ខេត្តបន្ទាយមានជ័យ ៖ សពពលករខ្មែរ២នាក់ ដែលស្លាប់ដោយគ្រោះថ្នាក់ចរាចរក្រឡាប់រថយន្តនៅស្រុកអារញ្ញ ខេត្តស្រះកែវ ប្រទេសថៃ កាលពីល្ងាចថ្ងៃទី០២ កុម្ភៈ ដដែល ត្រូវបានភាគីថៃ បញ្ជូនឱ្យក្រុមសាច់ញាតិហើយ តាមច្រកទ្វារអន្តរជាតិប៉ោយប៉ែត ។ ក្រោយបញ្ជូនមកដល់ ត្រូវបានសាច់ញាតិជួលរថយន្តមួយគ្រឿង ដឹកសាកសពទាំង២ទៅកាន់លំនៅឋាន ដើម្បីធ្វើបុណ្យតាមប្រពៃណី ។
គួរបញ្ជាក់ថា សាកសពជនរងគ្រោះទាំង២នាក់ខាងលើ ម្នាក់ឈ្មោះជៀម សុខ ភេទប្រុស អាយុ២២ឆ្នាំ មានទីលំនៅស្រុកមោងប្ញស្សី ខេត្តបាត់ដំបង និងម្នាក់ឈ្មោះវ៉ាន់ សុខលី ភេទស្រីអាយុ៣៥ឆ្នាំ មានទីលំនៅក្នុងស្រុករុក្ខគិរី ខេត្តបាត់ដំបងដូចគ្នា ។
ករណីក្រឡាប់រថយន្តលើទឹកដីថៃ ដែលបណ្តាលឱ្យពលករខ្មែរស្លាប់ និងរបួសជាច្រើននាក់នេះ គឺបានកើតឡើង កាលពីវេលាម៉ោង៥ព្រឹកថ្ងៃទី០២ កុម្ភៈ ស្ថិតក្នុងស្រុកអារញ្ញ ខេត្តស្រះកែវ ប្រទេសថៃ ។ ក្នុងនោះ មានជនរងគ្រោះដែលស្លាប់គឺមាន២នាក់ខាងលើ ។ រីឯអ្នករងរបួសធ្ងន់មាន៣នាក់ ១-ឈ្មោះវ៉ាន់ លុក ភេទប្រុស ២-ឈ្មោះណាង លី ភេទស្រី និង៣-ឈ្មោះអសារិន ភេទស្រី ។ ដោយឡែក អ្នករងរបួសស្រាលមាន១០នាក់ ដែលសរុបចំនួន១៥នាក់ ។
ចែករំលែកព័តមាននេះ