រាជធានីភ្នំពេញ ៖ រយៈពេល២ឆ្នាំចុងក្រោយនេះ គម្រោងអគារខ្ពស់កប់ពពកចំនួន២ត្រូវប្រកាសថានឹងសាងសង់នៅរាជធានីភ្នំពេញ ដែលធ្វើឲ្យមហាជន ពិសេសអ្នកតាមដានការអភិវឌ្ឍសេដ្ឋកិច្ចសម្ដែងការសាទរ និងសង្ឃឹមថា គម្រោងអគារយក្សទាំងនោះនឹងកាន់តែធ្វើឲ្យកម្ពុជាល្បីរន្ទឺលើឆាកអន្តរជាតិបន្ថែមទៀត ហើយប្រជាពលរដ្ឋខ្មែរក៏មានមោទនភាពសម្រាប់ប្រទេសរបស់ខ្លួនដែរ ។
ទោះបីយ៉ាងណា គម្រោងទាំងនោះពុំទាន់ច្បាស់ថានឹងត្រូវបុកគ្រឹះសាងសង់នៅពេលណាទេ ខណៈគម្រោង១ត្រូវបានពន្យារពេលពីមួយឆ្នាំទៅមួយឆ្នាំ ចាំបាត់ៗនោះ គឺអគារភ្លោះថៃប៊ុនរ៉ុង (Thai Bunrong Tween Tower) មានកម្ពស់១៣៣ជាន់ ដែលបានចុះហត្ថលេខាលើការវិនិយោគកាលពីដើមខែមីនា ឆ្នាំ២០១៦ មានទីតាំងនៅអតីតសួនកម្សាន្ដឌ្រីមលែនដ៍ ។ ចំណែកគម្រោងមួយទៀត ត្រូវបានលេចឮថានឹងសាងសង់លើផ្ទៃដីជាង៣ម៉ឺនហិកតា ដោយគ្រោងនឹងចំណាយថវិកាប្រមាណ៨០ពាន់លានដុល្លារអាមេរិក ស្ថិតនៅភាគខាងជើងរាជធានីភ្នំពេញ ។
ជាការគួរឲ្យកត់សម្គាល់ កាលពីថ្ងៃទី១ កុម្ភៈ ឆ្នាំ២០១៨នេះ ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន បានបង្ហើបជាថ្មីម្ដងទៀតពីគម្រោងសាងសង់អគារកម្ពស់៦០០ម៉ែត្រ គ្រាដែលសម្ដេចបានអញ្ជើញជាអធិបតីក្នុងពិធីប្រគល់សញ្ញាបត្រដល់និស្សិតនៅវិទ្យាស្ថានបច្ចេកវិទ្យាកម្ពុជា ហើយការបង្ហើបនេះបានធ្វើឲ្យសាធារណជនចាប់អារម្មណ៍ជាថ្មីម្ដងទៀត តែយ៉ាងណា សម្ដេចតេជោមិនបានបញ្ជាក់ពីឈ្មោះគម្រោងអគារកម្ពស់៦០០ម៉ែត្រណាមួយទេ ហើយក៏មិនបានបញ្ជាក់ពីពេលវេលាសាងសង់ដែរ គ្រាន់តែដឹងថា អគារនោះមានចំនួន១៣៣ជាន់ប៉ុណ្ណោះ ហើយត្រូវបានគេនឹកដល់អគារថៃប៊ុនរ៉ុង ដែលបានពន្យារពេលសាងសង់នេះ ។
សម្ដេចតេជោថ្លែងថា ៖« អគារខ្ពស់ៗណាស់ឥឡូវនេះ វាមិនមែន១០ជាន់ ២០ជាន់ទៀតទេ ឥឡូវនេះ គម្រោងខាងមុខ មានអា៦០០ម៉ែត្រ ស្មើនឹង១៣៣ជាន់ នឹងត្រូវសាងសង់ខាងមុខ »។
