រាជធានីភ្នំពេញ ៖ បុរសបីនាក់ស្រវឹងជោកជាំម៉ូតូមួយគ្រឿងក្នុងល្បឿនយ៉ាងលឿនរេពេញផ្លូវជ្រុលចង្កូតទៅបុករ៉ឺម៉កម៉ូតូមួយគ្រឿងទៀតក្នុងទិសដៅបញ្ច្រាសទិសគ្នាចំពីមុខពេញទំហឹងបណ្តាលឲ្យបុរសម្នាក់ស្លាប់និងបីនាក់ទៀតរងរបួសធ្ងន់ និងស្រាល ហេតុការណ៍នេះបង្កឲ្យមានការភ្ញាក់ផ្អើលឡើងកាលពីវេលាម៉ោង១២នឹង៣០នាទីរំលងអធ្រាត្រឈានចូលថ្ងៃទី០១ ខែកុម្ភៈ ឆ្នាំ២០១៨ ត្រង់ចំណុចខាងត្បូងផ្សារឈូកមាសប្រមាណ១០០ម៉ែត្រ តាមបណ្តោយផ្លូវ២០១១ ស្ថិតក្នុងសង្កាត់គោកឃ្លាង ខណ្ឌសែនសុខ ។
ជនរងគ្រោះដែលស្លាប់នៅកន្លែងកើតហេតុមានឈ្មោះ ឆន ម៉ន ភេទប្រុស អាយុ៤៨ឆ្នាំ ជាមន្ត្រីយោធាសក្តិ៤ ស្នាក់នៅភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ។
តាមប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញបុរសរងគ្រោះខាងលើបើករ៉ឺម៉កម៉ូតូមួយគ្រឿង អត់មានស្លាកលេខ ធ្វើដំណើរតាមបណ្តោយផ្លូវ២០១១ ក្នុងទិសដៅពីជើងទៅត្បូង ។
លុះមកដល់ចំណុចកើតហេតុស្រាប់តែមានម៉ូតូបង្កមួយគ្រឿងទៀតម៉ាកស៊ុយស្ស័រគីនិច ពណ៌ខ្មៅលាយក្រហម ពាក់ស្លាកលេខ ភ្នំពេញ ១GO-៩៤១៩ បើកបរដោយបុរសបីនាក់ក្នុងស្ថានភាពស្រវឹងជោកជាំបើកបរក្នុងទិសដៅបញ្ច្រាសទិសគ្នាហើយលឿនជិះរេពេញផ្លូវរេចង្កូតទៅខាងឆ្វេងជ្រុលទៅបុកនឹងរ៉ឺម៉កម៉ូតូខាងលើចំពីមុខពេញទំហឹងបណ្តាលឲ្យម៉ូតូបង្ករងការខូចខាតផ្នែកខាងមុខយ៉ាងដំណំ រីឯអ្នកបើកម៉ូតូរងរបួសធ្ងន់ធ្ងរត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅមន្ទីពេទ្យព្រះកុសុមៈ និងអ្នករួមដំណើរពីក្រោយរងរបួសសន្លប់ស្តូកស្តឹងត្រូវបានរថយន្តសង្គ្រោះបន្ទាន់ដឹកយកទៅសង្គ្រោះនៅគ្លីនិកឯកជន និងម្នាក់ទៀតរងរបួសបែកមុខបែកមាត់ត្រូវបានប្រជាពលរដ្ឋចាប់ប្រគល់ឱ្យសមត្ថកិច្ចមូលដ្ឋាន ។
ចំណែកឯរ៉ឺម៉កម៉ូតូរងការខូចខាតផ្នែកខាងមុខយ៉ាងដំណំ រីឯបុរសរងគ្រោះដែលជាអ្នកបើកបររងរបួសផុងលលាដ៍ក្បាលស្លាប់ភ្លាមៗនៅហ្នឹងកន្លែងកើតហេតុ ពេលប្រពន្ធរបស់ជនរងគ្រោះបានមកដល់កន្លែងកើតហេតុបានស្រែកទ្រហោយំឱបសពប្តីយ៉ាងគួឲ្យអាណោចអាធ័ម ។
បើតាមសម្តីពីបុរសម្នាក់ដែលជាមិត្តភក្តិ និងបុរសរងគ្រោះបានឲ្យដឹងថា បុរសរងគ្រោះខាងលើគឺជាមន្ត្រីយោធា សក្តិ៤ពេលទំនេររត់រ៉ឺម៉កម៉ូតូដើម្បីយកថវិកាផ្គត់ផ្គង់គ្រួសារ ។ នៅយប់មុនពេលកើតហេតុពួកគាត់បានអង្គុយចាំដឹកភ្ញៀវនៅខាងមុខក្លឹបមួយកន្លែងដែលនៅតាមបណ្តោយផ្លូវ២០១១ ។ បន្ទាប់មកបុរសរងគ្រោះក៏បានដឹកបុរសម្នាក់ដែលជាភ្ញៀវចេញពីទីនោះទៅបាត់ ស្រាប់តែមួយសន្ទុះក៏មានគេមកប្រាប់ថា បុរសរងគ្រោះបានជួបគ្រោះថ្នាក់ចរាចរណ៍ស្លាប់បាត់ទៅហើយ ។
ក្រោយពេលកើតហេតុសមត្ថកិច្ចមូលដ្ឋាន និងសមត្ថកិច្ចជំនាញបានចុះមកធ្វើការវាស់វែងយកម៉ូតូ និងរ៉ឺម៉កម៉ូតូទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដើម្បីរងចាំធ្វើការដោះស្រាយគ្នានៅពេលក្រោយ ។ ដោយឡែកសពបុរសរងគ្រោះត្រូវបានសមត្ថកិច្ចប្រគល់ទៅក្រុមគ្រួសារដឹកយកទៅធ្វើបុណ្យទៅតាមប្រពៃណីនៅឯវត្តក្រាំងធ្នង់ ៕
ចែករំលែកព័តមាននេះ