ខេត្តបន្ទាយមានជ័យ ៖ យុវជនម្នាក់ត្រូវបានជនមិនស្គាល់អត្តសញ្ញាណកាប់បណ្ដាលឲ្យរងរបួសយ៉ាងធ្ងន់ធ្ងរ ខណៈពេលដែលកំពុងជិះម៉ូតូតាមផ្លូវបណ្ដើរម៉ូតូក្មេងស្រី២នាក់ ។ ហេតុការណ៍នេះបានកើតឡើងនៅវេលាម៉ោង១០យប់ ថ្ងៃទី៣០ ខែមករា ឆ្នាំ២០១៧ ស្ថិតនៅចំណុចភូមិថ្នល់ដាច់…
ខេត្តបន្ទាយមានជ័យ ៖ យុវជនម្នាក់ត្រូវបានជនមិនស្គាល់អត្តសញ្ញាណកាប់បណ្ដាលឲ្យរងរបួសយ៉ាងធ្ងន់ធ្ងរ ខណៈពេលដែលកំពុងជិះម៉ូតូតាមផ្លូវបណ្ដើរម៉ូតូក្មេងស្រី២នាក់ ។ ហេតុការណ៍នេះបានកើតឡើងនៅវេលាម៉ោង១០យប់ ថ្ងៃទី៣០ ខែមករា ឆ្នាំ២០១៧ ស្ថិតនៅចំណុចភូមិថ្នល់ដាច់ ឃុំភ្នំដី ស្រុកភ្នំស្រុក ខេត្តបន្ទាយមានជ័យ ។
លោកវរសេនីយ៍ទោ យ៉ត សុផល អធិការនគរបាលស្រុកភ្នំស្រុក បានឲ្យដឹងថា ជនរងគ្រោះឈ្មោះ រឿន ស៊ីម៉ាក់ ភេទប្រុស អាយុ២០ឆ្នាំ នៅភូមិកំពីងពួយ ឃុំភ្នំដី ស្រុកភ្នំស្រុក ខេត្តបន្ទាយមានជ័យ ។
លោកអធិការបានបញ្ជាក់ថា តាមការសាកសួរជនរងគ្រោះ មុនពេលកើតហេតុ ខ្លួនបានជិះម៉ូតូ១គ្រឿង និងក្មេងស្រីចំនួន២នាក់បានជិះម៉ូតូ១គ្រឿងដែរ តែមិនស្គាល់ឈ្មោះ ដឹងថានៅភូមិថ្នល់ដាច់ ឃុំភ្នំដី ពេលជិះបណ្ដើរក្មេងស្រីទាំង២នាក់ មកដល់ផ្លូវបត់ចូលក្នុងភូមិថ្នល់ដាច់ ក៏ស្រាប់តែមានយុវជន មិនដឹងគ្នាប៉ុន្មាននាក់ ជិះម៉ូតូ១គ្រឿង មិនស្គាល់អត្តសញ្ញាណ បានជិះតាមពីក្រោយ ហើយបានធ្វើសកម្មភាពកាប់ទៅលើជនរងគ្រោះគ្មានប្រណី បណ្ដាលឲ្យរបួសក្បាលផ្នែកខាងក្រោយ១កន្លែង, របួសក្បាលផ្នែកខាងមុខ២កន្លែងជ្រៅជិតដល់លលាដ៍ ហើយត្រូវបញ្ជូនទៅកាន់មន្ទីរពេទ្យបង្អែកមិត្តភាពកម្ពុជា-ជប៉ុន នៅស្រុកមង្គលបូរីទាំងយប់ ។
លោកអធិការបានឲ្យដឹងទៀតថា ក្នុងករណីហិង្សាដោយចេតនានេះ នៅមិនទាន់ដឹងថា ជាករណីគំនុំ ឬក៏រឿងស្នេហានោះទេ ព្រោះពេលនេះកម្លាំងនគរបាលជំនាញកំពុងតែធ្វើការស្រាវជ្រាវរកមុខសញ្ញាជនដៃដល់ ដើម្បីនាំខ្លួនមកសាកសួរ និងកសាងសំណុំរឿងតាមច្បាប់ ៕
ចែករំលែកព័តមាននេះ