រាជធានីភ្នំពេញ ៖ មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ បានអះអាងថា ទីផ្សារដំណាំកសិកម្មរបស់កសិករមានច្រើនណាស់សម្រាប់លក់នៅក្នុងស្រុក ជាជាងការនាំចេញទៅលក់នៅក្រៅប្រទេស ។ ទោះបីយ៉ាងណា ការផលិតបន្លែផ្លែឈើនៅក្នុងស្រុកពុំគ្រប់គ្រាន់សម្រាប់ផ្គត់ផ្គង់តាមតម្រូវការនៅឡើយ និងត្រូវពឹងផ្អែកលើការនាំចូលពីបរទេស ។
ថ្លែងក្នុងសិក្ខាសាលាផ្សព្វផ្សាយពីគម្រោងសាវប្បកម្មកម្ពុជាដើម្បីបង្កើនប្រាក់ចំណូល និងអាហារូបត្ថម្ភ ជំហានទី២ នាព្រឹកថ្ងៃទី១ កុម្ភៈ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ទី សុគន្ធ បានឲ្យដឹងថា ការផលិតបន្លែផ្លែឈើរបស់កសិករ ទើបតែបានចំនួន៥០%ប៉ុណ្ណោះ ហើយនាំចូលពីប្រទេសក្រៅ៥០% ។ ក្នុងករណីនេះ ប្រជាកសិករគួរខិតខំផលិតឲ្យបានច្រើនបន្ថែមទៀតសម្រាប់លក់នៅទីផ្សារក្នុងស្រុក ព្រោះថា ទីផ្សារក្នុងស្រុកមានភាពងាយស្រួលជាង ដោយមិនចាំបាច់ដឹកជញ្ជូនច្រើន ។
លោកថ្លែងថា ៖« ខ្ញុំរីករាយនឹងធ្វើអត្តសញ្ញាណក្នុងការធ្វើឲ្យមានសក្តានុពលខ្ពស់សម្រាប់បន្លែផ្លែឈើដែលផលិតដោយកសិករយើងសម្រាប់ទីផ្សារនៅក្នុងស្រុក មានន័យថា យើងមិនចាំបាច់នាំទៅទីផ្សារខាងក្រៅទេ យើងមានទីផ្សារក្នុងស្រុកច្រើនណាស់ » ។
លោករដ្ឋលេខាធិការក៏បានអះអាងថា ការដាំដុះបន្លែត្រូវបានគេរកឃើញថា បានទទួល ផលចំណេញច្រើនជាងផលស្រូវពី៧ទៅ៨ដង ដែលការធ្វើស្រូវក្នុង១ហិកតាបានប្រមាណ១ពាន់ដុល្លារ ចំណែកការធ្វើបន្លែ ក្នុង១ហិកតាបានប្រមាណ៧ពាន់ទៅ៨ពាន់ដុល្លារ ។
ជាមួយគ្នានេះ លោក ទី សុគន្ធ ក៏បានលើកឡើងពីផែនការរបស់រាជរដ្ឋាភិបាលក្នុងការផលិតស្បៀងសម្រាប់វិស័យកសិកម្ម ដែលត្រូវអនុវត្តដោយអគ្គនាយកដ្ឋានកសិកម្ម និងចំណាយថវិកាជាង២០លានដុល្លារអាមេរិកសម្រាប់រយៈពេល៣ឆ្នាំ គឺឆ្នាំ២០១៦, ២០១៧ និង២០១៨ ។
