ខេត្តសៀមរាប ៖ ជនសង្ស័យ២នាក់ដែលរំលោភយកដីរដ្ឋ និងរារាំងសមត្ថកិច្ចក្នុងប្រតិបតិ្តការណ៍រុះរើបង្គោលរបងព័ទ្ធលោះបន្លាខុសច្បាប់របស់ឈ្មោះ ហួន សីហា ភេទប្រុស អាយុ២៣ឆ្នាំ មុខរបរយោធា កងពលតូចអន្តរាគមន៍លេខ៦ ចំណុះកងពលធំអន្តរាគមន៍លេខ២ នោះត្រូវកងរាជអាវុធហត្ថចាប់បញ្ជូនទៅគុកចោទពីបទ «ធ្វើឱ្យខូចខាតដោយចេតនា និងប៉ះពាល់កម្មសិទ្ធិនៃទ្រព្យសម្បត្តិសាធារណៈ» ។ មូលហេតុគឺពួកនោះបានដកបង្គោលរបស់អាជ្ញាធរអប្សរាចោល ហើយយកបង្គោលថ្មមកដាំជំនួស ទើបអាជ្ញាធរក្តៅក្រហាយរហូតឈានដល់ធ្វើការឃាត់ខ្លួន ព្រោះជនទាំង២នាក់បានមើលងាយដល់អាជ្ញាធរ និងសមត្ថកិច្ចផងដែរ ។
សូមបញ្ជាក់ផងដែរ បន្ទាប់ពីក្រុមការងារចម្រុះរួមមាន អាវុធហត្ថក្រុង/ខេត្ត នគរបាលក្រុង/ខេត្ត មន្ត្រីអាជ្ញាធរជាតិអប្សរា មន្ត្រីសាលាក្រុងសៀមរាប មេធាវីប្រចាំអាជ្ញាធរជាតិអប្សរា និងអាជ្ញាធរមូលដ្ឋាន ក្រោមការសម្របស្រួលដោយលោក សំរិទ្ធ សុខុន ព្រះរាជអាជ្ញារងតំណាងអយ្យការអមសាលាដំបូងខេត្តសៀមរាប បានចុះប្រតិបត្តិការណ៍រុះរើ នៅភូមិតាវៀន សង្កាត់សាលាកំរើក ក្រុងសៀមរាប ព្រមទាំងនាំខ្លួនបក្ខពួកចំនួន២នាក់ ដែលបានមករារាំងអាជ្ញាធរកំពុងធ្វើការជាលើកទី២ផងដែរ ។
ទី១.នៅថ្ងៃទី៣០ ខែមករា ឆ្នាំ២០១៨ និងទី២.ថ្ងៃទី០២ ខែកុម្ភៈ ឆ្នាំ២០១៨ ខណៈដីដែលគណៈកម្មការចម្រុះចុះរុះរើជាលើកទី២នេះ គឺមានដី២ទីតាំង ទីតាំងទី១.មានទំហ៊ុំ៤០ម៉ែត្រ X ៨០ម៉ែត្រ និងទីតាំងទី២.មានទំហ៊ុំ៤០ម៉ែត្រ X ៨០ម៉ែត្រ ដូចគ្នា ដែលត្រូវបានក្រុមលោក ហួន សីហា មន្ត្រីយោធា និងបក្ខពួក២នាក់ មកវាទទីយកដីដើម្បីធ្វើជាកម្មសិទ្ធខ្លួនឯង ប៉ុន្តែបែរជានាំគ្នាខ្លះរត់ ខ្លះជាប់ខ្នោះ ខណៈរារាំងសមត្ថកិច្ច ។ ហេតុការចាប់ខ្លួនជនសង្ស័យ២នាក់ដែលរារាំងសមត្ថកិច្ចនោះ ធ្វើឡើងនៅថ្ងៃទី០២ ខែមករា ឆ្នាំ២០១៨ ស្ថិតនៅចំណុចខាងត្បូងក្រោលសេះភូមិអញ្ចាញ សង្កាត់នគរធំ ក្រុងសៀមរាប ។
