហីងក្នុងខណ្ឌ៧មករានេះមួយកន្លែងទៀត ៕
ចែករំលែកព័តមាននេះ