រាជធានីភ្នំពេញ ៖ ក្នុងជំនួបជាមួយរដ្ឋមន្ត្រីក្រសួងពាណិជ្ជកម្មកម្ពុជា ប្រធានក្រុមហ៊ុន Zhongde Waste Technology (ZDWT) ប្រទេសចិន មានបំណងវិនិយោគថាមពលអគ្គិសនីចេញពីសំរាមនៅកម្ពុជា និងជួយបើកមជ្ឈមណ្ឌលពាណិជ្ជកម្មកម្ពុជានៅទីក្រុងប៉េកាំង ។
លោក Chen Zefeng ប្រធានក្រុមហ៊ុននេះឲ្យដឹងថា ក្រុមហ៊ុនលោកបានវិនិយោគ និងមានបទពិសោធន៍លើការផលិតអគ្គិសនីចេញពីការដុតសំរាមមានរយៈពេលជាង២០ឆ្នាំមកហើយ។ បច្ចុប្បន្ន ក្រុមហ៊ុនបានពង្រីករោងចក្រផលិតអគ្គិសនីចេញពីការដុតសំរាម មានទាំងខ្នាតតូច និងធំនៅតាមខេត្តជាច្រើនក្នុងប្រទេសចិន ព្រមទាំងមានដៃគូសហការជាមួយប្រទេសជាច្រើនដូចជា ប្រទេសជប៉ុន ឥណ្ឌា អាមេរិក និងអាល្លឺម៉ង់ ជាដើម ។
លោកបន្តថា ៖« ក្រុមហ៊ុនមានបំណងមកវិនិយោគគម្រោងផលិតថាមពលអគ្គិសនីចេញពីការដុតសំរាមនេះនៅប្រទេសកម្ពុជា ហើយក៏ស្នើសុំបើកមជ្ឈមណ្ឌលពាណិជ្ជកម្មកម្ពុជានៅទីក្រុងប៉េកាំង ដោយសន្យាផ្តល់នូវទីតាំងសម្រាប់ការបង្កើតមជ្ឈមណ្ឌលនេះ » ។
លោករដ្ឋមន្ត្រីក្រសួងពាណិជ្ជកម្ម ប៉ាន សូរស័ក្តិ បានសម្តែងនូវការកោតសរសើរជាខ្លាំងចំពោះបច្ចេកវិទ្យាដ៏ទំនើបនេះ ដោយវាមិនត្រឹមតែជាមធ្យោបាយដ៏ល្អក្នុងការសម្អាតសំរាមនិងបរិស្ថានប៉ុណ្ណោះទេ តែថែមទាំងជួយរួមចំណែកផ្គត់ផ្គង់បន្ថែមនូវថាមពលអគ្គិសនីផងដែរ ។
លោករដ្ឋមន្ត្រីបានសន្យាថា នឹងជួយសម្របសម្រួលជូនលោកប្រធានក្រុមហ៊ុនទៅពិភាក្សា និងសិក្សាគម្រោងនេះ ព្រមទាំងធ្វើការលម្អិតជាមួយក្រសួងបរិស្ថានកម្ពុជា ។ ចំណែកការស្នើសុំការបើកមជ្ឈមណ្ឌលពាណិជ្ជកម្មកម្ពុជានៅទីក្រុងប៉េកាំង លោករដ្ឋមន្ត្រីបានមានប្រសាសន៍ថា ការបើកមជ្ឈមណ្ឌលពាណិជ្ជកម្មកម្ពុជា ពិតជាការរួមចំណែកមួយយ៉ាងខ្លាំងក្នុងការផ្សព្វផ្សាយគោលនយោបាយវិនិយោគ ព័ត៌មាន ទេសចរណ៍ និងវប្បធម៌ ព្រមទាំងព័ត៌មានទាក់ទងទៅនឹងវិស័យផ្សេងៗទៀតជូនប្រជាជនចិន និងវិនិយោគិនចិនដែលមានបំណងទៅទេសចរណ៍ ឬវិនិយោគនៅប្រទេសកម្ពុជា ។
លោករដ្ឋមន្ត្រីបានបន្តថា បច្ចុប្បន្ន កម្ពុជាបានបើកមជ្ឈមណ្ឌលពាណិជ្ជកម្មនៅទីក្រុងស៊ីអាន និងទីក្រុងក្វាងចូវ ហើយនឹងបន្តបើកនៅតាមបណ្តាខេត្ត និងក្រុងមួយចំនួនទៀតនៅក្នុងប្រទេសចិន ។ ចំពោះការសុំបង្កើតមជ្ឈមណ្ឌលពាណិជ្ជកម្មនៅទីក្រុងប៉េកាំង លោករដ្ឋមន្ត្រីបានមានប្រសាសន៍ថា នឹងចាត់មន្ត្រីអគ្គនាយកដ្ឋានជំរុញពាណិជ្ជកម្មមកធ្វើការសិក្សាសិន មុននឹងសម្រេច ៕
ចែករំលែកព័តមាននេះ