ខេត្តក្រចេះ ៖ រថយន្តកាមេរីស៊េរីចាស់ៗចំនួន៥គ្រឿង សុទ្ធសឹងជាវត្ថុតាងដឹកជញ្ជូនបទល្មើសព្រៃឈើ ដែលបានបង្ក្រាបរយៈពេលកន្លងមក និងរក្សាទុកនៅស្នាក់ការដ្ឋបាលព្រៃឈើ បានរងការឆាបឆេះដោយសាររាលដាលពីភ្លើងឆេះព្រៃ ។
បើតាមការអះអាងពីក្រុមសមត្ថកិច្ចដែលឈរជើងប្រចាំការនៅស្នាក់ការសួនអាពាហ៍ពិពាហ៍របស់រដ្ឋបាលព្រៃឈើឃ្សឹម ស្ថិតក្នុងឃុំឃ្សឹម ស្រុកស្នួល បានឲ្យដឹងថា ក្នុងហេតុការណ៍ឆេះរាលដាលពីភ្លើងឆេះព្រៃរហូតមកឆេះដល់រថយន្តវត្ថុតាងនៅក្នុងស្នាក់ការដ្ឋបាលព្រៃឈើ កាលពីថ្ងៃទី០១ ខែកុម្ភៈ នេះ មិនបានបង្កឲ្យឆាបឆេះអ្វីទៀតនោះទេ ក្រៅពីរថយន្តចាស់ៗចំនួន៥គ្រឿងដែលបានចាប់បង្ក្រាប និងនាំមករក្សាទុកមានរយៈពេលជាយូរទៅហើយនោះ ។
ស្នាក់ការសួនអាពាហ៍ពិពាហ៍ នៃសង្កាត់រដ្ឋបាលព្រៃឈើឃ្សឹម ដែលមានទីតាំងនៅជាប់នឹងផ្លូវជាតិលេខ៧ ជាទីតាំងស្ថានីយ៍បណ្តុះកូនឈើ និងជាសួនអាពាហ៍ពិពាហ៍ ហើយក៏ជាទីតាំងរក្សាទុកវត្ថុតាងបទល្មើសព្រៃឈើធំមួយនៅក្នុងស្រុកស្នួល ។ ក្នុងបរិវេណស្នាក់ការនេះ មានឈើគ្រប់ប្រភេទចំនួនរាប់ពាន់ម៉ែត្រគូប និងរថយន្តរាប់រយគ្រឿង ដែលបានមកពីការចាប់រឹបអូសពីបទល្មើសព្រៃឈើ ត្រូវបាននាំមករក្សាទុក ។
ក្រុមមន្ត្រីដែលប្រចាំការនៅស្នាក់ការនេះ បានឲ្យដឹងទៀតថា មុនពេលកើតហេតុ គឺភ្លើងព្រៃបានឆាបឆេះមកម្តងតែមិនធ្ងន់ធ្ងរដោយសារត្រូវពន្លត់ទាន់ ។ តែក្រោយការពន្លត់ក្រុមមន្ត្រីទាំងនោះ បានចេញទៅហូបបាយ ភ្លើងព្រៃក៏ឆេះរាលមកម្តងទៀត ទើបមិនអាចជួយពន្លត់ទាន់ពេល និងបានឆេះរាលដាលដល់រថយន្ត៥គ្រឿងនៅជាប់នឹងរបង បានរងការឆេះរោលរាល ។ ហើយហេតុការណ៍នេះ ក្រៅពីរថយន្ត៥គ្រឿងបានឆេះ គឺមិនបានបង្កឲ្យមានការឆាបឆេះសម្ភាររបស់របរណាមួយទៀតនោះទេ ដោយសារមានការជួយពន្លត់ទាន់ ៕
ចែករំលែកព័តមាននេះ