លោកស្រី Carin Salerno នាយកទីភ្នាក់ងារសហប្រតិបត្តិការ និងជាមន្ត្រីប្រឹក្សាអភិវឌ្ឍន៍នៃទីភ្នាក់ងារស្វ៊ីសសម្រាប់អភិវឌ្ឍន៍ និងសហប្រតិបត្តិការ(SDC) ស្ថានទូតស្វ៊ីសបានលើកឡើងថា គោលដៅអភិវឌ្ឍន៍ និងកិច្ចសហប្រតិបត្តិការរួមរបស់ប្រទេសស្វ៊ីស គឺរួមចំណែកដល់ការកាត់បន្ថយភាពក្រីក្រ ដើម្បីគាំទ្រដល់ការអភិវឌ្ឍប្រកបដោយសមធម៌ និងចីរភាព និងដើម្បីជំរុញអភិបាលកិច្ចតាមបែបប្រជាធិបតេយ្យ ។ គោលដៅនេះពង្រឹងរដ្ឋាភិបាលនៃប្រទេសCLMV និងតួអង្គមិនមែនរដ្ឋាភិបាលក្នុងបំណងក្លាយជាដៃគូស្មើភាពគ្នា និងជាដៃគូមានសមត្ថភាពនៅក្នុងសហគមន៍អាស៊ាន ។
លោកស្រីបញ្ជាក់ថា ៖« ស្របទៅនឹងយុទ្ធសាស្ត្រតំបន់មេគង្គរបស់SDCឆ្នាំ២០១៨ ដល់២០២១ យើងកំពុងធ្វើអន្តរាគមន៍ក្នុងវិស័យសំខាន់ៗចំនួន៣ រួមមាន ៖ ទី១-អភិបាលកិច្ចមូលដ្ឋាន និងការចូលរួមរបស់ប្រជាពលរដ្ឋ ។ ទី២-កសិកម្ម និងសន្តិសុខស្បៀង (AFS) និងទី៣-ការងារនិងការអប់រំ និងបណ្តុះបណ្តាលវិជ្ជាជីវៈ » ។
លោកស្រីបន្ថែមថា នៅក្នុងវិស័យកសិកម្ម និងសន្តិសុខស្បៀង SDC កំពុងធ្វើការស្របទៅនឹងអាទិភាពនានារបស់រាជរដ្ឋាភិបាលកម្ពុជា ដែលបានកំណត់នៅក្នុងផែនការអភិវឌ្ឍន៍យុទ្ធសាស្ត្រវិស័យកសិកម្ម (ASSDP ២០១៤-២០១៨) ក្នុងគោលដៅសម្រេចឲ្យបាននូវអត្រាកំណើនប្រចាំឆ្នាំ៥% តាមរយៈការបង្កើនផលិតភាព ពិពិធកម្ម និងការធ្វើពាណិជ្ជកម្ម ទន្ទឹមនឹងការប្រើប្រាស់ធនធានធម្មជាតិឲ្យមានប្រសិទ្ធភាព និងនិរន្តរភាព ។
ជាមួយគ្នានោះដែរ លោកស្រីក៏បានលើកឡើងថា ទោះជាកម្ពុជាមានវឌ្ឍនភាពផ្នែកសេដ្ឋកិច្ចយ៉ាងឆាប់រហ័សគួរឲ្យចាប់អារម្មណ៍ក្តី ក៏កសិកម្មនៅតែជាវិស័យសេដ្ឋកិច្ចមួយដ៏សំខាន់ដែលផ្តល់ផ.ស.សប្រហែល២៧%ក្នុងឆ្នាំ២០១៧ និងផ្តល់ការងារចំនួន៥៣%នៃកម្លាំងពលកម្មនៅជនបទ ។ ស្ត្រីជាង៦០%បានចូលរួមក្នុងវិស័យកសិកម្ម ។ ៩០%នៃប្រជាជនក្រីក្រ (២,៥លាននាក់) រស់នៅតាមតំបន់ជនបទ ហើយភាគច្រើនជាកសិករខ្នាតតូច ។ ប្រមាណជា១៩%ជាជនងាយរងគ្រោះធ្លាក់ទៅកាន់ភាពក្រីក្រវិញ ដោយសារវិបត្តិសេដ្ឋកិច្ច និងសង្គមពីខាងក្រៅ រួមមាន គ្រោះមហន្តរាយធម្មជាតិ និងការខ្វះប្រភពទឹកបណ្តាលមកពីការប្រែប្រួលអាកាសធាតុ ។
