ខេត្តមណ្ឌលគិរី ៖ ប្រតិបត្តិការតាមប្រមាញ់ជនដៃដល់ ដែលបានបាញ់សម្លាប់មន្ត្រីការពារឈើព្រៃ៣នាក់ដែលធ្វើឱ្យញ័រកក្រើកពេញផ្ទៃប្រទេសនោះ ក្នុងរយៈពេលមិនដល់១០០ម៉ោង សមត្ថកិច្ចខេត្តមណ្ឌលគិរី ក្រោមកិច្ចសហការជាមួយកម្លាំងនគរបាលនាយកដ្ឋានមេមត់ ខេត្តត្បូងឃ្មុំចាប់ខ្លួនជនសង្ស័យបានហើយ ដែលជននេះ ត្រូវចាប់ខ្លួនក្នុងហាងគុយទាវយីហោ…
ខេត្តមណ្ឌលគិរី ៖ ប្រតិបត្តិការតាមប្រមាញ់ជនដៃដល់ ដែលបានបាញ់សម្លាប់មន្ត្រីការពារឈើព្រៃ៣នាក់ដែលធ្វើឱ្យញ័រកក្រើកពេញផ្ទៃប្រទេសនោះ ក្នុងរយៈពេលមិនដល់១០០ម៉ោង សមត្ថកិច្ចខេត្តមណ្ឌលគិរី ក្រោមកិច្ចសហការជាមួយកម្លាំងនគរបាលនាយកដ្ឋានមេមត់ ខេត្តត្បូងឃ្មុំចាប់ខ្លួនជនសង្ស័យបានហើយ ដែលជននេះ ត្រូវចាប់ខ្លួនក្នុងហាងគុយទាវយីហោ ឥន្ទ្រី ។
យោងតាមប្រភពព័ត៌មានបានរាយការណ៍ពីខេត្តត្បូងឃ្មុំមកថា ជនដៃដល់ដែលជានាយនគរបាលប៉ុស្តិ៍អូរ
រលែ ដែលសង្ស័យជាអ្នកបាញ់សម្លាប់ជនរងគ្រោះទាំង៣នាក់នោះ ត្រូវបានចាប់ខ្លួននាព្រឹកថ្ងៃទី២ កុម្ភៈ នៅក្នុងស្រុកមេមត់ ខេត្តត្បូងឃ្មុំ ខណៈជនដៃដល់រូបនេះបម្រុងរត់គេចខ្លួនទៅស្រុកកំណើតនៅខេត្តព្រៃ
វែង ។
លោកឧត្តមសេនីយ៍ត្រី សូ សុវណ្ណ ស្នងការរងខេត្តមណ្ឌលគិរីបានឱ្យដឹងថា នាយប៉ុស្តិ៍នគរបាលអូររលែឈ្មោះ ផល ពេញ បានសារភាពប្រាប់សមត្ថកិច្ចថា រូបគេគឺជាអ្នកបាញ់សម្លាប់មន្ត្រីទាំង៣នាក់ពិតប្រាកដមែន ដោយផ្តើមចេញពីការទាស់ទែងគ្នា ។ តែលោកស្នងការមិនបានលម្អិតថា ពួកគេមានវិវាទរឿងអ្វីនោះទេ ។ ក្រោយសាកសួរបន្តិចនៅអធិការដ្ឋាននគរបាលស្រុកមេមត់ ជនសង្ស័យត្រូវបានសមត្ថកិច្ចនាំខ្លួនមកសាកសួរបន្ថែមនៅនាយកដ្ឋានព្រហ្មទណ្ឌក្រសួងមហាផ្ទៃ ហើយត្រូវនាំខ្លួនត្រឡប់ទៅកាន់ខេត្តមណ្ឌលគិរីវិញ ដើម្បីបន្តនីតិវិធី ។
លោកឧត្តមសេនីយ៍ត្រី សូ សុវណ្ណ បានប្រាប់បញ្ជាក់ទៀតថា ជនដៃដល់បានសារភាពហើយថា ខ្លួនគឺជាអ្នកបាញ់សម្លាប់ជនរងគ្រោះទាំង៣នាក់មែន ដោយគាត់ថា មកពីមានគំនុំនិងឈ្លោះជាមួយគ្នា ។ យ៉ាងណាក៏ដោយ លោកឧត្តមសេនីយ៍ត្រី សូ សុវណ្ណ មិនអាចបញ្ជាក់ឱ្យលម្អិត ចំពោះដំណើររឿងពាក់ព័ន្ធការទាស់ទែងគ្នានោះឡើយ ។ តែគេនៅចាំបានតាមសេចក្តីរាយការណ៍ព័ត៌មានមុននេះថា មុនពេលមានការបាញ់ប្រហារនោះ គឺមន្ត្រីទាំង៣នាក់បានប្រទះឃើញក្រុមជនជាតិវៀតណាម កំពុងអារឈើនៅចំណុចអូរហុច និងបានរាយការណ៍មកថ្នាក់លើរបស់ខ្លួន និងទទួលបានការណែនាំឱ្យដកថយសិនចាំនាំកម្លាំងទៅបង្ក្រាបតែម្តង ។
