ខេត្តព្រៃវែង ៖ កំណាត់ផ្លូវជាតិលេខ៣១៦ដែលតភ្ជាប់ពីទីរួមស្រុកស្វាយអន្ទរឆ្ពោះទៅកាន់ផ្លូវជាតិលេខ៨អា ស្ថិតក្នុងឃុំស្វាយអន្ទរ ស្រុកស្វាយអន្ទរ ខេត្តព្រៃវែង កំពុងរងការខូចខាតយ៉ាងដំណំដោយសារតែគេបើកឱ្យរថយន្តយីឌុបធំៗបើកឆ្លងកាត់តាមផ្លូវនេះ ។ ប្រជាពលរដ្ឋនៅផ្សារស្វាយអន្ទរបានឱ្យ កោះសន្តិភាព…
ខេត្តព្រៃវែង ៖ កំណាត់ផ្លូវជាតិលេខ៣១៦ដែលតភ្ជាប់ពីទីរួមស្រុកស្វាយអន្ទរឆ្ពោះទៅកាន់ផ្លូវជាតិលេខ៨អា ស្ថិតក្នុងឃុំស្វាយអន្ទរ ស្រុកស្វាយអន្ទរ ខេត្តព្រៃវែង កំពុងរងការខូចខាតយ៉ាងដំណំដោយសារតែគេបើកឱ្យរថយន្តយីឌុបធំៗបើកឆ្លងកាត់តាមផ្លូវនេះ ។
ប្រជាពលរដ្ឋនៅផ្សារស្វាយអន្ទរបានឱ្យ កោះសន្តិភាព ដឹងថា ពីមុនរថយន្តធំៗគ្រប់ប្រភេទគេឱ្យធ្វើដំណើរតាមផ្លូវជាតិលេខ១១ខាងមុខផ្សារស្វាយអន្ទរ ចំណែកផ្លូវលេខ៣១៦ដែលស្ថិតនៅខាងក្រោយផ្សារគេអនុញ្ញាតិឱ្យបើកឆ្លងកាត់បានសំរាប់តែរថយន្តតូចៗប៉ុណ្ណោះ ប៉ុន្តែដោយសាររាជរដ្ឋាភិបាលធ្វើការជួសជុលពង្រីកផ្លូវជាតិលេខ១១គេក៏បានបិទផ្លូវជាតិលេខ១១ ត្រង់ចំណុចច្រមុះជ្រូក ក្នុងភូមិពោធិ៍ចិន្ដាំ ខាងត្បូងសាលាស្រុកស្វាយអន្ទរ រហូតដល់រង្វង់មូលផ្លូវជាតិលេខ៨អា ចាប់តាំងពីដើមខែមករារហូតដល់សព្វថ្ងៃ ដោយបង្វែរឲ្យរថយន្តធំៗគ្រប់ប្រភេទបើកវាងទៅតាមផ្លូវលេខ៣១៦វិញ ទើបធ្វើឲ្យផ្លូវនេះខូចបន្តិចម្ដងៗរហូតធ្ងន់ធ្ងរដូចឃើញក្នុងរូបភាពនេះ ។
ពលរដ្ឋបានបញ្ជាក់ទៀតថា ការបិទផ្លូវជាតិលេខ១១ជាបណ្ដោះអាសន្ននេះគឺគេហាមតែរថយន្តធំៗប៉ុណ្ណោះដោយឱ្យវាងទៅតាមផ្លូវជាតិលេខ៣១៦ ចំណែករថយន្តតូចៗ ឬម៉ូតូមិនត្រូវបានគេហាមឃាត់ទេគឺនៅអាចចរាចរបានជាធម្មតា ។ ចំពោះការជួសជុល និងពង្រីកផ្លូវឱ្យកាន់តែធំនេះបងប្អូនប្រជាពលរដ្ឋមានការសប្បាយចិត្ត និងគាំទ្រខ្លាំងណាស់ ប៉ុន្តែពួកគាត់ក៏មានការសោកស្តាយដែរនៅពេលដែលគេធ្វើផ្លូវមួយហើយបែរជាធ្វើឱ្យខូចផ្លូវមួយទៀតបែបនេះ ។
លោក ប៉ិច សុង អភិបាលស្រុកស្វាយអន្ទរបានឲ្យដឹងថា ផ្លូវដែលគេបិទត្រង់ចំណុចមុខផ្សារនោះគឺក្រុមហ៊ុនចិនជាអ្នកបិទព្រោះគេធ្វើការកាយដាក់លូ ហើយផ្លូវលេខ៣១៦ដែលខូចនោះ ពេលចិនធ្វើផ្លូវជាតិលេខ១១រួច យើងនឹងស្នើឲ្យមន្ទីរជួសជុលឡើងវិញមិនទុកឱ្យខូចបង្កការលំបាកដល់បងប្អូនប្រជាពលរដ្ឋបែបនេះទេ ។
ចំណែកលោក អ៊ុន សុធា ប្រធានមន្ទីរសាធារណការ និងដឹកជញ្ជូនខេត្តព្រៃវែងបានប្រាប់អ្នកសារព័ត៌មានថា ករណីនេះលោកនឹងចាត់មន្ត្រីឲ្យចុះទៅមើនៅទីតាំងដែលចិនកំពុងដាក់លូនោះហើយបើសិនជា២ទៅ៣ថ្ងៃទៀតរួចរាល់មន្ទីរនឹងដាក់គ្រឿងចក្រទៅជួសជុលផ្លូវលេខ៣១៦ដែលខូចនោះឡើងវិញភ្លាម ។ លោកបន្តថា បើជួសជុលនៅពេលនេះក៏មិនកើតដែរ ព្រោះមិនអាចធ្វើទាំងពីរក្នុងពេលតែមួយទេ ៕
ចែករំលែកព័តមាននេះ