ថ្នាក់ដឹកនាំមន្ត្រីរាជការ និងប្រជាពលរដ្ឋជាពុទ្ធបរិស័ទប្រារព្ធពិធីបុណ្យមាឃបូជា
- កំពត
ខេត្តកំពត ៖ នៅរសៀលថ្ងៃទី៣១ ខែមករា ឆ្នាំ២០១៨ រដ្ឋបាលខេត្តកំពតបានប្រារព្ធពិធីបុណ្យមាឃបូជា ក្រោមវត្តមានចូលរួមពីសំណាក់លោក ជាវ តាយ អភិបាល…
ខេត្តកំពត ៖ នៅរសៀលថ្ងៃទី៣១ ខែមករា ឆ្នាំ២០១៨ រដ្ឋបាលខេត្តកំពតបានប្រារព្ធពិធីបុណ្យមាឃបូជា ក្រោមវត្តមានចូលរួមពីសំណាក់លោក ជាវ តាយ អភិបាល នៃគណៈអភិបាលខេត្ត និងលោក អ៊ឹង ម៉េងហ៊ួរ ប្រធានក្រុមប្រឹក្សាខេត្ត និងលោកជំទាវ ។
កម្មវិធីបុណ្យរៀបចំឡើងដោយបាននិមន្តព្រះសង្ឃ និងអញ្ជើញថ្នាក់ដឹកនាំមន្ត្រីរាជការ នៃមន្ទីរអង្គភាពនានាជុំវិញខេត្ត សីលវន្ត សីលវតី ពុទ្ធបរិស័ទ ប្រជាពលរដ្ឋ ព្រមទាំងសិស្សាសិស្ស និសិត្សចូលរួមយ៉ាងច្រើនកុះករសរុបប្រមាណជាង៥,០០០នាក់ ។
ពិធីបុណ្យបានប្រព្រឹត្តិទៅដោយក្បួនដង្ហែរូបបដិមាពីសាលាខេត្តកំពត មកកាន់ទីសក្ការប្រាសាទដើមពោធិ៍ ស្ថិតនៅក្នុងសង្កាត់កំពង់កណ្ដាល ក្រុងកំពត ។ រួចវេរគ្រឿងសក្ការប្រគេនដល់ព្រះសង្ឃ និងនិមន្តព្រះសង្ឃសម្ដែងធម៌ទេសនាបុច្ឆាវិសច្ចនាគ្រែ៥ ។
លុះព្រឹកឡើងថ្ងៃទី០១ ខែឆ្នាំដដែល ក៏បានវេរចង្ហាន់ប្រគេនព្រះសង្ឃ ដើម្បីឧទ្ទិសមគ្គផលជូនបុព្វការីជន និងញាតិការទាំង៧សន្ដាន រួចនិមន្តព្រះចំនួន៨០០អង្គរាប់បាតជាកិច្ចបង្ហើយពិធីបុណ្យ ។
គួររំឭកថា បុណ្យមាឃបូជា គឺជាបុណ្យមួយក្នុងបណ្ដាបុណ្យធំៗទាំងឡាយក្នុងព្រះពុទ្ធសាសនា ដែលប្រទេសកាន់ព្រះពុទ្ធសាសនាលើពិភពលោក តែងតែប្រារព្ធធ្វើពុំដែលខាននោះឡើយ ។ ដោយឡែកនៅក្នុងព្រះរាជាណាចក្រកម្ពុជាយើង នៅគ្រប់វត្តអារាមទូទាំងប្រទេស ក៏ត្រូវបានពុទ្ធសាសនិកខ្មែរយើងតែងតែប្រារព្ធធ្វើបុណ្យមាឃបូជានេះឡើងព្រមៗគ្នាផងដែរ ។
ដោយបានចាត់ទុកថា ជាការបំពេញមហាកុសលដ៏ថ្លៃថ្លាបំផុតសម្រាប់ពុទ្ធបរិស័ទអ្នកកាន់ព្រះពុទ្ធសាសនា ។ សម្រាប់នៅខេត្តកំពត រដ្ឋបាលខេត្តបានសហការណ៍រៀបចំជាមួយមន្ត្រីសង្ឃ និងមន្ទីរធម្មការ និងសាសនាខេត្ត ក៏តែងតែប្រារព្ធប្រតិបត្តិធ្វើឡើងពុំដែលអាក់ខានម្តងណាឡើយជារៀងរាល់ឆ្នាំ គឺដើម្បីឧទ្ទិសមហាកុសលផង និងដើម្បីរំឭកដល់ថ្ងៃជាមហាមង្គលទាំងពីរ នៃព្រះសម្មាសម្ពុទ្ធបរមគ្រូនៃយើង ដែលទ្រង់ប្រកាសដាក់ព្រះជន្មាយុសង្ខារផង និងថ្ងៃប្រជុំចតុរង្គសន្និបាត នៃព្រះអរហន្តទាំង១,២៥០អង្គផងដែរ ៕
ចែករំលែកព័តមាននេះ