តាមប្រភពនោះថា មានការចេញមុខសម្របសម្រួលជាមួយមន្ត្រីទាំង៣នាក់ពីនាយប៉ុស្តិ៍អូររលែ និងយោធាព្រំដែនតែមិនត្រូវគ្នាទេ ។ ខណៈមន្ត្រីទាំង៣ដកថយពីចំណុចនោះ ក៏មានការបាញ់ប្រហារតែម្តង ដូច្នេះការសម្លាប់មិនញញើតដៃនេះ អាចមានការពាក់ព័ន្ធនិងបទល្មើសព្រៃឈើ ។ អ្វីដែលជាអនុស្សាវរីយ៍របស់អ្នកស្លាប់គឺលោក តើន សុខណៃ ជាឧទ្យានុរក្សនៃមន្ទីរបរិស្ថាន គឺបានថតរូបជាច្រើននៅចំណុចនោះរហូតដល់ពួកគេទាំង៣នាក់ បានថតរួមគ្នាដោយអ្នកភូមិដែលរួមដំណើរ ។
គិតត្រឹមយប់ថ្ងៃ២ កុម្ភៈ មន្ត្រីយោធាការពារព្រំដែន៣នាក់ និងមន្ត្រីនគរបាលការពារព្រំដែនម្នាក់ត្រូវបានចាប់ខ្លួនជាបន្តបន្ទាប់ ពាក់ព័ន្ធការបាញ់សម្លាប់មនុស្ស៣នាក់ នៅស្រុកអូររាំង ខេត្តមណ្ឌលគិរី ខណៈជនដៃដល់ជានាយនគរបាលប៉ុស្តិ៍អូររលែ ឈ្មោះ ផល ពេញ បានព្យាយាមរត់គេចខ្លួន ខណៈយោធាម្នាក់ឈ្មោះ កើត វេហា ហៅឆៃ បានចូលខ្លួនសារភាព ។
យោងតាមលោកឧត្តមសេនីយ៍ឯក ហុង វិណុល មេបញ្ជាការរងកងរាជអាវុធហត្ថលើផ្ទៃប្រទេស និងជាសមាជិកគណៈកមា្មធិការទប់ស្កាត់ និងបង្ក្រាបបទល្មើសព្រៃឈើថ្នាក់ជាតិ ដែលកំពុងដឹកនាំកម្លាំងចុះស្រាវជ្រាវករណីនេះ បានថ្លែងថា មុនពេលមានការចាប់ខ្លួនឈ្មោះ ផល ពេញ នេះគឺកម្លាំងរុករកប្រមាណ១០០នាក់បានតាមប្រមាញ់ក្នុងព្រៃ ដើម្បីចាប់ខ្លួនជនដៃដល់ដែលពាក់ព័ន្ធនិងការបាញ់សម្លាប់ជនរងគ្រោះទាំង៣នាក់ ។ ជនសង្ស័យដែលត្រូវបានកំណត់តាំងពីដំបូងគឺឈ្មោះ ផល ពេញ បូករួមទាំងឈ្មោះ កើត វេហា និងឈ្មោះ ងួរ ជាមន្ដ្រីយោធាការពារព្រំដែននៅតំបន់អូររលែ ព្រមទាំងជនពាក់ព័ន្ធមួយចំនួនទៀត ។
ការបាញ់ប្រហារនេះបានកើតឡើងនៅចំណុចប៉ុស្ដិ៍អូររលែ ក្នុងភូមិសាស្ដ្រភូមិពូហ្សាម ឃុំសែនមនោរម្យ ស្រុកអូររាំង ខេត្តមណ្ឌលគិរី នៅចន្លោះម៉ោង៤ ទៅម៉ោង៥ល្ងាចថ្ងៃទី៣០ ខែមករា ឆ្នាំ២០១៨ បានបណ្ដាលឱ្យស្លាប់មនុស្ស៣នាក់រួមមាន៖ មន្ដ្រីអាវុធហត្ថលើផ្ទៃប្រទេសម្នាក់ឈ្មោះ សេក វឌ្ឍនា,មន្ដ្រីឧទ្យានុរក្ស នៃមន្ទីរបរិស្ថានខេត្តមណ្ឌលគិរី ឈ្មោះ តើន សុខណៃ និងបុគ្គលិកអង្គការសមាគម អភិរក្សសត្វព្រៃ Wildlife Conservation Society (WCS)ឈ្មោះ ថុល