បើតាមប្រភពពីកងរាជអាវុធហត្ថខេត្តបានប្រាប់ថា មុនឈានដល់ធ្វើការឃាត់ខ្លួនជនសង្ស័យ២នាក់ខាងលើនោះ គឺដោយមានពាក្យបណ្តឹងចំនួន៣រូប និងមានការសម្របសម្រួលពីលោក សំរិទ្ធ សុខុន ព្រះរាជអាជ្ញារងតំណាងអយ្យការអមសាលាដំបូងខេត្តសៀមរាប ខណៈជនទាំង២នោះ បានបង្កលក្ខណៈក្នុងការចុះប្រតិបត្តិការណ៍របស់អាជ្ញាធរ និងសមត្ថកិច្ចដែលកំពុងរុះរើបង្គោលរបងព័ទ្ធលោះបន្លាខុសច្បាប់គណៈរបស់ឈ្មោះ ហួន សីហា ភេទប្រុស អាយុ២៣ឆ្នាំ មុខរបរយោធាកងពលតូចអន្តរាគមន៍លេខ៦ ចំណុះកងពលធំអន្តរាគមន៍លេខ២ នោះទើបកម្លាំងប៉េអឹមហ៊ាននាំខ្លួនជននោះបញ្ជូនមកកាន់ការិយាល័យព្រហ្មទណ្ឌ ដើម្បីរៀបចំសំណុំរឿងបញ្ជូនទៅតុលាការចាត់ការតាមផ្លូវច្បាប់ ។
ប្រភពបានបន្តថា ដើមបណ្តឹងទាំង៣រូប ដែលប្តឹងជនសង្ស័យទាំង២នាក់ ចោទពីបទធ្វើឱ្យខូចខាតដោយចេតនា នឹងប៉ះពាល់កម្មសិទ្ធិនៃទ្រព្យសម្បត្តិសាធារណៈនោះ ទី១.លោក ឈិត បូរ៉ាវុធ មេធាវីរាជរដ្ឋភិបាល ទី២.លោក ភុំ ប៊ុនផាន់ អត្តលេខ៣១៧ ការិយាល័យផ្ទះលេខ០១៨៨ ក្រុមទី៧ ភូមិស្លក្រាម សង្កាត់ស្លក្រាម ក្រុង/ខេត្តសៀមរាប និងទី៣.លោក ស៊ុន សុជាតិ អត្តលេខ៣០២ ឱ្យធ្វើជាតំណាងដោយអាណត្តិរបស់អាជ្ញាធរជាតិអប្សរា ។ ប្រភពបានបញ្ជាក់បន្ថែមថា ជនសង្ស័យទាំង២នាក់ ដែលប៉េអឹមចាប់ខ្លួននោះមាន ទី១.ឈ្មោះ ហួន មករា ភេទប្រុស អាយុ៣១ឆ្នាំ បុខរបរបុគ្គលិកព្រលានយន្តហោះសៀមរាប មានស្រុកកំណើតនៅភូមិស្រែអំពិល ស្រុកកៀនស្វាយ ខេត្តកណ្តាល ទីលំនៅបច្ចុប្បន្នភូមិមណ្ឌល៣ សង្កាត់ស្លក្រាម ក្រុង/ខេត្តសៀមរាប ។ ទី២.ឈ្មោះ អន សារឿន ភេទប្រុស អាយុ៣៩ឆ្នាំ មុខរបរលក់សាច់ជ្រូក ស្រុកកំណើតភូមិកំពង់រាប ឃុំកំពង់រាប ស្រុកកោះសូទីន ខេត្តកំពង់ចាម បច្ចុប្បន្ននៅភូមិដកពោធិ៍ សង្កាត់ស្លក្រាម ក្រុង/ខេត្តសៀបរាប ។
បច្ចុប្បន្ន ជនសង្ស័យទាំង២នាក់ដែលរារាំងសមត្ថកិច្ចកំពុងចុះអនុវត្តរុះរើរបងនោះ ត្រូវបានកម្លាំងកងរាជអាវុធហត្ថខេត្តសៀមរាបរៀបចំកសាងសំណុំរឿងបញ្ជូនទៅដាក់គុកនៅរសៀលថ្ងៃទី០២ ខែមករា ឆ្នាំ២០១៨ ចោទពីបទ «ធ្វើឱ្យខូចខាតដោយចេតនា នឹងប៉ះពាល់កម្មសិទ្ធិ នៃទ្រព្យសម្បត្តិសាធារណ» ៕
https://youtu.be/ewzEvNq9J_8
ចែករំលែកព័តមាននេះ