រាជធានីភ្នំពេញ ៖ នៅល្ងាចថ្ងៃសៅរ៍ ទី៣ កុម្ភៈ ស្អែកនេះ ស្ថានីយទូរទស្សន៍ប៉ុស្ដិ៍លេខ៥ នៅបន្តបើកការប្រដាល់ជាលក្ខណៈអន្តរជាតិ នៅក្នុងសង្វៀនរបស់ខ្លួនដែលស្ថិតនៅព្រែកកំពិស ម្ដុំព្រែកហូរ ជាយរាជធានីភ្នំពេញ បន្ទាប់ពីទើបរើសបានជើងឯកក្នុងចំណោម៣២រូប ហើយបន្តបើករេញប្រកួតជ្រើសរើសជើងឯករដូវកាលថ្មី ។ កីឡាករកម្ពុជា គឺ ចាន់ សំអាត បានក្លាយជាសមាសភាពរបស់កម្ពុជាតែមួយរូបគត់ ដែលនឹងស្វាគមន៍ការប្រកួតអន្តរជាតិនៅសប្ដាហ៍នេះជាមួយកីឡាករថៃ ខណៈដែលការប្រកួតទាំងមូលក៏មានការប្រកួតជម្រុះជើងឯកវគ្គថ្មីរដូវកាលទី២រវាងកីឡាករខ្លាំងៗ៤រូបក្នុងសប្ដាហ៍ទី៣ផងដែរ ដើម្បីបន្តស្វែងរកជើងខ្លាំងឱ្យគ្រប់១៦រូបដើម្បីបញ្ចប់ការប្រកួតជុំទី១។
ការប្រកួតដែលនឹងចាប់ផ្ដើមឡើងពីម៉ោង៥ល្ងាចនៅព្រែកកំពិសនេះត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែងគឺព្រឹត្តិការណ៍ដំណើរការចំពេលថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅប៉ុស្ដិ៍លេខ៥ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រាតប្រដេញគ្នា។
កីឡាករកម្ពុជា និងថៃ២រូប គឺចាន់ សំអាត និងជើងខ្លាំងមកពីប្រទេសថៃឈ្មោះ សឿ៑ ដាំង នឹងក្លាយជាគូប្រកួតស៊ីសាច់ហុតឈាមជាមួយគ្នានៅក្នុងថ្ងៃនោះ ។ លោក សេង កដិកាអ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូបក៏ត្រូវប៉ះគ្នាក្នុងលក្ខណៈចាញ់ធ្លាក់ៗ ដើម្បីបន្តការជម្រុះសម្រាប់សប្ដាហ៍ទី៣ផងដែរ ទើបមានអ្នកទស្សនាភាគច្រើនយល់ថា វត្តមានរបស់កីឡាករកម្ពុជា និងថៃ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈជម្រុះយកអ្នកខ្លាំងទៅប្រកួតយកជើងឯក ពិតជាធ្វើឱ្យអ្នកស្នេហាវិស័យប្រដាល់ចាប់អារម្មណ៍។
លោកអះអាងថា បើទោះជាការប្រកួតជ្រើសរើសជើងឯកមានការចាប់អារម្មណ៍រួចជាស្រេច ក៏ប៉ុស្តិ៍លេខ៥នៅតែបានបញ្ចូលការប្រកួតជាលក្ខណៈអន្តរជាតិមួយគូៗនៅក្នុងការប្រកួតនោះដើម្បីឱ្យរឹតតែទាក់ទាញ ។ វត្តមានរបស់សមាសភាពគូអន្តរជាតិ ក៏ត្រូវបានសម្រាំងយ៉ាងពិសេសផងដែរ ដើម្បីឱ្យអ្នកទស្សនាកាន់តែកន្ត្រាក់អារម្មណ៍ នៅពេលកីឡាករប្រកួតគ្នា។
លោក សេង កដិកា បញ្ជាក់ថា សមាសភាពខាងកម្ពុជាសម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ ចាន់ សំអាត ដោយសារតែកីឡាកររូបនេះធ្លាប់បានឡើងប្រកួតនៅលើសង្វៀនអន្តរជាតិរបស់ប៉ុស្តិ៍លេខ៥ច្រើនលើកមកហើយតែងតែធ្វើឱ្យរញ្ជួយ និងទាក់ទាញដល់អ្នកទស្សនា ។ លោកប្រកាសថា វត្តមានកីឡាករថៃ សឿ៑ ដាំង មានតែចាន់ សំអាត ប៉ុណ្ណោះ ដែលលោកចាត់ទុកថាមានបទពិសោធន៍ និងមានសមត្ថភាពគ្រប់គ្រាន់ក្នុងការប្រកួតជាមួយ ។
