ខេត្តបន្ទាយមានជ័យ ៖ គ្រោះថ្នាក់ចរាចរដ៌រន្ធត់មួយបានកើតឡើងលើដងផ្លូវជាតិលេខ៥នៅភូមិនិមិត្តថ្មី សង្កាត់និមិត្ត ក្រុងប៉ោយប៉ែត នៅរសៀលថ្ងៃទី០៣ ខែកុម្ភៈ ឆ្នាំ២០១៨ នេះ បណ្តាលមនុស្សប្រុសស្រី៣នាក់ស្លាប់ភ្លាមៗនៅនឹងកន្លែង និងម្នាក់ទៀតបានបញ្ជូនទៅសង្គ្រោះបន្ទាន់នៅមន្ទីរពេទ្យ ក្នុងហេតុការណ៍រថយន្តដឹកជ្រូកបុកម៉ូតូដែលឈប់នៅនឹងចិញ្ចើមផ្លូវមុខផ្ទះរបល់ខ្លួន ។
តាមប្រភពព័ត៌មានបានឲ្យដឹងថា ខណៈម៉ូតូកំពុងឈប់នៅចិញ្ចើមផ្លូវបែរមុខទៅទិសខាងកើតមុខផ្ទះរបល់ខ្លួន ក៏មានរថយន្តដឹកជ្រូកបើកបរមកពីទិសខាងកើត មកដល់កន្លែងកើតហេតុ បានបុកម៉ូតូពេញទំហឹង បណ្ដាលឲ្យស្ត្រីម្នាក់ និងកុមារា២នាក់ស្លាប់នៅនឹងកន្លែង និងកុមារីម្នាក់ទៀតរងរបួសធ្ងន់ ត្រូវសមត្ថកិច្ចបញ្ជូនទៅសង្គ្រោះបន្ទាន់នៅឯមន្ទីរពេទ្យ ក៏ប៉ុន្តែកុមារារងគ្រោះមានសង្ឃឹមរស់តិចណាស់ព្រោះរបួសធ្ងន់ធ្ងរពេក ។ ឬឯរថយន្តបង្កបើកបរដោយបុរស៣នាក់មិនទាន់ស្គាល់អត្តសញ្ញាណ និងនៅលើរថយន្តនោះមានជ្រូកមួយក្បាលផងដែរ ។
ប្រភពបន្តថា រថយន្តបង្កខាងលើក្រោយពីបុកម៉ូតូរងគ្រោះ បានរេចង្កូតចូលស្រះទឹកដែលមានចម្ងាយប្រមាណ៥០ម៉ែត្រពីកន្លែងកើតហេតុ អ្នកស្រុកបានឃើញបុរសទាំង៣នាក់នោះបានរត់គេចពីកន្លែងបង្កគ្រោះថ្នាក់ទៅទិសខាងជើងកាត់តាមវាលស្រែបាត់ប្រមោល ។ រថយន្តបង្កត្រូវបានកម្លាំងសមត្ថកិច្ចយករថយន្តស្ទូចមកស្ទូចយកមកលើគោក និងធ្វើការវាស់វែង ។
ប្រភពដដែលបន្តថា សពជនរងគ្រោះ ក្រោយកើតហេតុ ត្រូវបានសាច់ញាតិនាំគ្នាយកមកផ្ទះភ្លាមៗ ព្រោះកន្លែងកើតហេតុស្ថិតនៅមុខផ្ទះរបស់ខ្លួន ។ គេសង្កេតឃើញ លោក សួន បវរ អភិបាលខេត្តបន្ទាយមានជ័យ បានចុះទៅដល់ផ្ទះជនរងគ្រោះភ្លាមៗក្រោយទទួលបានដំណឹង នឹងបាននាំយកថវិកាចូលរួមបុណ្យសព និងបាននាំយកសារុង រួមនិងថវិកាមួយចំនួនទៀតចែកជូនប្រជាពលរដ្ឋនៅខណៈនោះ ។ លោកអភិបាលខេត្តក៏បានបញ្ជាឲ្យសមត្ថកិច្ចយកជ្រូកមួយក្បាលដែលនៅលើរថយន្តបង្កនោះ យកមកឲ្យក្រុមគ្រួសារសពដើម្បីធ្វើម្ហូបបុណ្យផងដែរ ។ បច្ចុប្បន្ន សមត្ថកិច្ចកំពុងវាស់វែង និងចុះស្រាវជ្រាវរកជនបង្ក ដើម្បីយកមកផ្ដន្ទាទោសតាមច្បាប់ ៕
ចែករំលែកព័តមាននេះ