រាជធានីភ្នំពេញ ៖ ក្រុមហ៊ុនផ្ទេរនិងផ្ញើប្រាក់តាមប្រព័ន្ធអនទ្បាញ ឈ្មោះថា WorldRemit ដែលជាក្រុមហ៊ុនផ្តល់សេវាកម្មផ្ទេរប្រាក់ឌីជីថលឈានមុខគេ និងធនាគារឯកទេសវីង (ខេមបូឌា) លីមីធីត ដែលជាធានាគារផ្តល់សេវាកម្មហិរញ្ញវត្ថុទូរស័ព្ទចល័តធំបំផុតនៅកម្ពុជា បានចាប់ផ្តើមធ្វើការផ្ទេរប្រាក់មកកាន់កម្ពុជា ដូច្នេះប្រជាជនកម្ពុជារស់នៅក្រៅប្រទេសអាចផ្ញើប្រាក់ភ្លាមៗ ទៅគណនីធនាគារចល័តវីងជាងមួយលាន គណនី ឬដកសាច់ប្រាក់នៅទីតាំងជាង ៥០០០ កន្លែង ។
សេវាកម្មថ្មីនេះ ផ្តល់ជូនប្រជាជនកម្ពុជាដែលកំពុងរស់នៅ និងបម្រើការងារនៅជាង ៥០ប្រទេស រួមមាន សហរដ្ឋអាមេរិក បារាំង អូស្ត្រាលី និងប្រទេសកាណាដាជាដើម នូវការផ្ញើប្រាក់ទៅគណនីធនាគារចល័តជាងមួយលានរបស់ធនាគារ វីង។ ម្ចាស់គណនីវីង អាចផ្ញើប្រាក់ក្នុងស្រុក បង់វិក័យប័ត្រ ប្រើប្រាស់ប្រាក់នេះជាមួយអាជីវករជាង ៨០០០ ឬគ្រាន់តែដកសាច់ប្រាក់តាមរយៈភ្នាក់ងារ វីង។ អ្នកទទួលអាចទទួលយកប្រាក់ជាដុល្លារ រឺប្រាក់រៀល។ ទឹកប្រាក់ត្រូវបានដាក់បញ្ចូលដោយផ្ទាល់ទៅក្នុងគណនីវីង ឬប្រមូលនៅតាមទីតាំងរបស់ភ្នាក់ងារវីងជាង ៥០០០ កន្លែងក្នុងប្រទេសកម្ពុជា។
ការផ្ទេរប្រាក់ពីក្រៅប្រទេសមានភាពសាមញ្ញ ព្រោះវាជាគំរូឌីជីថលដំបូងគេ ដែលប្រើប្រាស់ភាពងាយស្រួលរបស់ក្រុមហ៊ុន WorldRemit ។ ទឹកប្រាក់អាចត្រូវបានផ្ញើចេញពីកម្មវិធីស្មាតហ្វូន ឬវេបសាយរបស់ក្រុមហ៊ុន WorldRemit ដោយមិនចាំបាច់ចំណាយពេលវេលា និងប្រាក់ផ្ទាល់មកកាន់ភ្នាក់ងារទ្បើយ។
សេវាកម្មធនាគារចល័តកាន់តែមានប្រជាប្រិយភាពខ្លាំងទ្បើងពាសពេញតំបន់អាស៊ីខាងត្បូង ហើយក្នុងឆ្នាំ២០១៦ ស្ថាប័នពាណិជ្ជកម្មឧស្សាហកម្មមួយឈ្មោះថា សមាគមប្រព័ន្ធចល័តសាកល (GSMA) បានលើកទ្បើងថា ក្នុងតំបន់នេះមាន៤០% នៃអ្នកដែលទើបតែចុះឈ្មោះប្រើគណនីថ្មី។ កត្តានេះកំពុងត្រូវបានជំរុញដោយសេវាកម្មជាច្រើន ដូចជាសេវាកម្មបស់វីង ដែលអាចឱ្យប្រជាជនកម្ពុជាផ្ញើ និងទទួលប្រាក់តាមរយៈទូរស័ព្ទដៃ។
