តាមទីភ្នាក់ងារព័ត៌មានបរទេសផ្សាយថ្ងៃទី២៩ មីនា ថា គណៈកម្មការអឺរ៉ុបបានបង្ហើបឱ្យដឹងពីគម្រោងការដាក់បម្រាមដល់ទីក្រុងផ្សេងៗនៅទូទាំងអឺរ៉ុបរួមមានទាំងទីក្រុងឡុងផង មិនឱ្យប្រើប្រាស់រថយន្តនៅមុនឆ្នាំ២០៥០ ក្នុងគោលបំណងកាត់បន្ថយការបញ្ចេញឧស្ម័នកាបូនអុកស៊ីដទៅក្នុងស្រទាប់បរិយាកាស និងកាត់បន្ថយកំដៅផែនដី ។
គម្រោងផែនការខាងលើ មានគោលដៅកំណត់ការបញ្ចេញកម្រិតសារធាតុកាបូនអុក ស៊ីដ ០% សម្រាប់រថយន្តដែលប្រើម៉ាស៊ូតនិងប្រេងសាំង រួមទាំងរថយន្តផ្ទុកទំនិញក្នុងទីក្រុងផ្សេងៗរបស់សហគមន៍អឺរ៉ុបនៅពេលអនាគត ។ ក្រៅពីនេះ គម្រោងខាងលើ ក៏មានគោលដៅចង់ឱ្យមានការធ្វើដំណើរទៅសម្រាកលំហែកាយក្នុង អំឡុងថ្ងៃឈប់សម្រាកពីអង់គ្លេសឆ្ពោះទៅអឺរ៉ុបបានដែលធ្វើដំណើរដោយរថយន្តភ្លើង ។
លោកស៊ីអីុម កាល់ឡាស់ គណៈកម្មការដឹកជញ្ជូនសហគមន៍អឺរ៉ុបគូសបញ្ជាក់ថា បទបញ្ជា
«ក្រុងព្រុចសែល» នេះ រួមមានទាំងផែនការដំឡើងពន្ធលើប្រេងឥន្ធនៈ និងយកទៅប្រើ ដើម្បីបង្ខំឱ្យប្រជាជននៅទ្វីបអឺរ៉ុបបោះបង់ ចោលរថយន្ត និងងាកទៅធ្វើដំណើរតាមរយៈ យានយន្តផ្សេងៗជំនួសវិញ ។ គោលបំណងគឺដើម្បីកុំឱ្យមានប្រើរថយន្តប្រើថាមពលប្រេងឥន្ធនៈនៅក្នុងតំបន់រដ្ឋធានីរបស់អឺរ៉ុបដោយលោកមានជំនឿថានៅពេលមានការបង្ខំឱ្យប្រើច្បាប់ទម្លាប់នេះ នឹងធ្វើឱ្យប្រជាជនត្រូវ ប្រតិបត្តិតាម ។
ក្រៅពីនេះ លោកថែមទាំងបដិសេធថា ផែនការកាត់បន្ថយការប្រើរថយន្តនៅទូទាំងអឺរ៉ុបឱ្យនៅពាក់កណ្តាលក្នុងអំឡុងពេល២០ឆ្នាំខាងមុខ និងហាមប្រើរថយន្តទាំងអស់នៅមុនឆ្នាំ២០៥០ នឹងត្រូវកំណត់សក្តានុពលក្នុងការធ្វើដំណើរផ្ទាល់ខ្លួនរបស់ប្រជាជន និងកាត់បន្ថយការប្រកួតប្រជែងផ្នែកសេដ្ឋកិច្ចនៅតំបន់អឺរ៉ុប៕
ចែករំលែកព័តមាននេះ