ខ្នា ដែលការបាញ់ប្រហារនេះផ្តើមចេញពីបទល្មើសព្រៃឈើ ។សេចក្តីថ្លែងការណ៍របស់អង្គការសមាគមអភិរក្សសត្វព្រៃ (Wildlife Conservation Society-WCS)អង្គការ WCS បានសម្តែងនូវក្តីព្រួយបារម្ភយ៉ាងខ្លាំងចំពោះការបាញ់សម្លាប់វីរជនអភិរក្សព្រៃឈើចំនួន៣រូប កាលពីថ្ងៃទី៣០ ខែមករា ឆ្នាំ២០១៨ ។
លោក កែន សេរីរដ្ឋា នាយកអង្គការ WCS មានប្រសាសន៍ដូចខាងក្រោម៖ អង្គការWCS សូមសម្តែងនូវការសោកស្តាយ និងសូមចូលរួមរំលែកទុក្ខមហាក្រៀមក្រំនេះជាមួយក្រុមគ្រួសារ និងសាច់ញាតិរបស់វីរជនអភិរក្សព្រៃឈើទាំង៣រូបមាន លោក តឺន សុខណៃ មន្ត្រីឧទ្យានុរក្សរបស់ក្រសួងបរិស្ថាន លោក សេក វឌ្ឍនា មន្ត្រីកងរាជអាវុធហត្ថលើផ្ទៃប្រទេស និងលោក ថុល ខ្នា មន្ត្រីផ្នែកព័ត៌មានភូមិសាស្ត្រអង្គការ WCS ដែលត្រូវបានជនប្រដាប់អាវុធមិនស្គាល់មុខបាញ់សម្លាប់ នៅពេលពួកគេកំពុងចុះបំពេញការងារដើរល្បាតព្រៃក្បែរព្រំប្រទល់កម្ពុជា និងវៀតណាម ។
លោក សុខណៃ អាយុ៣៧ឆ្នាំ លោក វឌ្ឍនា អាយុ៣៨ឆ្នាំ និងលោក ខ្នា អាយុ២៤ឆ្នាំ ត្រូវបានជនល្មើសបាញ់សម្លាប់ពេលពួកគាត់ត្រឡប់ពីចំណុចអូរហុចព្រំប្រទល់កម្ពុជា និងវៀតណាម បន្ទាប់ពីបានប្រទះឃើញជំរំស្នាក់នៅរបស់ជនល្មើសកាប់ឈើខុសច្បាប់ និងដកហូតរឹបអូសយករណារយន្ត និងម៉ូតូដែលប្រើប្រាស់សម្រាប់ដឹកជញ្ជូនឈើ ។
គិតត្រឹមវេលាម៉ោង២រសៀលថ្ងៃទី២ កុម្ភៈ កម្លាំងជំនាញបច្ចេកទេសដឹកនាំដោយលោកវសេនីយ៍ទោ ព្រិល រ៉ាម៉ាណ នាយការិយាល័យបច្ចេកទេស បានសហការកម្លាំងជំនាញព្រហ្មទណ្ឌ និងកម្លាំងអធិការដ្ឋាន អូររាំង&កែវសីម៉ា បាននាំខ្លួនឈ្មោះឈាង វ៉ាន់និត ភេទប្រុស មានទីលំនៅឃុំសំបូរ ស្រុកល្វាឯម ខេត្តកណ្ដាលទីលំនៅបច្ចុប្បន្ន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី ទៅរកអាវុធដែលឈ្មោះ ផល ពេញ ឱ្យយកទៅលាក់។
សមត្ថកិច្ចបញ្ជាក់ថា ជនខាងលើជាអ្នកដែលបានទទួលយកអាវុធ ដែលពាក់ព័ន្ធនិងអំពើឃាតកម្មនៅប៉ុស្តិ៍ការពារព្រំដែនអូររលែ ពីឈ្មោះ ផល ពេញ ហើយយកទៅលាក់ទុក នៅចំណុចចន្លោះគីឡូម៉ែត្រ 89_90 ចម្ងាយ30ម៉ែត្រពីផ្លូវជាតិលេខ76A ស្ថិតក្នុងភូមិ អណ្ដូងក្រឡឹង ឃុំសែនមនោរម្យ ស្រុកអូររាំងអាវុធAK47 ចំនួន01ដើម ប្រភេទបទចំហៀង ផលិតនៅប្រទេសចិន លេខ7975 បង់01 គ្រាប់ចំនួន29គ្រាប់៕
ចែករំលែកព័តមាននេះ