រាជធានីភ្នំពេញ ៖ ស្ថិតក្នុងបរិបទសេដ្ឋកិច្ចបច្ចុប្បន្ន ការធ្វើទំនើបកម្មលើវិស័យកសិកម្ម គឺជារឿងចាំបាច់បំផុតដើម្បីជួយសម្រួលដល់ការលំបាកនានារបស់កសិករ ។
ថ្លែងក្នុងពិធីបិទវេទិកាស្រូវអង្ករលើកទី៦ កាលថ្មីៗនេះ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា ការធ្វើទំនើបកម្មកសិកម្ម គឺដើម្បីឆ្លើយតបនឹងសេចក្តីត្រូវការជាក់ស្តែងរបស់ប្រជាជន ព្រោះប្រជាជនសព្វថ្ងៃអត់ចង់កាន់ចបទៅកាប់ដី ទៅបាចឬរែកទឹកដាក់ស្រែចម្ការ និងធ្វើកិច្ចការធ្ងន់ៗនោះទេ ។ ដូច្នេះ ការធ្វើទំនើបកម្មកសិកម្មនេះ ជាភាពចាំបាច់ក្នុងដំណាក់កាលថ្មីនៃបរិបទសេដ្ឋកិច្ចប្រទេសកម្ពុជា ។
ដើម្បីធ្វើទំនើបកម្មនេះបាន លោករដ្ឋមន្ត្រីថ្លែងថា កម្ពុជាអាចធ្វើបានតាមជម្រើស៣ប្រភេទផ្សេងគ្នាគឺ ទីមួយ លទ្ធភាព ឯករាជ្យម្ចាស់ការដែលអាចធ្វើបានគឺក្រុមហ៊ុនដែលទទួលដីសម្បទានសេដ្ឋកិច្ច ពីប្រមុខរាជរដ្ឋាភិបាល។ ធ្វើការរៀបចំប្រព័ន្ធហេដ្ឋារចនាសម្ព័ន្ធដោយខ្លួនឯង ទាំងការចាត់ចែងទឹក ទាំងការៀបចំដី និងការរៀបចំការដាំដុះ ការកែច្នៃ ការវេចខ្ចប់សម្រាប់នាំចេញ មានន័យថា ចាប់ផ្តើមធ្វើទំនើបកម្មដោយខ្លួនឯងបាន ។ ទីពី បញ្ចូលគ្រឿងយន្តកសិកម្ម ទាំងការភ្ជូររាស់ ពង្រាបដី ការដាំដុះ រួមទាំងការប្រមូលផលផ្សេងៗ និងទី៣ ជាជម្រើសមួយដែលត្រូវធ្វើការរួមគ្នា រវាងរដ្ឋ វិស័យឯកជន និងសហគមន៍កសិកម្ម ព្រោះគាត់នៅមានក្តីសង្ឃឹមត្រង់ថាគាត់នឹងអាចធ្វើបាន ចូលរួមចំណែកបាន ។ ចំណុចនេះត្រូវការធ្វើរួមគ្នាដោះស្រាយរួមគ្នា ដែលកសិករត្រូវយ៉ាងម៉េចដើម្បីបានចំណូល ហើយជជែកគ្នា ដើម្បីឆ្ពោះទៅការធ្វើទំនើបកម្មកសិកម្ម ។
លោករដ្ឋមន្ត្រីថ្លែងថា ៖« ខ្ញុំសង្កេតឃើញប្រទេសមួយចំនួន គេកំពុងដំណើរការល្អប្រសើរចំពោះបញ្ហានេះ [ទំនើបកម្មកសិកម្ម] ដោយសហគមន៍កសិកម្ម ស្រុះស្រួលជាមួយវិស័យឯកជន ។ គេរៀបចំប្លង់កម្មសិទ្ធិដីធ្លី ទុកឱ្យទាំងអស់មិនឱ្យបាត់ដីសូម្បីតែ១មីល្លីម៉ែត្រ ។ គេបញ្ចូលបច្ចេកវិទ្យា គ្រឿងយន្តកសិកម្ម ហើយកសិករទាំងអស់ចូលរួមចំណែកកែច្នៃនូវផលិតផលបានប្រាក់បៀរវត្សបន្ថែមនៅក្នុងសហគមន៍កសិកម្មនេះ »។
ទាក់ទងនឹងការលើកឡើងនេះ លោក តាំង សុខឃី កសិកជំនាញខាងកសិកម្ម បាននិយាយថា ៖« ចំពោះការធ្វើទំនើបកម្មកសិកម្មនេះ ខ្ញុំគិតថាទៅរួច ព្រោះយើងមានការប្រែប្រួល គ្រាន់តែឆ្លងកាត់វេទិកាស្រូវអង្ករលើកទី៦នេះ មានអ្នកចាប់អារម្មណ៍កាន់តែកើនឡើង អីចឹងយើងសង្ឃឹមថានឹងជោគជ័យ »។
លោកបន្តថា ៖« កសិករធ្វើស្រែមានផ្ទៃដីតូចៗ បើជាគំនិតខ្ញុំ ចង់ឱ្យបង្កើតជាសហគមន៍ឡើង ព្រោះការធ្វើទំនើបកម្ម ទាល់តែតំបន់មួយ ពូជមួយ តំបន់មួយសង្វាក់ផលិតកម្មមួយ ទើបរឹងមាំ ហើយបើគាត់ចងក្រងជាសហគមន៍ការចំណាយនឹងកាត់បន្ថយ »។
លោករដ្ឋមន្ត្រីក្រសួងកសិកម្មលើកឡើងថា ផ្លូវដែលធ្វើទំនើបកម្មកម្មកសិកម្ម ទាំង៣ខាងលើសម្រាប់ជម្រើសទី១ និងទី២នេះភាគច្រើនគឺពឹងពាក់ទៅលើការទទួលបាននូវប្រព័ន្ធស្រោចស្រពពីរាជរដ្ឋាភិបាល ហើយផ្ទៃក្នុងស្រោចស្រព ចាត់ចែង ដោយក្រុមហ៊ុនសុទ្ធសាទ រួមនឹងសហគមន៍កសិកម្មដែលអាចធ្វើទៅបាន ។ វាគឺជាជំហានថ្មីដែលជួយបន្ធូរបន្ថយនូវសម្ពាធនៃការគ្រប់គ្រងថវិកាជាតិ ៕
ចែករំលែកព័តមាននេះ