ខេត្តពោធិ៍សាត់ ៖ ផ្ទះមួយខ្នងទំហំ៥ម៉ែត្រគុណនឹង៨ម៉ែត្រធ្វើអំពីបេតុងដំបូលស័ង្កសី ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានសមាគមអតីតយុទ្ធជនកម្ពុជា បានប្រគល់ជូនគ្រួសារនិវត្តជនយោធាឈ្មោះ ចាន់…
ខេត្តពោធិ៍សាត់ ៖ ផ្ទះមួយខ្នងទំហំ៥ម៉ែត្រគុណនឹង៨ម៉ែត្រធ្វើអំពីបេតុងដំបូលស័ង្កសី ជាអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី និងជាប្រធានសមាគមអតីតយុទ្ធជនកម្ពុជា បានប្រគល់ជូនគ្រួសារនិវត្តជនយោធាឈ្មោះ ចាន់ សុខ ភេទប្រុសអាយុ៧៥ឆ្នាំ រស់នៅភូមិខ្នារទទឹង ឃុំខ្នារទទឹង ស្រុកបាកាន ។
លោក ខូយ រីដា អភិបាលរងនៃគណៈអភិបាលខេត្តតំណាងលោក ម៉ៅ ធនិន អភិបាលខេត្ត និងជាប្រធានកិត្តិយសរបស់សមាគមអតីតយុទ្ធជនកម្ពុជាខេត្តពោធិ៍សាត់បានអញ្ជើញធ្វើពិធីប្រគល់ជូននៅថ្ងៃទី០២ ខែកុម្ភៈ ឆ្នាំ២០១៨ ដោយមានការចូលរួមពីលោកឧត្តមសេនីយ៍ទោ ប៉ែន ណាវណ្ណ មេបញ្ជារការរងយោធភូមិភាគទី៥ និងជាមេបញ្ជាការតំបន់ប្រតិបត្តិការសឹករងខេត្តប្រធានសមាគមអតីតយុទ្ធជនកម្ពុជាខេត្តលោក ផាយ ឡេង អភិបាលស្រុកបាកាន និងអាជ្ញាធរមូលដ្ឋានមួយចំនួនទៀត ។
ផ្ទះសម្ដេចតេជោដែលប្រគល់ជូននិវត្តជនយោធានេះមានបំពាក់គ្រែ សម្ភារដំណេក សម្ភារប្រើប្រាស់ និង គ្រឿងឧបភោគបរិភោគជាច្រើនមុខ ព្រមទាំងបានឧបត្ថម្ភអង្ករចំនួន៥០គីឡូក្រាម និងថវិកា១០ម៉ឺនរៀលផងដែរ ។ និវត្តជនយោធា ចាន់ សុខ និងភរិយាបានថ្លែងអំណរគុណយ៉ាងជ្រាលជ្រៅចំពោះសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិតដែលបានផ្ដល់ផ្ទះមួយខ្នងជូនពួកគាត់រស់នៅនាពេលនេះ ។
លោក ចាន់ សុខ បានបង្ហើបឲ្យដឹងថា រូបគាត់បានធ្វើទាហ៊ានយូរហើយធ្លាប់មានប្រពន្ធរហូតដល់ទៅ៨នាក់ និងកូនសរុប២៤នាក់ ។ ប្រពន្ធទាំង៨នាក់ខ្លះស្លាប់ ខ្លះលែងគ្នាហើយសព្វថ្ងៃនៅសល់តែម្នាក់ប៉ុណ្ណោះគឺប្រពន្ធទី៨ ។ ចំណែកកូនៗគេមានប្ដី មានប្រពន្ធបែកអស់ហើយសព្វថ្ងៃរស់នៅតែពីរនាក់យាយតាប៉ុណ្ណោះ ។
លោក ខូយ រីដា បានសំដែងការកោតសរសើចំពោះលោក ចាន់ សុខ ដែលបានបូជាសាច់ស្រស់ឈាមស្រស់ឃ្លាតឆ្ងាយពីប្រពន្ធកូន ដើម្បីការពារបូរណភាពទឹកដីជូនជាតិមាតុភូមិ និងប្រជាពលរដ្ឋ រហូតមកដល់ពេលនេះខ្លួនត្រូវចូលនិវត្តន៍ដោយពុំមានសល់អ្វីឡើយ ។ ដោយមើលឃើញជីវភាពលំបាកជាក់ស្ដែង និងគុណបំណាច់ពីមុនមកផងនោះសម្ដេចបានកសាងផ្ទះមួយខ្នងជូនដើម្បីរស់នៅឲ្យបានសមរម្យនឹងគេ ហើយនេះក៏មិនមែនជាលើកទីមួយដែរសម្រាប់និវត្តន៍ទូទាំងប្រទេស ៕
ចែករំលែកព័តមាននេះ