លោកស្រីក៏គូសបញ្ជាក់ថា ៖« ការកើនឡើងនូវតម្រូវការទីផ្សារបន្លែ និងផ្លែឈើ គឺជាឱកាសដ៏ធំមួយសម្រាប់កសិករ និងអ្នកកែច្នៃខ្នាតតូចជាពិសេស ស្ត្រីក្នុងការបង្កើនប្រាក់ចំណូល និងសន្តិសុខស្បៀង ។ ទន្ទឹមនឹងនេះ តម្រូវការបន្លែ និងផ្លែឈើកំពុងកើនឡើង ប៉ុន្តែថ្មីៗនេះ ភាគច្រើនត្រូវបាននាំចូលពីប្រទេសថៃ និងវៀតណាមនៅឡើយ » ។
លោកស្រីបន្ថែមថា គម្រោង CHAIN ដំណាក់កាលទី២ នឹងបន្តកសាងលើសក្តានុពលទីផ្សារដែលបង្កើតឡើងដោយកំណើនសេដ្ឋកិច្ចឆាប់រហ័ស ទោះជាស្ថិតនៅតំបន់ដាច់ស្រយាលនិងសហគមន៍កសិករក្តី ។ គម្រោងនេះចាប់ផ្តើមពីតម្រូវការ និងអាទិភាពរបស់កសិករស្ត្រី ហើយភ្ជាប់ពួកគេជាមួយក្រុមហ៊ុនផ្គត់ផ្គង់ និងពាណិជ្ជករនៅតាមខ្សែសង្វាក់តម្លៃ ទន្ទឹមនឹងការលើកកម្ពស់វិស័យផ្លែឈើ និងបន្លែដែលមាននិរន្តរភាព សុវត្ថិភាព និងទីផ្សារសម្រាប់ពេលអនាគត ។
លោកស្រីបញ្ជាក់ថា ៖« ខ្ញុំជឿជាក់យ៉ាងមុតមាំថា ជាមួយនឹងលទ្ធផល និងមេរៀនល្អៗដែលបានរៀនសូត្រ ព្រមទាំងសហប្រតិបត្តិការ និងកិច្ចសហប្រតិបត្តិការដែលត្រូវបានបង្កើតឡើង យ៉ាងល្អរវាងវិស័យសាធារណៈ វិស័យឯកជន និងកសិករក្នុងស្រុកក្នុងអំឡុងពេលដំណាក់កាលទី១ យើងមានគ្រឹះដ៏រឹងមាំដែលយើងទាំងអស់គ្នាអាចធ្វើជាមូលដ្ឋានសម្រាប់អនុវត្តក្នុងដំណាក់កាលទី២ ។ ខ្ញុំជឿជាក់ថា CHAIN ដំណាក់កាលទី២ នឹងផ្តល់លទ្ធផលដ៏ល្អជាថ្មីម្តងទៀតដើម្បីសម្រេចគោលដៅរបស់យើងក្នុងការគាំទ្រដល់គ្រួសារកសិករខ្នាតតូច និងប្រជាជនដែលពឹងផ្អែកលើធនធានធម្មជាតិដើម្បីបង្កើនប្រាក់ចំណូល និងសន្តិសុខស្បៀងរបស់ខ្លួន » ។
គួរបញ្ជាក់ថា គម្រោងសាវប្បកម្មកម្ពុជាដើម្បីបង្កើនប្រាក់ចំណូល និងអាហារូបត្ថម្ភ ជំហានទី២ បានដាក់ដំណើរការនៅខេត្តដាច់ស្រយាលដូចជា ខេត្តព្រះវិហារ ស្ទឹងត្រែង ក្រចេះ និងឧត្តរមានជ័យ ដែលមានរយៈពេល៣ឆ្នាំ ចាប់ពីខែធ្នូ ឆ្នាំ២០១៧ ដល់ខែធ្នូ ឆ្នាំ២០១៩ គឺមានថវិកាសរុបចំនួន៤,៥លានដុល្លារអាមេរិក ៕
ចែករំលែកព័តមាននេះ