លោកក៏បានកំណត់ឱ្យកីឡាករ ចាន់ សំអាត ហ្វឹកហាត់ជាប់លាប់មិនតិចជាង១សប្ដាហ៍មុនពេលផ្គូផ្គងទៀតផង ទើបលោកយល់ថា សមាសភាពរបស់កីឡាករកម្ពុជារូបនេះគ្រប់គ្រាន់សម្រាប់ឱ្យប៉ុស្តិ៍លេខ៥ដាក់ឱ្យប្រកួតជាលក្ខណៈអន្តរជាតិ នៅថ្ងៃសៅរ៍នេះបាន ។ លោកថា កីឡាករកម្ពុជា និងថៃសុទ្ធតែត្រូវបានអះអាងថា មានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា ។
លោក សេង កដិកា បន្តថា ជំនួបអន្តរជាតិដែលបានធ្វើឡើងនៅប៉ុស្តិ៍លេខ៥ មិនមែនសុទ្ធតែរន្ថើនព្រឹត្តិការណ៍ជើងឯកឱ្យអ្នកទស្សនាកាន់តែមានអារម្មណ៍កញ្ជ្រោលនោះទេ ប៉ុន្តែសម្រាប់ជំនួបរវាង ចាន់ សំអាត និងកីឡាករថៃ សឿ៑ ដាំង គឺលោកជឿជាក់ដោយសារកីឡាករថៃលោកស្គាល់ថ្វីដៃច្បាស់ ហើយ កីឡាករកម្ពុជាក៏ល្អស្ថិតក្នុងទំនុកចិត្តលោក តាំងពីមុនផ្គូផ្គង ។ បើទោះជាកីឡាករកម្ពុជាត្រូវប្រឈមនឹងកីឡាករថៃជាគូប្រកួតល្អ ក៏លោកនៅតែប្រកាសថា ចាន់ សំអាត មានសមត្ថភាពគ្រប់គ្រាន់ក្នុងការតតាំង និងមានសង្ឃឹមឈ្នះច្រើន បើលោកផ្គូផ្គងដាក់កីឡាករកម្ពុជាផ្សេងឱ្យជំនួស ។
ជំនួបរវាងពួកគេលោកនៅតែថាមិនមែនជារឿងចៃដន្យ និងមិនមែនជារឿងធម្មតា ដោយសារមានការព្រាងទុកពីសំណាក់រូបលោកដែលជាអ្នកផ្គូផ្គងនៅប៉ុស្តិ៍លេខ៥ និងការរៀបចំទុកពីសំណាក់អ្នកដឹកនាំកីឡាករថៃមកតែម្ដង ។ លោកថា មួយគូនេះ អ្នកណាឈ្នះក្រៅពីទទួលបានទឹកប្រាក់ច្រើនជាង ក៏ទទួលបានទំនុកចិត្តពីអ្នកគាំទ្រកាន់តែខ្លាំងផងដែរ ។ ផ្ទុយទៅវិញ បើចាញ់ការប្រកួតហើយជាកីឡាករកម្ពុជាទៀត គឺមិនត្រឹមតែអាម៉ាស់ប៉ុណ្ណោះទេ ក៏នឹងមានការរិះគន់ធ្ងន់ធ្ងរនៅក្នុងស្រទាប់អ្នកចូលចិត្តកីឡាថាប្រកួតលែងកើត ឬធ្លាក់ដៃផងដែរ ។
សម្រាប់ការប្រកួតជម្រុះជើងឯកវគ្គថ្មីនៅសប្ដាហ៍ទី៣នេះវិញលោកថានឹងមានវត្តមានសុទ្ធសឹងតែជាកីឡាករល្អៗនៅក្នុងពិភពប្រដាល់តែម្ដងប៉ះគ្នា ដោយសារក្នុងចំណោមសមាសភាពថ្មីទាំង៣២រូបគឺលោកបានដាក់ចម្រុះកីឡាករជើងចាស់ និងកីឡាករល្អៗដែលធានាថានឹងទាក់ទាញមិនចាញ់ការប្រកួតអន្តរជាតិដែលបានសម្រិតសម្រាំងឡើយ ។
លោក សេង កដិកា បញ្ជាក់ថា ការប្រកួតលើកនេះ ក៏មិនខុសពីរូបមន្តដែលធ្លាប់បានធ្វើនោះទេ គឺអ្នកឈ្នះបានឡើងវគ្គបន្ត ហើយអ្នកចាញ់គឺធ្លាក់ហាលអាវ ។ លោកអះអាងថា ការប្រកួតលើកនេះគឺមិនមានអ្នកឈ្នះក្នុងវគ្គណាមួយដោយគ្មានការប្រឹងប្រែងនោះទេ ដោយលោកបញ្ជាក់ថា អ្នកបានឡើងអង្គុយកៅអី៤នាក់បើកឆាកក្នុងវគ្គ១៦នាក់សម្រាប់សប្ដាហ៍ទី១ និងទី២ បានឡើងទាំងវេទនានោះផង ។ លោកថា ការប្រកួតចាញ់ធ្លាក់ៗ សុទ្ធតែទាមទារឱ្យកីឡាករម្នាក់ៗត្រៀមខ្លួនខុសពីការប្រកួតតាមរបៀបសន្សំពិន្ទុ ដោយសារតែអ្នកមិនខំប្រឹងប្រែង គឺដឹងតែធ្លាក់ហើយបាត់ឱកាស ដែលតម្រូវឱ្យអ្នកមានមុខឡើងប្រកួតត្រូវតែប្រកួតប្ដូរ មិនខ្វល់ពីគ្រោះថ្នាក់ និងលាក់ថ្វីដៃ ពោលគឺធ្វើយ៉ាងម៉េចឱ្យតែឈ្នះ។
ទន្ទឹមនឹងការប្រកួតនៅប៉ុស្តិ៍លេខ៥ នៅសង្វៀនទូរទស្សន៍អាស៊ីអាគ្នេយ៍ ក៏មានការប្រកួតជាលក្ខណៈអន្តរជាតិផងដែរ ទាំងថ្ងៃសៅរ៍ និងថ្ងៃអាទិត្យ មិនខុសពីសប្ដាហ៍កន្លងទៅឡើយ៕
ចែករំលែកព័តមាននេះ