ប្រជាជនរស់នៅក្រៅប្រទេសរាប់លាននាក់របស់កម្ពុជាបានដើរតួយ៉ាងសំខាន់សម្រាប់សេដ្ឋកិច្ចប្រទេស។ របាយការណ៍របស់ធនាគារពិភពលោកបានលើកទ្បើងថា ក្នុងឆ្នាំ២០១៥ ប្រទេសកម្ពុជាទទួលប្រាក់ បញ្ញើជាង ៤០០ លានដុល្លារអាមេរិក។
លោក Ismail Ahmed ស្ថាបនិក និងជានាយកប្រតិបត្តិរបស់ក្រុមហ៊ុន WorldRemit លើកទ្បើងថា៖ «ភាពជាដៃគូនេះនឹងអនុវញ្ញាតឱ្យប្រជាជនកម្ពុជាដែលបម្រើការងារយ៉ាងលំបាកនៅក្រៅប្រទេសផ្ញើប្រាក់ត្រទ្បប់មកផ្ទះ ក្រុមគ្រួសារ និងមិត្តភក្តិកាន់តែងាយស្រួល។ យើងមានសេចក្តីសោមនស្សរីករាយដោយបានធ្វើជាដៃគូជាមួយធនាគារមួយដែល ផ្តួចផ្តើមនូវ សេវាធនាគារចល័តនៅកម្ពុជា និងបានធានាថា ប្រជាជនកម្ពុជារាប់លាននាក់នៅទូទាំងប្រទេសអាចទទួលបានសេវាហិរញ្ញវត្ថុបានយ៉ាងងាយស្រួល»។
លោក Jojo Malolos នាយកប្រតិបត្តិធនាគារវីងបានលើកទ្បើងថា៖ «ធនាគារវីងមានសេចក្តីរីករាយក្នុងការធ្វើជាដៃគូជាមួយក្រុមហ៊ុន WorldRemit ដើម្បីនាំមកនូវភាពងាយស្រួលថ្មីដល់ប្រជាជនកម្ពុជាដែលរស់នៅឯបរទេស។ ភាពជាដៃគូនេះធ្វើអោយសេវាកម្មផ្ទេរប្រាក់ពីក្រៅប្រទេស ឆ្ពោះទៅកាន់កម្រិតមួយទៀត – ដោយការផ្ញើប្រាក់គ្រប់ទីកន្លែងក្នុងប្រទេសកម្ពុជាពីប្រជាជនកម្ពុជាគ្រប់ទីកន្លែងនៅលើពិភពលោក។ យើងកំពុងភ្ជាប់គម្លាត និងធ្វើឱ្យអតិថិជនរបស់យើងដែលរស់នៅក្រៅប្រទេសកាន់តែមានភាពងាយស្រួលក្នុងការផ្ញើប្រាក់របស់ពួកគេទៅកាន់មនុស្សដែលខ្លួនស្រទ្បាញ់ ហើយពួកគេអាចដកប្រាក់ភ្លាមៗតាមរយៈគណនីវីង ឬតាមភ្នាក់ងារវីងរបស់យើងនៅទូទាំងប្រទេសជាង ៥០០០កន្លែង» ។
សូមបញ្ជាក់ថា ក្រុមហ៊ុន WorldRemit កំពុងផ្លាស់ប្តូរវិធីសាស្ត្រផ្ញើប្រាក់របស់ប្រជាជននិងមានភាពងាយស្រួលដោយគ្រាន់តែបើកកម្មវិធី app ឬចូលទៅកាន់គេហទំព័រ-គ្មានភ្នាក់ងារ ព្រោះក្រុមហ៊ុនមាននៅក្នុងបណ្តាប្រទេសជាង ៥០ និង១៤៨ កន្លែង ។
ទីស្នាក់ការកណ្តាលរបស់ក្រុមហ៊ុន WorldRemit ស្ថិតនៅក្នុងទីក្រុងឡុងដ៍ ចក្រភពអង់គ្លេស ហើយ មានការិយាល័យនៅសហរដ្ឋអាមេរិក កាណាដា អាហ្វ្រិកខាងត្បូង សិង្ហបុរី ហ្វីលីពីន ជប៉ុន អូស្ត្រាលីនិងនូវែលសេឡង់៕
ចែករំលែកព័តមាននេះ