ទាក់ទងនឹងគម្រោងអគារភ្លោះពាណិជ្ជកម្មលំដាប់ពិភពលោកថៃប៊ុនរ៉ុងនេះ លោកសាស្ត្រាចារ្យ ភឿង សុភ័ណ្ឌ រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់បានប្រាប់កោះសន្តិភាពនាព្រឹកថ្ងៃទី២ កុម្ភៈ ថា គម្រោងសាងសង់អគារដ៏ធំមួយនេះ នឹងសាងសង់ដូចសម្តេចបានមានប្រសាសន៍អីចឹង ប៉ុន្តែលោកមិនអាចបញ្ជាក់បានទេថា គម្រោងនោះនឹងចាប់ផ្ដើមសាងសង់នៅពេលណា ។
អគារពាណិជ្ជកម្មលំដាប់ពិភពលោក Thai Bunrong Tween Tower កំពុងរៀបចំគូរប្លង់ និងសិក្សាលើប្លង់ស្ថាបត្យកម្ម និងផ្ទៃដីឡើងវិញ ដែលគ្រោងសាងសង់លើផ្ទៃដីជិត៦ហិកតា ស្ថិតនៅតំបន់ឌ្រីមលែនដ៍ ក្នុងសង្កាត់ចតុមុខ ខណ្ឌ ដូនពេញ ។ អគារពាណិជ្ជកម្មដ៏ធំមួយនេះ មានបណ្តុំទៅដោយសេវាកម្មចម្រុះដូចជា ៖ ផ្សារទំនើប, អគារការិយាល័យ, អាផាតមិន កម្រិតផ្កាយ៥, អូតែលកម្រិតផ្កាយ៦, ខុនដូប្រណីត, សេវាកម្មហាត់ប្រាណ, ស្ទីម,ម៉ាស្សា, ភោជនីយដ្ឋានលំដាប់អន្តរជាតិ និងជាកន្លែងសម្រាប់គយគន់ទិដ្ឋភាពរាជធានីភ្នំពេញ ជាដើម ។
តាមគម្រោងអគារពាណិជ្ជកម្មកប់ពពកនេះ នឹងសាងសង់ និងគ្រប់គ្រងដោយក្រុមហ៊ុនសំណង់ Hsin Chong Construction Group Ltd ដែលបានសហការវិនិយោគរវាងក្រុមហ៊ុន Thai Bunrong Group និងក្រុមហ៊ុនអភិវឌ្ឍន៍អចលនទ្រព្យនៅទីក្រុងម៉ាកាវ Sun Kian Ip Group ។
អ្នកជំនាញផ្នែកសេដ្ឋកិច្ច និងជាទីប្រឹក្សាជាន់ខ្ពស់ផ្នែកវិនិយោគនៃក្រុមហ៊ុន Emerging Markets Consulting លោក ង៉ែត ជូ បានប្រាប់កោះសន្តិភាពនាថ្ងៃទី១ កុម្ភៈ ថា សម្រាប់ការយល់ឃើញរបស់លោក មិនទាន់ប្រាកដទេថា អាចនឹងកើតឡើងឬអត់ ? ឬក៏ត្រូវពន្យារពេលបន្តទៀតក៏មិនដឹងដែរ ។
« អ្វីជាការបារម្ភរបស់ខ្ញុំ គឺមិនទាន់ដឹងថាមានការសិក្សាពីតម្រូវការច្បាស់លាស់រួចហើយឬនៅ?ដូចនេះ ខ្ញុំមិនទាន់ហ៊ានវាយតម្លៃថា បែបណានោះដែរ។ ប៉ុន្តែបើនិយាយទៅ ប្រទេសនៅក្នុងតំបន់ក្ដី ឬពិភពលោកក្ដី វាលែងទៅជារឿងមួយដែលមានភាពលេចធ្លោទៀតហើយ ព្រោះវាជារឿងធម្មតាទេដែលមានអគារខ្ពស់ៗ តែអាចនឹងប្លែកសម្រាប់ប្រជាជនខ្មែរដែលគាត់មិនធ្លាប់បានទៅបរទេស»។ នេះបើតាមលោក ង៉ែត ជូ បានថ្លែង។
ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា លោក គីម ហ៊ាង បានថ្លែងប្រាប់កោះសន្តិភាពថា វាជាមោទនភាពរបស់កម្ពុជា ដែលមានអគារកម្ពស់៦០០ម៉ែត្រ ។
លោកថ្លែងថា ៖« ចំពោះខ្ញុំនៅពេលមានគម្រោងអគារ៦០០ម៉ែត្រនៅកម្ពុជា សូម្បីយល់សប្តិ ក៏ខ្ញុំសប្បាយរីករាយដែរ ព្រោះវាជាមោទនភាពរបស់ជាតិ ដោយសារប្រទេសជាច្រើននៅអាស៊ី គេអត់មាន ដល់ពេលយើងមានវាជាមោទនភាពមួយហើយ ប៉ុន្តែសម្រាប់ខ្ញុំមិនអាចដឹងទេថា នៅពេលណាសាងសង់ ហើយសួរថា គម្រោងនោះជោគជ័យឬអត់? ខ្ញុំសុំឆ្លើយថា ជោគជ័យពេលដែលបញ្ចប់ បើមិនទាន់ចាប់ផ្ដើម ឬកំពុងសាងសង់ ខ្ញុំមិនអាចថាជោគជ័យបានឡើយ » ។
លោក គីម ហ៊ាង បានបន្ថែមថា ៖« ចំពោះផលប៉ះពាល់វាតែងតែមានហើយ សំខាន់អ្វីដែលល្អ គឺវាច្រើនលើសលប់ហើយ អីចឹងផលប៉ះពាល់ក៏វាលែងមានទៀតដែរ តែបើសិនជាអគារនេះជោគជ័យ គឺវាផ្ដល់ប្រយោជន៍ដល់សេដ្ឋកិច្ចជាតិច្រើនថែមទៀត ហើយមុខមាត់ប្រទេសកម្ពុជាគឺលើកតែម្ដង ពេលដែលគេនិយាយថា អូ..! ស្រុកខ្មែរមានអគារ៦០០ម៉ែត្រ ។ ឡូយហ្មង ! អីចឹង អ្នកមាន បើកន្លែងណាល្អ គេមកហើយ មិនថាអ្នកទេសចរ ឬអ្នករកស៊ីទេ គឺមកតៗគ្នាតែម្ដង » ។
យ៉ាងណាមិញ លោក ង៉ែត ជូ នៅតែមានក្ដីបារម្ភពីបញ្ហាសណ្ដាប់ធ្នាប់ចរាចរណ៍ និងបញ្ហាទឹកជំនន់ ព្រោះវាជារឿងសំខាន់ជាងគេ នៅពេលមានអគារធំ ហើយខ្ពស់បែបនេះ។ ប៉ុន្តែអាចថា នេះជាបំណងប្រាថ្នារបស់រាជរដ្ឋាភិបាល។ អីចឹង លោកគ្មានយោបល់អ្វីទេពាក់ព័ន្ធនឹងគម្រោងមួយនេះ ។
ប្រសិនបើគម្រោងអគារភ្លោះនេះជោគជ័យ វានឹងក្លាយជាអគារខ្ពស់ជាងគេនៅអាស៊ីអាគ្នេយ៍ ខណៈបច្ចុប្បន្ន អគារភ្លោះ Petronas Tower ដែលមានកម្ពស់៤៥២ម៉ែត្ររបស់ប្រទេសម៉ាឡេស៊ី កំពុងគ្រងតំណែងជាអគារខ្ពស់ជាងគេបំផុតនៅអាស៊ីអាគ្នេយ៍នេះ ៕
ចែករំលែកព័តមាននេះ