រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា នៅវេលាម៉ោង៩នឹង០០នាទីព្រឹក ថ្ងៃទី០៤ ខែកុម្ភៈ ឆ្នាំ២០១៨ នេះកម្លាំងកងរាជអាវុធហត្ថខណ្ឌមានជ័យសហការជាមួយកម្លាំងកងរាជអាវុធហត្ថរាជធានីភ្នំពេញដឹកនាំដោយលោកវរសេនីយ៍ទោ ហេម រិទ្ធី មេបញ្ជាការកងរាជអាវុធហត្ថខណ្ឌ ដោយមានការឯកភាពពីព្រះរាជអាជ្ញារងអមសាលាដំបូងរាជធានីលោក តុប ឈុនឡុង បានចុះឆែកឆេរផ្ទះមួយកន្លែងដែលស្តុកម៉ូតូបទល្មើសដែលមានទីតាំងស្ថិតនៅភូមិត្នោតជ្រុំ៤ សង្កាត់បឹងទំពុនទី២ ខណ្ឌមានជ័យ ។
តាមសេចក្តីរាយការណ៍បន្ថែមថា ការចុះឆែកឆេរនេះធ្វើឡើងបន្ទាប់ពីកាលពីយប់មិញនេះកម្លាំងកងរាជអាវុធហត្ថបានស្រាវជ្រាវតាមចាប់ជនសង្ស័យម្នាក់ពាក់ព័ន្ធបទល្មើសកាច់.កម៉ូតូរហូតឈានទៅចាប់ដល់ចំណុចខាងលើឃើញម៉ូតូរបស់ជនរងគ្រោះដែលជនសង្ស័យបានប្រព្រឹត្ត ។
ប៉ុន្តែកាលពីយប់មិញមិនទាន់បានចុះឆែកឆេរផ្ទះនោះទេ ដោយមិនទាន់មានគោលការពីព្រះរាជអាជ្ញារង ទើបតែវេលាព្រឹកនេះសមត្ថកិច្ចទទួលបានការឯកភាពពីព្រះរាជអាជ្ញារងចុះឆែកឆេរទីតាំងខាងលើប្រទះឃើញវត្ថុតាងមួយចំនួនពាក់ព័ន្ធករណីចោរកម្ម និងបានឃាត់ខ្លួនជនសង្ស័យដែលជាម្ចាស់ផ្ទះ២នាក់ម្តាយ និងកូនយកទៅសួរនាំផងដែរ ៕
ចែករំលែកព័តមាននេះ