ខេត្តតាកែវ ៖ បើទោះបីជាអាជ្ញាធរខេត្តបានបង្កើតឲ្យមានគណៈកម្មការដេញថ្លែភាស៊ីទូទាំងខេត្ត សម្រាប់មើលការខុសត្រូវលើមេភាស៊ី ឬអ្នកវិនិយោគនៅតាមផ្សារនានា ដើម្បីកុំឲ្យមេភាស៊ីតាមផ្សារទាំងអស់នោះយកលុយលើសពីសៀវភៅបន្ទុករបស់រដ្ឋ ពិសេសមិនត្រូវយកផ្លូវសាធារណៈទៅធ្វើអាជីវកម្មតទៅទៀតក្តី ក៏រហូតមកដល់ពេលនេះ នៅផ្សារតាកែវហាក់ដូចជាមិនឃើញមានអ្វីប្រែប្រួលនោះឡើយ ។…
ខេត្តតាកែវ ៖ បើទោះបីជាអាជ្ញាធរខេត្តបានបង្កើតឲ្យមានគណៈកម្មការដេញថ្លែភាស៊ីទូទាំងខេត្ត សម្រាប់មើលការខុសត្រូវលើមេភាស៊ី ឬអ្នកវិនិយោគនៅតាមផ្សារនានា ដើម្បីកុំឲ្យមេភាស៊ីតាមផ្សារទាំងអស់នោះយកលុយលើសពីសៀវភៅបន្ទុករបស់រដ្ឋ ពិសេសមិនត្រូវយកផ្លូវសាធារណៈទៅធ្វើអាជីវកម្មតទៅទៀតក្តី ក៏រហូតមកដល់ពេលនេះ នៅផ្សារតាកែវហាក់ដូចជាមិនឃើញមានអ្វីប្រែប្រួលនោះឡើយ ។
ផ្ទុយទៅវិញ គេសង្កេតឃើញថា មេភាស៊ីផ្សារមួយចំនួននៅក្នុងខេត្ត ហាក់មិនបានខ្វល់នឹងការណែនាំខាងគណៈកម្មការដេញថ្លែភាស៊ីទូទាំងខេត្តនោះទេ ជាពិសេសនោះគឺនៅផ្សារតាកែវនេះតែម្តង ។
ប្រជាពលរដ្ឋរស់នៅក្នុងក្រុងដូនកែវ និយាយថា ផ្លូវសាធារណៈនៅជុំវិញផ្សារតាកែវត្រូវបានមេភាស៊ីផ្សារនេះយកធ្វើអាជីវកម្មទាំងស្រុងតែម្តង ដោយដាក់ធ្វើជាកន្លែងផ្ញើម៉ូតូយកលុយ ដែលធ្វើឱ្យកកស្ទះចរាចរណ៍ជារៀងរាល់ថ្ងែ ។
ចំណែកអាជ្ញាធរក្រុង នគរបាលសណ្តាប់ធ្នាប់ក្រុង ក៏ដូចគណៈកម្មការដេញថ្លៃភាស៊ីផ្សារវិញ ហាក់មិនអាចរៀបចំឱ្យមានសណ្តាប់ធ្នាប់បាននោះទេ និយាយឱ្យចំទៅ គឺអ្វីៗនៅតែដដែល ។
ប្រជាពលរដ្ឋនិយាយទៀតថា មិនត្រឹមតែយកផ្លូវសាធារណៈទៅធ្វើអាជីកម្មទេ គឺយកលុយថ្លៃផ្ញើម៉ូតូ១គ្រឿង១.០០០រៀល លើសសៀវភៅបន្ទុក៧០០រៀល ដែលនៅក្នុងសៀវភៅបន្ទុកឱ្យយកម៉ូតូ១គ្រឿងតែ៣០០រៀល។
មិនត្រឹមតែប៉ុណ្ណោះ បើសិនជាមិនឲ្យលុយគ្រប់១.០០០រៀលទេ អ្នកទទួលផ្ញើនោះគេមិនឱ្យយកម៉ូតូចេញពីកន្លែងផ្ញើឡើយ ។
នៅក្នុងករណីនេះ លោក មូល វិចិត្រ អភិបាលក្រុងដូនកែវ បានប្រាប់កោះសន្តិភាពតាមទូរស័ព្ទថា ករណីរឿងអ្នកប្រមូលភាស៊ីផ្សារតាកែវយកផ្លូវសាធារណៈនៅជុំវិញផ្សារដាក់ផ្ញើម៉ូតូធ្វើឱ្យកកស្ទះចរាចរណ៍រាល់ថ្ងែនេះ ខាងក្រុងបានចុះទៅណែនាំជាញឹកញាប់ រហូតលើកតុនិងម៉ូតូមកទុកនៅសាលាក្រុង និងឱ្យធ្វើកិច្ចសន្យាថែមទៀតផង ។ រាល់ថ្ងែនេះ ដោយសារម៉ូតូច្រើនពេក ទើបអ្នកប្រមូលភាស៊ីយកម៉ូតូមកដាក់មកលើផ្លូវបែបនេះ។
លោកអភិបាលក្រុងបន្តទៀតថា ចំពោះរឿងអស់លោកនគរបាលដែលមេអង្គភាពចាត់ឲ្យទៅយាមនៅផ្សារនោះ ហេតុអីមិនជួយរៀបចំសណ្តាប់ធ្នាប់ផង ឬមួយទៅចាំយកតែលុយ? ចំពោះបញ្ហានេះ លោកនឹងចាត់ឲ្យលោក កង អាណាន់ អភិបាលរងក្រុងចុះទៅសួរនាំឱ្យបានច្បាស់លាស់ ព្រោះខាងក្រុងគ្មានរឿងអីទៅផ្តាច់មុខលើបញ្ហាខាងលើនោះទេ ៕
ចែករំលែកព័តមាននេះ